Numbers 29

Gussi (EBIBILIA ENCHENU) 2020

← Chapter 28 Jump to: Chapter 30 →

1Ase rituko rie ritang’ani ri’omotienyi o gatano na kabere namobe nomosangererekano bwatananire ase ogosasima. Timokora emeremo ya kera rituko. Rituko erio nigo rirabe rituko ri’okobugia ebiroria.

2Morue eeri ensae eyemo, na emingichi eyemo, ne chimingichi isano na ibere, echiakoorire omwaka oyomo, chitari na kemocho ase emebere yabo, chibe ekeng’wanso ki’ogosambwa kere ne rimisu rigiya rikogwenera Omonene.

3Amo nekeng’wanso ekio morue okoruegwa kw’endagera, obosie obonuke bwochoganirie namaguta: Amo neeri eria morue obosie ebimunu bitano na ekemo, na amo nemingichi eria obosie ebimunu bine,

4na amo na kera eyemo ye chimanwa chimingichi chiria isano na ibere obosie ebimunu bibere.

5Naende morue egoree eyemo ebe ekengwanso ki’ebibe ase ogokora okobwatanigwa asemore.

6Ebing’wanso ebio bimentwe ase ekeng’wanso ki’ogosambwa ki’Omotienyi Omoyia, amo nokoruegwa kw’endagera gochikire, na ekeng’wanso ki’ogosambwa gia kera rituko na okoruegwa kw’endagera na ogw’ekenyugwa gokorentwa amo nebio, koreng’ana nomoroberio ochikire. Ebinto ebio bire ne rimisu rigiya, okoruegwa kogosambwa nomorero ase Omonene.

7Ase rituko ria ikomi ri’omotienyi oyio o gatano na kabere, mobe nomosangererekano bwatananire ase ogosasima. Mobe mokweng’ata na gweitia. Timokora emeremo ende yonsi.

8Morue eeri ensae eyemo, na emingichi eyemo, ne chimanwa chimingichi isano na ibere, echiakoorire omwaka oyomo, chionsi chibe chitari na kemocho ase emebere yabo. Echio nchibe ekeng’wanso ki’ogosambwa kere ne rimisu rigiya rikogwenera Omonene.

9Amo nachirochio morue okoruegwa kw’endagera, obosie obonuke bwochoganirie namaguta. Amo neeri eria morue obosie ebimunu bitano na ekemo, na amo nemingichi eria obosie ebimunu bine,

10na amo na kera eyemo ye chimanwa chimingichi, chiria isano na ibere, obosie ebimunu bibere.

11Naende morue egoree eyemo ebe ekeng’wanso ki’ebibe, kementwe ase ekeng’wanso ki’ogokora okobwatanigwa, na ekeng’wanso ki’ogosambwa gwa kera rituko, amo nokoruegwa kw’endagera na okw’ebinyugwa gochikire amo nabirobio.

12Ase rituko ria ikomi na gatano ri’omotienyi o gatano na kabere mobe nomosangererekano bwatananire ase ogosasima. Timokora emeremo ende yonsi, korende morende Rituko Rinene ri’Omonene ase engaki y’amatuko atano na abere.

13Morue chieri ikomi na isato, ne chimingichi ibore, ne chimanwa chimingichi ikomi na inye, echiakoorire omwaka oyomo, chionsi chibe chitari ne kemocho ase emebere yabo. Echio nchibe ekengw’anso kegosambwa nomorero, kere ne rimisu rigiya rikogwenera Omonene.

14Amo nechio morue okoruegwa kw’endagera, obosie obonuke bwochoganirie namaguta. Amo na kera eyemo ye chieri chiria ikomi na isato morue obosie ebimunu bitano na ekemo, na amo na kera eyemo ye chimingichi chiria ibere obosie ebimunu bine,

15na amo na kera eyemo ye chimanwa chimingichi chiria ikomi na inye obosie ebimunu bibere.

16Naende morue egoree eyemo ebe ekeng’wanso ki’ebibe. Ebing’wanso ebio bimentwe ase ekeng’wanso ki’ogosambwa gia kera rituko, na okoruegwa kw’endagera, na okw’ebinyugwa gochikire amo nabirobio.

17Rituko ria kabere morue chieri chinsae ikomi na ibere, ne chimingichi ibere, ne chimanwa chimingichi ikomi na inye, echiakoorire omwaka oyomo, chionsi chibe chitari na kemocho ase emebere yabo.

18Mochirue amo nokoruegwa kw’endagera, na okw’ebinyugwa gochikire koruerwa amo ne chieri chiria, ne chimingichi chiria, ne chimanwa chimingichi chiria, koreng’ana nomobaro obo. Boigo mochirue koreng’ana nomoroberio ochikire.

19Naende morue egoree eyemo ebe ekeng’wanso ki’ebibe. Ebing’wanso ebio bimentwe ase ekeng’wanso ki’ogosambwa gwa kera rituko. Morue nokoruegwa kw’endagera, na okw’ebinyugwa gochikire amo nabirobio.

20Rituko ria gatato morue chieri ikomi nemo, ne chimingichi ibere, ne chimanwa chimingichi ikomi na inye, echiakoorire omwaka oyomo, chionsi chibe chitari na kemocho ase emebere yabo.

21Mochirue amo nokoruegwa kw’endagera na okw’ebinyugwa gochikire koruegwa amo ne chieri chiria, ne chimingichi chiria, ne chimanwa chimingichi chiria, koreng’ana nomobaro obo. Boigo mochirue koreng’ana nomoroberio ochikire.

22Naende morue egoree eyemo ebe ekeng’wanso ki’ebibe. Ebing’wanso ebio bimentwe ase ekeng’wanso ki’ogosambwa gia kera rituko, na okoruegwa kw’endagera, na okw’ebinyugwa gochikire amo nabirobio.

23Rituko ria kane morue chieri ikomi, ne chimingichi ibere, ne chimanwa chimingichi ikomi na inye, echiakoorire omwaka oyomo, chionsi chibe chitari na kemocho ase emebere yabo.

24Mochirue amo nokoruegwa kw’endagera na okw’ebinyugwa gochikire koruegwa amo ne chieri chiria, ne chimingichi chiria, ne chimanwa chiria, koreng’ana nomobaro obo. Boigo mochirue koreng’ana nomoroberio ochikire.

25Naende morue egoree eyemo ebe ekeng’wanso ki’ebibe. Ebing’wanso ebio bimentwe ase ekeng’wanso ki’ogosambwa gwa kera rituko, na okoruegwa kw’endagera, na okw’ebinyugwa gochikire amo nabirobio.

26Rituko ria gatano morue chieri kianda, ne chimingichi ibere, ne chimanwa chimingichi ikomi na inye, echiakoorire omwaka oyomo, chionsi chibe chitari na kemocho ase emebere yabo.

27Mochirue amo nokoruegwa kw’endagera, na okw’ebinyugwa gochikire koruegwa amo ne chieri chiria, ne chimingichi chiria, ne chimanwa chimingichi chiria, koreng’ana nomobaro obo. Boigo mochirue koreng’ana nomoroberio ochikire.

28Naende morue egoree eyemo ebe ekeng’wanso ki’ebibe. Ebing’wanso ebio bimentwe ase ekeng’wanso ki’ogosambwa gwa kera rituko, na okoruegwa kw’endagera na okw’ebinyugwa gochikire amo nabirobio.

29Rituko ria gatano na rimo morue chieri isano na isato, ne chimingichi ibere, ne chimanwa chimingichi ikomi na inye, echiakoorire omwaka oyomo, chionsi chibe chitari na kemocho ase emebere yabo.

30Mochirue amo nokoruegwa kw’endagera na okw’ebinyugwa gochikire koruegwa amo ne chieri chiria, ne chimingichi chiria, ne chimanwa chimingichi chiria, koreng’ana nomobaro obo. Boigo mochirue koreng’ana nomoroberio ochikire.

31Naende morue egoree eyemo ebe ekeng’wanso ki’ebibe. Ebing’wanso ebio bimentwe ase ekeng’wanso ki’ogosambwa gwa kera rituko, na okoruegwa kw’endagera na okw’ebinyugwa gochikire amo nabirobio.

32Rituko ria gatano na kabere morue chieri isano na ibere, ne chimingichi ibere, ne chimanwa chimingichi ikomi na inye, echiakoorire omwaka oyomo, chionsi chibe chitari na kemocho ase emebere yabo.

33Mochirue amo nokoruegwa kw’endagera na okw’ebinyugwa gochikire koruegwa amo ne chieri chiria, ne chimingichi chiria, ne chimanwa chimingichi chiria koreng’ana nomobaro obo. Boigo mochirue koreng’ana nomoroberio ochikire.

34Naende morue egoree eyemo ebe ekeng’wanso ki’ebibe. Ebing’wanso ebio bimentwe ase ekeng’wanso ki’ogosambwa gwa kera rituko, na okoruegwa kw’endagera, na okw’ebinyugwa gochikire amo nabirobio.

35Rituko ria gatano na gatato goika mobe nomosangererekano bwatananire ase ogosasima. Timokora emeremo ya kera rituko ase rituko erio.

36Morue eeri eyemo, na emingichi eyemo, ne chimanwa chimingichi isano na ibere, echiakoorire omwaka oyomo, chionsi chibe chitari na kemocho ase emebere yabo. Echi nachibe ekeng’wanso kegosambwa nomorero ase Omonene, kebe ne rimisu rigiya rikomogwenera.

37Mochirue amo nokoruegwa kw’endagera na okw’ebinyugwa gochikire koruegwa amo neeri eria, na emingichi eria, ne chimanwa chimingichi chiria, koreng’ana nomobaro obo. Boigo mochirue koreng’ana nomoroberio ochikire.

38Naende morue egoree eyemo ebe ekeng’wanso ki’ebibe. Ebing’wanso ebio bimentwe ase ekeng’wanso ki’ogosambwa gwa kera rituko, na okoruegwa kw’endagera, na okw’ebinyugwa gochikire amo nabirobio.

39Ebing’wanso ebio amo nokoruegwa okwo goika mobirue ase Omonene ase chingaki chi’Amatuko aino Amanene achorire. Nabirobio bimentwe ase ebing’wanso biaino mwariete chiira ng’a morue, na ebing’wanso bi’ogwancha, onye nebing’wanso bi’ogosambwa, gose okoruegwa kw’endagera, gose okw’ebinyugwa, gose ebing’wanso bi’omorembe.

40Musa agatebia Abaisraeli amang’ana onsi buna Omonene konya amochikire.

← Chapter 28 Jump to: Chapter 30 →