Numbers 31

Gussi (EBIBILIA ENCHENU) 2020

← Chapter 30 Jump to: Chapter 32 →

1Omonene agakwana na Musa, akamotebia.

2“Genda obaruserie Abaisraeli egesiomba ase Abamidiani ase engencho y’ayio abanto abwo babakorerete, erio nyuma yaye aye nokwe, osangererekane amo nabanto bao.”

3Musa agatebia abanto, “Beka ang’e abanto bare ase egati yaino, mobae ebirwanero bagende korwania Abamidiani, erinde bamoruserie Omonene egesiomba.

4Korwa ase kera egesaku ki’Abaisraeli motome abanto elifu eyemo, bagende korwana esegi.”

5Ase ayio korwa ase Abaisraeli chilifu chinyinge bagachora abanto elifu eyemo korwa ase kera egesaku. Abarwani bonsi bachoretwe kogenda korwana esegi nigo baare chilifu ikomi na ibere.

6Musa agatoma abanto aba, elifu eyemo korwa ase kera egesaku, bakagenda korwana esegi. Amo nabarabwo agatoma Finehasi, mosinto o Eleazari omokuani. Ere akaira ebikorero bi’Obomenyo Obochenu na ebirombeta bi’okobugigwa.

7Barabwo bakaumokera Abamidiani, bakabarwania buna Omonene achigete Musa, bagaita kera omonto obo omosacha.

8Amo nabwo baitetwe nigo barenge abaruoti batano b’Abamidiani. Abaruoti abwo nabwo aba: Ebi, na Rekemu, na Suri, na Huri, na Reba. Boigo bagaita na Baalamu, mosinto o Beori nomoro.

9Abaisraeli bakaira abakungu b’Abamidiani amo nabana babo. Boigo bagasakora chiombe ne ching’ondi, na ebinto bionsi bi’Abamidiani.

10Bagasamba emechie ase Abamidiani bamenyete, bagasamba nebitwori biabo bionsi bie chiema.

11Bakaira ebinto bionsi basakorete, bagoosa abanto, bakaira ne chitugo chionsi.

12Erio bakarenta ebinto basakorete, na abanto boosete, ne chitugo, ase Musa na Eleazari omokuani, na ase omoganda bw’Abaisraeli otoorete ase ebirubo ebiomo bia Moabu, agwo ase orooche rwa Yorodan, kororia Yeriko.

13Musa na Eleazari omokuani, na abaraai bonsi b’omoganda bw’abanto, bagasoka korwa ase ebitwori, bakagenda korotota abarwani baria b’esegi.

14Musa akagechigwa nabanene b’abarwani, abatang’ani b’abarwani chilifu, na ab’amagana, baria bairanete korwa ase okorwana esegi,

15akabora, “Inee! Ninki kiaba motaita abakungu?

16Inyora ng’a nabwo baigwerete ogosemia kwa Baalamu, bakagera Abaisraeli tibaba abegenwa ase Omonene, ekero barenge agwo Peori, na ase ayio amaakwa agacha ase egati y’omoganda bw’abanto b’Omonene.

17Ase ayio bono ita kera omwana omomura, na moite kera omokungu obeire nomosacha.

18Korende abaiseke bonsi abekungi timobaisa kobaita, mobaire babe abaino.

19Na bono, onde bwensi ore asemore oitire omonto, na onde bwensi okunire egetondo, goika abeere isiko y’egetwori ase engaki y’amatuko atano na abere. Ase rituko ria gatato, naende ase rituko ria gatano na kabere, mwechene inwe abanyene, amo nabooswa baino.

20Naende mochene kera eanga, na kera egento keroisirie korwa ase amasankwa, gose korwa ase amanya e chimbori, na ebinto bionsi bi’emete.”

21Na Eleazari omokuani agatebia abanto abwo bairanete korwa ase okorwana esegi, “Oyo noro omoroberio Omonene achigete Musa:

22Etahabu, na efeta, na etaai, na ebioma ao ao,

23na ebinto binde bionsi bitanyare gosarigwa nomorero, ebio mobibeke ase omorero ime kobiteema, nabirobio nabicheneke. Nonya naboigo goika mobisibie namache agochena, na kera egento getanyare kobua omorero goika mogeetie ime ase amache ayio.

24Ase rituko ria gatano na kabere mosibie chianga chiaino, nainwe namobe abachenekire; nyuma y’ayio monyare gosoa ase ebitwori.”

25Omonene agakwana na Musa, akamotebia,

26“Aye amo n’Eleazari omokuani na abaraai b’ebisaku bi’omoganda bwonsi, mobare ebinto biasakorwa, na abanto booswa, amo ne chitugo barenta.

27Erio bwatanane ebinto biasakorwa, na abanto booswa amo ne ching’iti ase chinsemo ibere. Ensemo eyemo ebe ey’abarwani b’esegi, na eyende ey’omoganda.

28Korwa ase ensemo eyetungetie abarwani orusie omonto oyomo korwa ase abanto amagana atano aboosetwe abe oyo bw’Omonene. Naboigo orusie eng’iti eyemo korwa ase ching’iti amagana atano ase chiombe, ne chitigere ne ching’ondi ne chimbori, chibe echi’Omonene.

29Abanto abwo baatananwe korwa ase ekeng’ese ekio baegwe Eleazari omokuani, babe ekeegwa ase Omonene, naboigo ne ching’iti chiria.

30Naende korwa ase ekeng’ese egetungetie omoganda bw’Abaisraeli bwatanane omonto oyomo bw’abanto emerongo etano, na eyemo ye chiombe emerongo etano, naboigo ne chitigere, ne ching’ondi, ne chimbori. Abanto abwo amo ne ching’iti echio chionsi oe Abalawi abwo bagokora emeremo ase Obomenyo Obochenu bw’Omonene.”

31Musa na Eleazari omokuani bagakora buna Omonene konya achikire Musa.

32Ebisakorwa ebiatigarete ase abarwani b’esegi, ebi barentete ekero babuete, nabio ebi: ching’ondi, amo ne chimbori, chilifu amagana atano na rimo na emerongo etano na ebere na isano (675,000),

33ne chiombe chilifu emerongo etano na ebere na ibere (72,000),

34ne chitigere chilifu emerongo etano nomo na eyemo (61,000)

35na abaiseke abekungi chilifu emerongo etato; na ibere (32,000).

36Ekeng’ese egiatungetie abarwani b’esegi nigo kiarenge: Ching’ondi amo ne chimbori chilifu amagana atato na emerongo etato na isano na ibere, na amagana atano (337,500).

37Ebango y’Omonene yarusetigwe korwa ase ching’ondi echio, amo ne chimbori, nigo yarenge amagana atano na rimo, na emerongo etano na ebere, na isano (675).

38Chiombe baetwe nigo chiarenge chilifu emerongo etato na isano nemo (36,000), na echi’Omonene nigo chiarenge emerongo etano na ebere, na ibere (72).

39Chitigere baetwe nigo chiarenge chilifu emerongo etato, na amagana atano (30,500), na echi’Omonene nigo chiarenge emerongo etano nomo, na eyemo (61).

40Abaiseke abekungi baetwe nigo barenge chilifu ikomi na isano nemo (16,000) na aba Omonene nigo barenge emerongo etato, na babere (32).

41Musa akaa Eleazari omokuani ensemo eria yaruetwe ase Omonene, buna Omonene konya achikire Musa.

42Ekeng’ese egiatungetie Abaisraeli, ekio Musa arusetie korwa ase abarwani baria b’esegi,

43nigo kiarenge ching’ondi chilifu amagana atato na emerongo etato na isano na ibere, na amagana atano (337,500),

44ne chiombe chilifu emerongo etato na isano nemo (36,000),

45ne chitigere chilifu emerongo etato, na amagana atano (30,500),

46na abanto chilifu ikomi na isano nemo (16,000).

47Korwa ase ekeng’ese egiatungete omoganda bw’Abaisraeli, Musa agaatanana oyomo bw’abanto emerongo etano, na eyemo ye ching’iti emerongo etano, akaa Abalawi baria barenge gokora emeremo ase Obomenyo Obochenu bw’Omonene, buna Omonene konya achikire Musa.

48Erio abanene b’abarwani, abatang’ani b’abarwani chilifu, na ab’amagana, bagacha ase Musa,

49bakamotebia, “Omonene, intwe abasomba bao, twabarire abarwani b’esegi abarenge inse y’oborendi bwaito, na twanyorire ng’a mbonsi bare, onde tasireti korwa asetore.

50Ase ayio twarentire ebinto bie chitahabu bi’ogwechabera: ebitange bi’amaboko, na ebigera, ne chibonyi, na ebigera bi’amato, ne chisonoi. Ebinto ebio twasakorete kera oyomo oito, na bono twabirentire, twabirure ase Omonene, ase ogokora okobwatanigwa asetore ase obosio bwaye.”

51Musa na Eleazari omokuani bakanyora korwa ase abatang’ani abwo chitahabu chiria chiaroisetigwe ebinto bi’ogwechabera.

52Chitahabu chionsi chiaruetwe ase Omonene, chiria abatang’ani baria b’abarwani chilifu na ab’amagana barentete, nigo chiarenge chi’oborito koreng’ana ne chikiro amagana abere.

53Abarwani b’esegi konya basakoire ebinto, na kera oyomo obo konya oirire ebiaye bweka omonyene.

54Musa na Eleazari omokuani bakanyora chitahabu chiria korwa ase abatang’ani b’abarwani chilifu na ab’amagana, bagachiira ime y’Eema y’Omosangererekano, na Abaisraeli bakainyorwa ase obosio bw’Omonene.

← Chapter 30 Jump to: Chapter 32 →