1 Chronicles 12

hadiyya

← Chapter 11 Jump to: Chapter 13 →

1Daawiit adil Saa'ooliinsi gibaa Xiqlaaganne maaxamaa hee'u ammane amma'nnanto'oohii orancham laqqam lobakat gaadaanii matta'a ixxenne maqire mat ikko'o.

2Ixxuwwim Biiniyaam sulliinsetti ikko'i bikkina Saa'oolina qarmanni hee'llo'o; ixxuwwim makki anginnee qeddi anginnee xiyya tokkosseenaa kina yambarishinne huushsheenaa xantam keen hee'llo'o.

3Ixxuwwam Giibi'iinsetti ihu Ishaama'i oos Ahii'eezerii Yoo'aashii awwonsitam hee'llo'o. Ee gaadaa'nnekim summi Aazmaaweet oos Yizi'eel, Pheeleex, Anaatooxxi Baaraakatte, Iyyu'utte, la'amaakkoo gaadaanchi hee'ukkokii lasage odim sadem malaayyaam awwonsaan ikko'i keeniinsi mat hee'u Gaba'oo'n Yushima'i'atte, Gaadeeriinsetti ihoo Yirmaayatte, Yaahiizii'eelatte, Yohanaanatte, Yoozaabaadatte, Harfiinsetti ikko'i Eeli'uuzaayatte, Yaariimootatte, Ba'aalyatte, Shamaariyatte, Shafaaxyatte, Qoraah moolliinsetti ikkam Eelqaanatte, Yushiiyaahu'atte, Azaari'eelatte, Yoo'eezeeratte, Yaashabi'aamatte, Gadooriinsetti ikko'i Yiirohaam oos Yoo'eelattee Zabaadyattee hee'llo'o.

8Daawiit uulli udma'anne yoo girbi woronne hee'u ammane Gaad sulliinsi waatta'a ixxi gogotanne exxito'i orancha erisa laqqam la'anto'oo gaadaa'nnek summi kanniinsi woroon yoohane; ixxuwwim agiraa bagadoo amadda'a qasanchinne la'anto'o keen hee'llo'o; ixxuwwim hobbichchisaa baddissam keenoo duu'n hanenne hee'oo saarokkichchisa barattam keenoo hee'llo'o.

9Summim kanniinsi woroon yoo ixxuwwi daannoo'mmisinne kitaabamaakko; oohim Ezeeratte, Abdiyatte, Eeli'aabatte, Miishmaanatte, Ermiyaasatte, Aataayatte, Eeli'eelatte, Yohaanaanatte, Eelzaabaadattee Ermiyaas Maakbaanaayattee.

14Gaad sulliinsetti ikko'i ka manniinsi hofqaxim shiihalquwwi ikka'a hundiinsi hanaan yo'i ijaajaanoo xibbalaqquwwi ikka'a woroon yo'i ijaajaanoo hee'llo'o.

15Gaad sulliinsetti ikko'i manni mat ammane luxxi agan aagukkisam Yoordaanoos daajji tochchiinsi tochcho afaa aqqaakkoohaannonne ee daajje fitto'o; ee daajjiinsim eelliinchi firinnee eelliinchi aagginnee yoo cebbanne hee'llam hee'llo'i minaadab hundam hollito'o.

16Mat ammane Yihuxxi sulliinsii Biiniyaam sulliinsii hofqax mannim feeranta'a Daawiit hee'oo girba matto'o.

17Daawiitim ixxuwwi kolli hincaa «Kid waattakko'ok besh ikkakka'a iina hara'mmitakkeenatti ihulas eranne; an liiranchinne ki'nnuwwa aa'oommo; neesennem exxehe; ihukkaarem an ki'nnuwwa maham issoo'n i diina'ina eese higissakka'a uwwitakkeenatti ihaakkoolas gaassi niyyanno'i Waa'i ki'nnuwwi sawwite la'aa ki'nnuwwanne oogatona» yukko.

18Waa'i Ayyaanim sadem malaayyaammuwwinam awwonsaanchi ihu Amaasaayanne dillukko. Ixxim «Daawiita, neese ki keeno Issayyi beet Daawiita, neese kiinninnette kiinaa kiina hara'mmitam keeninaa hundinam xummi ihona ki Waa'i kiina hara'mmookko» yaa sagara iimaa'aa laarukko; Daawiitim issuwwa liiranchinne aa'aa lasage ixxi gogoxxi woronne awwonsaan issukko.

19Daawiit Adil Saa'oolinne orameena Filisxee'm manninne maqirem gaadu ammane Minaas sulliinsetti ikko'i hofqax gaadaanim Daawiitinne maqire matto'o; ihukkaarem Filisxee'm mannik awwonsaan «Daawiit neese lagaa gaassi ixxena moollanni hee'u Saa'ool kolli daba'llookko» yita'a baddito'i bikkina aranta'a lasage Xiiqlaaga daba'lloo'isa issito'o.

20Daawiit daba'llu ammane Minaas sulliinsi ixxi kolli matto'i gaadaa'nnek summi Aadinaahatte, Yoozaabeedatte, Yidii'i'eelatte, Miikaa'eelatte, Yoozaabaadatte, Eeliihattee Xiiltaayattee hee'llo'o. Ku keen hundim Minaas uullanne hee'llo'i ammane shaalaqquwwi hee'llo'o.

21Hundim la'anto'oo gaadaan hee'llo'i bikkina gogoxxi woronne o'l awwonsaan ikka'a Daawiitina awwaaddo'o; ee lasage odim Isra'ee'l gogotina hundinam o'l awwonsaan ikko'o.

22Ballina-ballina haareechchi haareechchi manni Daawiit o'l gogotanne exxam hee'u bikkina hofqax ammanenne ixxi gogot lobakata lophphukkuuyyi marukko.

23Daawiit Keebiroonanne hee'u ammane ixxi kolli waatto'i o'l gogoxxek xig duta; Waa'i uwwu neeyyaxxi saga'llisanne Saa'ool beyyonne adil ihona lobakat hara'mmato issito'o; ixxuwwikim xig Yihuxxi sulliinsi agiraa bagadoo lade'llo'o 6,800 gaadaan, Simi'oon sulliinse qoxxallaa malaayyaammuwwaa ikko'i 710 gaadaanii Leewi'i sulliinsi 4,600 mannii Aaroon shumo'i ikko'i Yodaah awwontam hee'llo'i 3,700 manni, la'amaakko o'l manchi hee'u Xadooqina qarmanniinsi lamyii lam gaaxxi awwonsaan.

24Saa'oolina moolli hee'u Biiniyaam sulliinsi 3,000 mannii ihukkaarem Biiniyaam sulliinsi lobakat manni Saa'oolina amma'nnanto'isam hee'llo'o.

25Efreem sulliinsi 20,800 mannaa ihaa ixxuwwi hundi moolli moollinnem la'anto'oo keen hee'llo'o. Eelliinchi aagoo kollinne yoo Minaas sulliinsi 18,000 mannaa ihaa ixxuwwim Daawiita adil issiteena annannannem doo'llanto'i keen hee'llo'o.

26Yisaakoor sulliinsi 200 awwonsaan ikka'a odim ixxuwwi awwonsi woronne yo'i keenom edoohane; ku awwonsaan Isra'ee'l oos maha issimmii hinki ammane maha issimmii hasisooda'e doolle laqqam qoor manni hee'llo'o.

27Zaabiloo'n sulliinsi ma'llantam bee'i orina guddo'o odim ayyi mu'utinnem oranteena xantam 50,000 gaadaanii. Niftaaleem sulliinsi agiraa bagadoo amaddo'oo 37,000 gaadaanoo ikka'a 1,000 gaaxxi awwonsaanom edoohanne. Daan sulliinsi 28, 600 erisa gaado laqqam keenii. Aaseer sulliinsi 40,000 orina guddo'oo gaadaanii hee'llo'o. Yoordaanoosiinsi eelliinchi firinne yo'i Roobeel sulliins, Gaad sulliins, Minaas sulliinsii hinki o'l mu'utinnem awwaaxxiteena xantam 120,000 gaadaanii hee'llo'o.

28Ku orina guddo'oo gaadaan hundim Daawiita Isra'eelanne hundannem adil issiteena murte'lla'a Keebiroona matto'o; mulli gatto'i Isra'ee'l minaadab hundim ee sawwitenne iittanta'a hee'llo'o.

29Ixxuwwim ixxuwwina moolli gudisso'i luwwa liiranchinne ittu'uuyyii aggu'uuyyii Daawiitinne maqirem sas balla higisso'o.

30Hanaa'n qarinne hee'llam Yisaakoor sulliinsi, Zaabiloon sulliinsii Niftaaleem sulliinsii gatoo'n lobakat minaadab Hallanne, Gaameela'anne, Baqullannee Mirgo'uwwannee lobakat hurbaata, qama, oda'i misha, zabiiba, woyi'n diqaasaa wee'l zaytaa iyyiissa'a waatta'a hee'llo'o. Ee'isam durakka'a itakkam laroo gereebbaa amaada'a waatta'a hee'llo'o; mashka'oomim Isra'ee'l minaadab hundim liiranta'a hee'llo'i bikkinatte.

← Chapter 11 Jump to: Chapter 13 →