1 Chronicles 15

hadiyya

← Chapter 14 Jump to: Chapter 16 →

1Daawiit hee'oo minneewwa ixxi gaqqi beero'i ihu Yerusaaleemanne baxukko; Waa'i Hidi'l Saga'l Saaxin hee'oo beyyom gudisaa dukkaana kaasukko.

2Daawiitim ee lasage «Hidi'l Saga'l Saaxina iyyimmi hasisookkok Leewi'i oos xale'e; mashka'oomim Hidi'l Saga'l Saaxina iyyitonaa ixxom awwaaddonaa Waa'i heer heerinam doo'llukkok ixxuwwa» yukko.

3Daawiitim Waa'ika Hidi'l Saga'l Saaxinina gudisu beyyo masseena Isra'ee'l minaadaba hundam Yerusaaleema weeshisukko.

4Ee lasage odim Aaroon shumo'oo Leewi'i oosoo weeshisukko.

5Qa'aat moolliinsi Uri'eel 120 ikkam ixxi moolli mannina awwonsaanchi ihaa waarukko.

6Meeraar moolliinsi Asaay 220 ikkam ixxi moolli mannina awwonsaanchi ihaa waarukko.

7Gershoon moolliinsi yoo'eel 130 ikkam ixxi moolli mannina awwonsaanchi ihaa waarukko.

8Eelixaafaan moolliinsi Shamaa'iy 200 ikkam ixxi moolli mannina awwonsaanchi ihaa waarukko.

9Keebiroon moolliinsi Eelii'eel 80 ikkam ixxi moollina awwonsaanchi ihaa waarukko.

10Uuzii'eel moolliinsi Aminaadaab 112 ikkam ixxi moolli mannina awwonsaanchi ihaa waarukko.

11Daawiit qeessuwwi ikko'i Saadooqa; Abyaataara; ee'isam Leewi'i ooso Uri'eela, Asaaya, Yoo'eela, Shaamaa'iya, Eelii'eelaa Aminaadaabaa lohom dukkaa'n woro weeshisukko.

12Leewi'i oosinam «Oona'a, ki'nnuwwi Leewi'i moollina awwonsaano; Isra'eelina Moollanni ihu Hidi'l Saga'l Saaxina an gudisummi beyyo iyyitakka'a wottakkeena ki'nnuwwi gagaa Leewi'i oos ikko'i ki'nnuwwi qarmannaa hundam keessehe.

13Kanniinsi illageen ki'nnuwwi siidantakka'a Hidi'l Saga'l Saaxina iyyimma hoogimminne seer yoo'isinne ni Waa'a awwaandumbee'i bikkina ni Moollanni Waa'i neese guzumo'aakko» yukko.

14Ee lasage Isra'ee'l Moollanni Waa'ika Hidi'l Saga'l Saaxina wotteena qeessuwwii Leewi'i oosii ixxuwwi gaga keesso'o.

15Waa'i Muse'ennett ihaa ijaaju ijaaccisannem Leewi'i oos ee Saaxina wonnannanne issita'a ixxuwwi gudumonne iyyita'a matto'o.

16Daawiit «Maasiinqo'inne Diitta'innee Doolinnee liiranchi mazmuura zammattamisina ki'nnuwwi abbaayyuwwi ikko'i Leewi'i ooso doo'llehe» yaa Leewi'i oosina awwonsaano ijaajukko.

17Zammaraa'n moolliinsi naas xaa'l doola chilchichilchi'aa'llona yoo'eel beet Heemaannii ixxenam qarmanchi ihu Baraakiy beet Asaafii ee'isam Meeraar moolliinsi Qusaay beet Etaanii doo'llanto'o. Lobakata sagar yoo diitta'a lellitu'uuyyi ixxuwwina hara'mmitona Zakkaariyaasa, Yaa'izii'eela, Shamiiraamoota, Yihii'eela, Unii'a, Eeli'aaba, Maa'iseeyaa Baanaayaa doo'llito'o. Hoffi sagar yoo Diitta'a lellitamisina Maatiitiy Eeliifaal Meqnayii Azaaziyii ee'isam Keesammi Mine egattam egeraa'n lambe'iinsi Oobeedi'eedoomii Yu'ii'eelii doo'llanto'o.

22Kanaanyina mazmuu'llek uwwanchi hee'u bikkina zammaaraan hee'llo'i Leewi'i oosina awwonsaanchi ihaa doo'llamukko.

23Baraakiy Eelqaan Oobeedi'eedoomii Yuhiiyii Hidi'l Saga'l Saaxina egeraan ikka'a doo'llanto'o; qeessuwwi ikko'i Shabaaniy, Yoosaafix, Naatinaa'eel, Amaasaay, Zakaaryaas, Baanaayii Eelii'eezarii Hidi'l Saga'l Saaxi'n illaginne mattu'uuyyi xurumba fugaan ikka'a doo'llanto'o.

25Eehanniinsi lasage Daawiit Isra'ee'l minaadaphphi awwonsaan o'l gogoxxi awwonsaanii Hidi'l Saga'l Saaxina lobakat liiranchinne wotteena Oobeedi'eedom mine matto'o.

26Ee Hidi'l Saga'l Saaxinam iyyitam Leewi'i oosina Waa'i hara'mmoo'isina lamar baa'l moolluwwaa lamar gereebbi ambulluwwaa kitimto'o.

27Daawiit, zammaraan, zammaraa'n awwonsaanchi Hanaanyii Hidi'l Saga'l Saaxina iyyito'i Leewi'i oosii talbi danaam fatirinne dadamaakkoo eddechcha ede'lla'a hee'llo'o. Daawiit annannam Eefuudaa weyyakkaadde'aa hee'ukko.

28Ee'isinne hundem Isra'ee'l minaadabim xaarinnee buudinnee baxamaakkoo xurumba fuggu'uuyyii doola chilchichilchi'aa'llu'uuyyii diitta'aa maasiinqo'oo aphphissu'uuyyii lobakat liiranchinne ilil yitu'uuyyii Hidi'l Saga'l Saaxina kibbita'a Yerusaaleema wotto'o.

29Waa'i Hidi'l Saga'l Saaxinim Daawiit beero'o afaakkoohaannonne Saa'ool landichcho Meelkoole adil Daawiit liiranchinne shimmukkuuyyi maskootinne daaphphita'a moo'lla'a is wodanonne ixxo gaddo'o.

← Chapter 14 Jump to: Chapter 16 →