2 Samuel 21

hadiyya

← Chapter 20 Jump to: Chapter 22 →

1Daawiit adilla'n doollenne sas hiincho hundoomam qoxxaalli sibaar ihukko. Ee bikkina Daawiit ku sibaar mahina ihuda'e Waa'a xa'mmukko. Waa'im «Saa'oolii ixxi abaroosii mannika xiiga dunito'oo bikkinatte; Saa'ool Gaba'oo'n manna guullaakko» yaa dabarukko.

2Ee bikkina adil Gaba'oo'n manna weeshaa atoorassukko. Gaba'oo'n manni Amoore'i manniinsi gatto'oo manni hee'llo'o bagaan Isra'ee'l minaadab hee'llo'oyyo. Isra'ee'l minaadab ixxuwwa nakkinoommoyyo yita'a hide'llo'aarem Saa'ool Isra'ee'l minaadabinaa Yihuxxi minaadabinaa yoo to'achchiinsi ki'ukkok ixxuwwa hundoomam bi'iseena hasaa hee'ukko.

3Daawiitim Gaba'oo'n minaadabina «An ki'nnuwwina maha issoo? Ka Waa'i minaadaba maasse'llakamisina xiiga guulleena maha isso?» yaa xa'mmukko.

4Ixxuwwim «Saa'oolinnee ixxi abaroosinnee niina yoo baad birinnee worqinnee beeddoobee'ane. Neese Isra'ee'l minaadaphpheka matom Shineena xannoommooyyo» yita'a dabatto'o. Daawiitim «Eehannah maha issona hassakkamo?» yaa xa'mmukko.

5Ixxuwwim «Saa'ool neese hundam bi'iseenaa niinniinsi matem manchim Isra'ee'l uullanne mat beyyonnem foorinne hee'oobee'isaa isseena hasaa hee'ukko.

6Ee bikkina Saa'ool shumo'iinsi lamar goona niina higissaa uwwe; neesem ee manna Waa'i doo'llaa adil issu Saa'ool beero'onne Gibi'aa yakkam beyyonne Waa'i illagenne Saqalloommo» yita'a dabatto'o. Adil Daawiitim «Ixxuwwa ki'nnuwwina higisaa uwwoommo» yukko.

7Ihukkaarem Daawiitii Yoonaataanii issena'i issem aaggo'i keesammi hidi'l mashka'i bikkina Daawiit Saa'ool beet hee'u Yoonaataan beet Mafiiboosheeta higisaa uwwukkoyyo.

8Ihona bagaan Daawiit Aya'i landichcho Riisifa Saa'oolina qatto'i lamem goo'n oosom Armooninaa Mafiiboosheetaa massukko. Ee'isam Saa'ool landichcho Meeraabe Mahoolaaniinsetti ihu Baarziilaay beet Adiri'eelina qatto'i ontem goo'n oosom edaa massukko.

9Daawiit ee keen hundam Gaba'oo'n mannina higisaa uwwukko; ixxuwwim Waa'i illagenne duunanne saqallito'o; lamarim mateeyyam leto'o; ixxuwwam shakko'ok hurbaata wixxaa'akkam aga'n aaggannetti hee'ukko.

10Ee lasage Saa'ool bakki meentichchotti hee'llo'i Aya'i landichcho Riisifa oo leeshshuwwi yoo beyyonne yoo geejji kinanne kichchechchi eddechcha biddiqaa'lla'a eehanni lugumonne afuutto'o. Isem hurbaata murakkam aga'n aaggiinsi ki'isaa xeen ga'nneebe'i afeebe'e ee beyyonne afuutto'o. Balli balla ammar afuuroobee'isa hiim, hiimo moochchi itoobee'isa ee leesha egettam hee'llo'o.

11Daawiit Saa'ool bakki meentichcho Riisifa issito'i luwwa macceesu ammanenne

12Gala'aaxxi uullanne yoo Yaabeesh minaadaphphi beyyo maraa Saa'oolikaa ixxi beet Yoonaataanikaa miqe eebukko. Yaabeesh minaadab ee miqe siiddo'ok Filisxee'm manni Saa'oola Giilibo'anne shito'i balla leeshshuwwa Beetishaananne yoo wixxixxi beyyonne saqalakko'i beyyiinsi game'lla'atetti hee'ukko.

13Daawiit Saa'oolikaa Yoonaataanikaa miqe massukko; ee'isam saqalanta'a hee'llo'i lamarem manni leesham wixxaa'ukko.

14Ee lasage Saa'oolikaa Yoonaataanikaa miqe massita'a Biiniyaam uulli Xeelaa'anne Saa'ool anni hee'u Qiis waammanne adi'l ijaajinne waammito'o. Oo hundim ihaa lasage minaadab ixxuwwi uulli bikkina hincaa'llo'i uunxato Waa'i macceesukko.

15Filisxee'mmaannonnee Isra'ee'l minaadaphphaannonnee lambe'enne odim or ki'ukko. Ee bikkina Daawiitii ixxi awwonaanii gaadda'a Filisxee'm manna qasso'o. Ee qasanchaannonne matonne Daawiit hoogaa hee'ukko.

16Sas kilo'oo kolloo kee'mmoo Naasiinsi baxamaakkoo bagado amadaakkoo haareechchi bisa'a lade'aakkoo Raafaayim moollik Yushibiibanoob yakkam mat malaayyaam geed Daawiita sheena hasaa hee'ukko.

17Ihukkaarem Xaruy beet Abiis Daawiita gatiseena ee qoxxaalli Mancho dangonnem shukko. Ee lasage ixxi awwonaan Daawiitina «Isra'ee'l minaadaphphek caakki bi'oobee'isa ka lasage at niinninne maqire gaadina hore'em fittooyyo» yita'a hide'llo'o.

18Ee lasage Gooba yakkam beyyonne Filisxee'm manninne mulli orim ki'ukko. Ee ammanenne Huush uulli Siibakaay Saafa yakkam Raarafaayim moolli malaayyaam geeda shukko.

19Odim Goobanne Filisxee'm manninne mulli orim firukko. Ee ammanenne Beeteelihee'm Yaa'iir beet Eelihaanaan, Gooliyaada yakkam Filisxeemanne Gaata yakkam uulli mancho shukko. Ee manchi bagaxxekim qaalleenchi eddechcha dadakkeena xaaxakkam luwwa laboohan hee'ukko.

20Ee lasage Gaatanne odim or ki'ukko. Ee orannem angannee lokkonnee loh, loh maxxaar ihaa hundoomim lamiyyii soor maxxaarii yoo mat malaayyaam geed hee'ukko. Ixxi qaramukkokim Raafaayi'm shumo'iinsetti hee'ukko.

21Oo manchim Isra'ee'l minaadaba jorisa keenukko. Ihukkaarem ixxo Daawiit abbaayyi Shaama'i beet Yoonaataan shukko.

22Ku soorim Gaat uulli malaayyaam geedduwwi ikka'a Raafaayi'm shumo'iinsetti hee'llo'o. Ihukkaarem Daawiitii ixxi awwaadaanii ee manna shito'o.

← Chapter 20 Jump to: Chapter 22 →