Matthew 5

hadiyya

← Chapter 4 Jump to: Chapter 6 →

1Yesuusim lobakat minaadaba moo'u ammanenne duunanne firaa afuurukko. Ixxi losaanim ixxi kollonne hincito'o.

2Ixxuwwinam kanniinsi woroon yoo losano losisimma asheerukko.

3Yesuus «Hanqo'i wodaninne ixxuwwi gaga heeshaa'llam keen Waa'ik adillan ixxuwwan ihu bikkina maassaammuwwa.

4Kichche'llam keen Waa'i ixxuwwina qoxximma uwwoo bikkina maassaammuwwa.

5Maashaalluwwi keen uulla lago aa'llam bikkina maassaammuwwa.

6Muccurooma mixxam keenii xeebe'llam keenii godditam bikkina maassaammuwwa.

7Mannina haafitam keen Waa'im ixxuwwina haafoo bikkina maassaammuwwa.

8Wodano muccur keen Waa'a moo'llam bikkina maassaammuwwa.

9Manna iittansitam keen Waa'i ooso yamantam bikkina maassaammuwwa.

10Muccuroo'm bikkina hawwo aa'llam keen Waa'ik adillan ixxuwwan ihu bikkina maassaammuwwa.

11I mashka'inne manni ki'nnuwwa game'lloohaare, hawwisoohaaree qophphanonnem jora wocukkuuyyi ki'nnuwwika summa bi'isoohaaree maassaammuwwa.

12Waa'i adillanonne siixxitakkam irifo'i lobakat ihu bikkina liirammehe; lobakat liiranchinnem heellammehe. Mashka'oomim ki'nnuwwiinsi gaassakka'a hiraagaanom hawwisakko'ookko» yukko.

13Odim Yesuus «Manni hundinam ki'nnuwwi sooqixxisa. Ihukkaarem sooqixxek xee'n bi'uta'n hinkid issakka'a xee'oo'isa issakkamo? Biiranne fissakka'a uunjakkamaare manni hancaacamookko bagaan mahinam awwaadooyyo.

14Ki'nnuwwim uullina caakkuwwa. Duu'n hanenne yoo beero'i maaxameena xanooyyo.

15Caakka caakkisaa sanfi woronne dissookkok ayyim bee'e. Ihukkaarem minenne yoo manni hundinam caakkisoo'isina qoffit beyyonne dissakkamo.

16Ee'isam manni ki'nnuwwika er baxo moo'aa iimanenne yoo ki'nnuwwina Anna galaxxoo'isina ki'nnuwwik caakki manni illagenne caakkona» yukko.

17Odim Yesuus «Seeraa hiraagaa'n losishshaa gindeena waarummoka labissakkotte; an guulleena waarummo bagaan gindeena waarummoyyo.

18Hanqinam an ki'nnuwwina kuroommo; iimanii uullii higeebe'i afeebe'e Seer hundim wo'mmookko bagaan Seeriinsi winxo'im te'im tako'im bi'ooyyo.

19Ee bikkina ka ijaacceka hundiinsi hoffe'ookkoka matichchom gindookkokii mulli keeninam losisookkokii Waa'i adillanonne hoffan ihookko. Ihukkaarem ijaajo hundam wonshookkokii mulli keeninam losisookkokii Waa'i adillanonne loban ihookko.

20Ki'nnuwwik er bax Seera losisaa'nnaanniinsii Farisaawe'uwwaanniinsii lophphubeelas Waa'i adillano hore'em aaggakkamoyyo» yukko.

21Odim Yesuus «Gaassi doollenne hee'u mannina ‹Shititte, shookkok ayyim oogatamookko› yukkisa macceessakko'ookko.

22Ihukkaarem an ki'nnuwwina kuroommo; ixxi abbaayyonne kora'am quuqoohaannonne ayyennem oogatamookko. Ixxi abbaayyo game'llookkok ayyim lommanni dummichchanne oogatamookko. Odim ixxi abbaayyo ‹Ka awwaad bee'i gawwa!› yaa game'llookkok ayyim gaanna'm giirinne oogatamookko.

23Ee bikkina at Waa'ina kitima hincaa'lloo ammane kiyyabbaayyo hawwodditti luwwi yoo'isa tiittilas

24Waa'ina kitim issitaa uwwiteena eebbittoka ee beyyonnem uttaa gaassitaa ee kiyyabbaayyinne iittame. Ee lasage waattaa Waa'ina kitima hincaa'e.

25Keese kasasu ki masokkichchinne maqire oogaxxi mine mattittuuyyi googonne hee'llittuuyyim ixxenne iittame. Ee'isamdu issitbeelas ki masokkichchi keese daannuwwina higisaa uwwookko; daannuwwim fooliisina higisaa uwwoohaare karaxxi minenne aaggootto.

26Hanqinam an kiina kuroommo; guzumo'ika lasaanchi saantiba guullitaa miqqeebe'e ee karaxxi miniinsi fittooyyo» yukko.

27Odim Yesuus « ‹Saa'llitte› yamamukkisa macceessakko'ookko.

28Ihukkaarem an ki'nnuwwina kuroommo; mat meentichcho moo'aa mixookkok hundim ee ammane ixxi wodanonne isenne saa'aakko.

29Ee bikkina kiikki makki illi baaxiilina mashka'i ihulas fissitaa uunje. Mashka'oomim ki orachchi hundim xoo'oobee'i giiranne darabamoohaanniinsi ki orachchika matooma hooggittaare e'llookko.

30Kiikki makki angi baaxiilina mashka'i ihulas muttaa uunje. Mashka'oomim ki orachchi hundim xoo'oobee'i giiranne aagoohaanniinsi ki orachchika matooma hooggita'n kiina e'llookko» yukko.

31Odim Yesuus « ‹Ixxi meentichcho hollookkok ayyim furma uwwona› yamamaakko.

32Ihukkaarem an ki'nnuwwina kuroommo; saa'immi mashka'innette ihoo'n ixxi mi'n ama hollookkok ayyim ise saa'aanchotte issookko. Hollanto'i meentichcho eebookkokim saa'aancho» yukko.

33Odim Yesuus «Gaassi doollenne hee'u mannina ‹ «Waa'ina uwwoommo» yitaa hide'llitti sagara wonshe bagaan woccitti sagara gindititte› yamamukkisa macceessakko'ookko.

34Ihukkaarem an ki'nnuwwina kuroommo; hore'em hide'llakkotte. Iimanennem hide'llakkotte; mashka'oomim iiman Waa'ina adilla'n barcuma.

35Uullannem ihukkaare hide'llakkotte; mashka'oomim Waa'ik lokki hancaacoohane. Yerusaaleemannem ihukkaare hide'llakkotte; mashka'oomim Yerusaaleem lob adi'l beero'o.

36Ki gagannem hide'llitte; mashka'oomim ki horoo'l saraaxxeka matom qadaallisseena te'im heemachchisseena xantooyyo.

37Ee bikkina hanqi ihulas ‹hanqa› yi'llehe. Qophphan ihulas ‹qophphano› yi'llehe. Eehanniinsi lophphookkok joriinsette» yukko.

38Odim Yesuus «Illi bikkina ille; inqi bikkinam inqe» yamamukkisa macceessakko'ookko.

39Ihukkaarem an ki'nnuwwina kuroommo; ki'nnuwwina jora issoo manchina jora issitakkotte. Ihukkaarem makki kolli xabano aphphisoohaannina odim qeddi kolli xabanom uwwe.

40Mat manchi ki shamiisa masseena hasaa kasasulas ki kootam eddaa uwwe.

41Mat manchi « ‹Iinninne maqire hofqax googo mallona› yaa ijaajuta'n ixxi yukkaanniinsi lam suume eddaa mare.

42Mat manchi kiinniinsi mat luwwa uunxulas uwwe. Liqaayyo aa'eena hasoohaanninam hoottitte» yukko.

43Odim Yesuus « ‹Ki beshichcho iitte; ki masokkichchom sabe› yamamukkisa macceessakko'ookko.

44Ihukkaarem an ki'nnuwwina kuroommo; ki'nnuwwi maso'o iittehe. Ki'nnuwwa hawwisoo keeninam Waa'a uunxehe.

45Ee'isa issitakko'aare iimanenne yoo ki'nnuwwi Annina oos ikkakko'isa moo'issakkamo. Mashka'oomim ixxi jora issoo keeninaa eroka issoo keeninaa ixxeka eelliincho fissookko. Ee'isam xummaaninaa baaxiilaaninaa xeena ga'nnisookko.

46Ki'nnuwwa iittoo keeno iittitakko'aare Waa'iinsi maha siiddakkamo? Ee'isa'i qaraxaanim issitamuullayyonnihe?

47Ki'nnuwwika abbaayyuwwi xale'e xummaatissakko'aare mulli keeniinsi mahinne e'llitakkamo? Ee'isa'i Waa'a laqqambee'i minaadabim issitamuullayyonnihe?

48Ee bikkina iimanenne yoo ki'nnuwwik anni muccur ihukkisam ki'nnuwwim mucculluwwi ikkehe» yukko.

← Chapter 4 Jump to: Chapter 6 →