2 Thessalonians 1

Ilonggo (Maayong Balita nga Biblia (2012))

Jump to: Chapter 2 →

1Ako si Pablo, kaupod kay Silas, kag kay Timoteo, nagasulat sa mga katapo sang iglesia sa Tesalonica, nga iya sang Dios nga aton Amay kag ni Ginoong Jesu-Cristo:

2Kabay nga ang Dios nga aton Amay kag ang Ginoong Jesu-Cristo maghatag sa inyo sing pagpakamaayo kag paghidait.

3Mga kautoran, dapat kami magpasalamat sa Dios sa tanan nga tion tungod sa inyo. Nagakabagay gid nga himuon namon ini, tungod kay ang inyo pagtuo nagatubo nga mapag-on kag ang inyo gugma sa isa kag isa nagadugang.

4Tungod sini nagapabugal gid kami nahanungod sa inyo sa mga iglesia sang Dios. Ginapabugal namon ang inyo pagpadayon sa pagbatas kag pagtuo, sa tunga sang tanan nga mga paghingabot kag mga pag-antos nga inyo ginaagihan.

5Amo ini ang pagpamatuod sang matarong nga paghukom sang Dios, kay tungod sini tanan mangintakos kamo sa iya Ginharian, nga amo ang kabangdanan sang inyo pag-antos.

6Kay pagahimuon sang Dios ang matarong: sia magapaantos sa mga nagapaantos sa inyo,

7kag sia magahatag sing kapahuwayan sa inyo nga nagaantos, kag sa amon man. Pagahimuon niya ini sa pag-abot ni Ginoong Jesus halin sa langit upod sa iya gamhanan nga mga anghel,

8nga may nagadabdab nga kalayo, sa pagsilot sa mga nagasikway sa Dios kag sa mga wala nagatuman sang Maayong Balita nahanungod sa aton Ginoong Jesus.

9Magaantos sila sang silot sang walay katapusan nga kalaglagan, nga nahamulag sa presensya sang Ginoo kag sa iya makatilingala nga gahom,

10kon mag-abot sia sa sadto nga Adlaw agod nga dayawon sang tanan niya nga mga katawhan kag pasidunggan sang tanan nga nagatuo. Kamo man manginkaupod nila, tungod kay nagtuo kamo sang pulong sang Dios nga amon ginwali sa inyo.

11Tungod sini nagapangamuyo kami sa gihapon para sa inyo. Ginapangayo namon sa aton Dios nga nagtawag sa inyo sa sini nga pagkabuhi nga himuon niya nga mangintakos kamo sini. Kabay nga sa iya gahom, iya tumanon ang inyo handom sa paghimo sing maayo kag mahimpit ang inyo buhat sang pagtuo.

12Sa sini nga paagi ang ngalan sang aton Ginoong Jesus pasidunggan ninyo, kag kamo pasidunggan niya, paagi sa kaayo sang aton Dios kag ni Ginoong Jesu-Cristo.

Jump to: Chapter 2 →