2 Thessalonians 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Nahanungod sang pag-abot sang aton Ginoong Jesu-Cristo kag sang pagtipon sa aton sing tingob sa pag-upod sa iya: nagapakitluoy ako sa inyo, mga kautoran,

2nga indi kamo dayon magsalangisag sa inyo mga panghunahuna ukon magkatublag sa mga nagasiling nga ang Adlaw sang Ginoo nag-abot na. Ayhan may nagtagna ukon nagwali sini, ukon may nagsiling nga kami ang nagsulat sini.

3Indi ninyo pagtugoti nga pagadayaan kamo ni bisan sin-o sa bisan ano nga paagi. Kay ina nga Adlaw indi mag-abot tubtob mahanabo ang katapusan nga Pagribok, kag magapakita ang Isa nga Malaut nga natalana na sa impierno.

4Sia magakontra sang tanan nga ginasimba sang mga tawo, kag sang tanan nga ginakabig sang mga tawo nga dios. Sia magapakataas sang iya kaugalingon sa ila tanan kag magasulod pa gani sia kag magapungko sa Templo sang Dios kag magasiling nga sia Dios!

5Wala bala kamo makadumdom? Ginsugiran ko kamo sini tanan sang ako kaupod pa ninyo.

6Ugaling may yara nga nagapugong nga indi ini mahanabo karon, kag nahibaluan ninyo kon ano ini. Gani, sa nagakaigo nga tion, ang Isa nga Malaut magapakita.

7Ang Misteryoso nga Kalautan nagapanghikot na, pero ang dapat mahanabo indi pa mahanabo tubtob nga ang nagapugong sini pagakuhaon.

8Dayon ang Isa nga Malaut igapahayag, pero si Ginoong Jesus sa iya pag-abot magapatay sa iya paagi sa isa ka huyop kag pagalaglagon sia paagi sa makasililaw nga pagpakita ni Ginoong Jesus.

9Ang Isa nga Malaut magaabot nga may gahom ni Satanas kag magahimo sang tanan nga sahi sang di-matuod nga mga milagro, kag butig nga mga tanda,

10kag magagamit sang tanan nga sahi sang kalautan sa pagdaya sa mga katawhan nga indi maluwas. Malaglag sila, tungod kay wala nila ginbaton kag ginhigugma ang kamatuoran agod nga maluwas sila.

11Sa sini nga kabangdanan ang Dios nagapadala sa ila sing gahom nga nagapatalang agod magtuo sila sa kabutigan.

12Gani ang tanan nga wala magtuo sa kamatuoran, sa baylo nagkalipay sa sala, pagakondenahon.

13Mga kautoran, dapat kami magpasalamat sa Dios sa tanan nga tion tungod sa inyo, kamo nga ginahigugma sang Ginoo. Kay ang Dios nagpili sa inyo nga manginnahauna nga maluwas paagi sa gahom sang Espiritu agod manginbalaan niya kamo nga mga tawo, kag maluwas kamo paagi sa inyo pagtuo sa kamatuoran.

14Sa sini gintawag kamo sang Dios paagi sa Maayong Balita nga amon ginwali sa inyo. Gintawag niya kamo agod makaambit kamo sang himaya sang aton Ginoong Jesu-Cristo.

15Gani, mga kautoran, magpakalig-on kamo kag hupti ninyo ang mga kamatuoran nga amon gintudlo sa inyo, sa amon pagwali kag sa amon sulat.

16Kabay nga ang aton gid Ginoong Jesu-Cristo, kag ang Dios nga aton Amay, nga sa iya kaayo naghigugma kag naghatag sa aton sang walay katapusan nga paglipay kag mapag-on nga paglaom,

17magpuno sang inyo mga tagipusoon sing kaisog kag magpalig-on sa inyo sa paghimo sa gihapon kag sa paghambal sang tanan nga maayo.

← Chapter 1 Jump to: Chapter 3 →