2 Timothy 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Karon ikaw, anak ko, magpakalig-on ka tungod sang kaayo ni Cristo Jesus sa aton paagi sa paghiusa naton sa iya.

2Ang pagtulon-an nga imo nabatian sa akon pagwali sa atubang sang madamo nga mga saksi, itugyan mo sa mga tawo nga imo masaligan, nga sarang man makapanudlo sa iban.

3Magpakigbahin ka sa pag-antos subong isa ka matutom nga soldado ni Cristo Jesus.

4Ang soldado nga yara sa serbisyo luyag maglipay sa iya opisyal. Gani wala sia nagaentra sa iban pa nga palangitan-an.

5Ang isa ka humalampang sa palumba indi makadaog sing padya, kon wala sia nagatuman sang tanan nga mga pagsulondan.

6Ang nahauna nga bahin sang patubas dapat mangin-iya sang mangungoma nga nagpangabudlay sing tudotudo.

7Hunahunaa ang akon ginasiling, tungod kay ang Ginoo magabulig sa imo sa paghangop sang tanan nga mga butang.

8Dumdoma si Jesu-Cristo nga kaliwat ni David, nga ginbanhaw suno sa akon ginawali nga Maayong Balita.

9Tungod kay ginawali ko ang Maayong Balita, nagaantos ako kag ginkadenahan pa gani nga daw isa ka kriminal. Pero ang pulong sang Dios indi makadenahan,

10kag tungod sini ginabatas ko ang tanan para lamang sa pinili nga katawhan sang Dios, agod nga ila man maagom ang kaluwasan nga nagadala sang kabuhi nga walay katapusan upod sa Dios, paagi kay Cristo Jesus.

11Matuod ini nga pulolungon: “Kon napatay kita upod kay Cristo, magakabuhi man kita upod sa iya.

12Kon nagapadayon kita sa pagbatas, magagahom man kita upod sa iya. Kon ginapanghiwala naton sia, sia man magapanghiwala sa aton.

13Kon kita aton indi matutom, sia iya matutom man gihapon, tungod kay sia matutom sa pagtuman sang iya ginsaad.”

14Ipahanumdom ini sa imo mga katapo kag paandami sila sa presensya sang Dios, nga indi sila magsinuay nahanungod sa mga pulong. Wala ini sing pulos kag nagapalain lamang sang mga tawo nga nagapalamati.

15Magtinguha ka nga mahamut-an sa panulok sang Dios, subong isa ka alagad ni Cristo nga wala nagakahuya sang iya ginahimo, kundi nagatudlo sing husto sang mga pulong sang kamatuoran sang Dios.

16Likawi ang di-diosnon kag binuang nga mga pagsinuay nga nagapahilayo lang sang mga tawo sa Dios.

17Ang ila ginatudlo kaangay sang bakukang nga nagauk-ok sang unod. Ang duha sining mga manunodlo amo si Himeneo kag si Fileto.

18Ginbayaan nila ang dalan sang kamatuoran kag karon ginatublag nila ang pagtuo sang iban nga mga tumoluo paagi sa ila pagsiling nga ang aton pagkabanhaw nahanabo na.

19Pero ang malig-on nga sadsaran nga ginpasad sang Dios indi gid malingkang, kag amo ini ang nasulat sa sadsaran: “Nakilala sang Ginoo kon sin-o ang iya katawhan,” kag “Ang bisan sin-o nga nagasiling nga sia iya sang Ginoo dapat magbiya sang kalautan.”

20Sa isa ka daku nga balay yara ang tanan nga sahi sang mga sulodlan: ang iban sini nahimo sa bulawan kag pilak, kag ang iban nahimo sa kahoy kag lunang; ang iban ginagamit sa pinasahi nga mga pagtinipuntipon kag ang iban ginagamit adlaw-adlaw.

21Ang bisan sin-o nga nagapaninlo sang iya kaugalingon sa sining malaut nga mga butang, pagagamiton sia sa pinasahi nga mga tinutuyo, tungod kay nahalad sia, mapuslanon sa iya Agalon, kag handa nga gamiton sa tagsa ka maayo nga buhat.

22Likawi ang mga kailigbon sang pagkapamatan-on, kag tinguhai ang pag-angkon sang pagkamatarong, pagtuo, paghigugma kag paghidait, upod sa ila nga may matinlo nga tagipusoon nga nagapangayo sing bulig sa Ginoo.

23Pero, palayo ka sa binuang kag wala pulos nga mga pagbinais. Nakahibalo ka gid nga ang padulongan sini amo ang mga pag-inaway.

24Ang alagad sang Ginoo indi dapat magpangaway. Kinahanglan nga maayo sia sa tanan, isa ka maayo kag mapinasensyahon nga manunodlo,

25nga malulo sa iya pagtadlong sa iya mga kasumpong. Basi pa lang nga hatagan sila sang Dios sing kahigayunan sa paghinulsol kag sa pagkilala sang kamatuoran.

26Ti, kundi makatalupangod sila kag makapalagyo sa siod sang Yawa nga nagdakop sa ila kag nagpatuman sa ila sang iya kabubot-on.

← Chapter 1 Jump to: Chapter 3 →