2 Timothy 4

Ilonggo (Maayong Balita nga Biblia (2012))

← Chapter 3 Jump to:

1Sa atubang sang Dios kag ni Cristo Jesus nga magahukom sang tanan nga mga tawo nga buhi kag patay, kag tungod sang iya pag-abot sa paggahom subong Hari, ginamanduan ko ikaw

2sa pagwali sang pulong sang Dios. Magmaukod ka sa pagsugid sini sa nagakaigo ukon sa wala nagakaigo nga tion. Hayloha ang mga tawo, sawaya, kag palig-una sila sa imo pagpanudlo nga may bug-os nga pagpasensya.

3Kay magaabot ang tion nga ang mga tawo indi na magpamati sa matuod nga pagtulon-an, kundi magasunod sang ila kaugalingon nga luyag, kag magatipon sila sang madamo pa gid nga mga manunodlo nga magasugid sa ila sang mga butang nga luyag lang nila pamatian.

4Magabiya sila sa pagpamati sang kamatuoran kag magapati sila sa mga patupato nga sugilanon.

5Pero ikaw imo, magpugong sang imo kaugalingon sa tanan nga mga bagay, magbatas sang pag-antos, magtuman sang bulohaton sang manugwali sang Maayong Balita kag maghimo sang tanan mo nga mga katungdanan subong isa ka alagad sang Dios.

6Kon nahanungod sa akon, ang tion nag-abot nga ako ihalad na, kag tion na ini nga magataliwan ako sa sini nga kabuhi.

7Nahimo ko na ang akon masarangan sa palumba, nadalagan ko na ang bug-os nga dalaganon kag natipigan ko ang pagtuo.

8Karon, nagahulat sa akon ang padya sang pagdaog nga amo ang korona sang pagkamatarong nga ihatag sa akon sang Ginoo, ang matarong nga Hukom, sa sadto nga Adlaw—kag indi lamang sa akon, kundi sa tanan man nga nagahulat nga may paghigugma sang iya pagpahayag.

9Magtinguha ka gid sa pagpakigkita sa akon sa gilayon.

10Kay si Demas naghigugma sini nga kalibutan kag ginbayaan niya ako. Nagkadto sia sa Tesalonica. Si Crescente nagkadto sa Galacia kag si Tito sa Dalmacia.

11Si Lucas lamang ang kaupod nakon diri. Dalha diri upod sa imo si Marcos, tungod kay makabulig gid sia sa akon mga bulohaton.

12Ginpakadto ko si Tiquico sa Efeso.

13Kon magkadto ka diri, dalha ang akon kunop nga ginbilin ko sa Troas kay Carpo. Dalha man ang mga libro, ilabi na ang mga nahimo sa panit.

14Si Alejandro nga platero naghalit gid sa akon. Ang Ginoo magabalos sa iya suno sa iya ginhimo.

15Mag-andam ka sa iya, tungod kay tama gid ang iya pagpamatok sa amon gintudlo.

16Wala gid sing may nag-unong sa akon sa nahauna ko nga pagpangapin sang akon kaugalingon. Tanan sila nagbiya sa akon. Kabay nga indi ini pag-isipon sang Dios batok sa ila!

17Pero ang Ginoo nag-upod sa akon kag iya ako ginhatagan sing kusog, sa bagay nga nawali ko ang bug-os nga mensahe sang Dios agod makabati ang tanan nga mga Hentil, kag ginluwas ako sa kamatayon.

18Ang Ginoo magaluwas sa akon sa tanan nga kalautan, kag iya ako dalhon nga indi maano didto sa iya langitnon nga Ginharian. Sa iya ang kadayawan sa wala sing katapusan! Kabay pa.

19Ginaabiabi ko si Priscila kag si Aquila kag ang panimalay ni Onesiforo.

20Si Erasto nagpabilin sa Corinto, kag ginbilin ko si Trofimo sa Mileto, tungod kay nagmasakit sia.

21Magtinguha ka sa pag-abot sa wala pa ang tigtulognaw. Ginaabiabi ka ni Eubulo, ni Pudente, ni Lino kag ni Claudia. Ginaabiabi ka man sang tanan nga mga kautoran.

22Ang Ginoo manginyara sa imo espiritu. Ang pagpakamaayo sang Dios manginyara sa inyo tanan.

← Chapter 3 Jump to: