Haggai 1

Ilonggo (Maayong Balita nga Biblia (2012))

Jump to: Chapter 2 →

1Sa ikaduha nga tuig nga si Dario amo ang hari sang Persia, sa nahauna nga adlaw sang ikan-om nga bulan, ang Ginoo naghambal paagi kay Hageo nga propeta. Ang mensahe para sa gobernador sang Juda nga si Zorobabel nga anak ni Sealtiel kag sa Pinakamataas nga Pari nga si Josue nga anak ni Josadac.

2Ang Ginoo sang mga hangaway nagsiling kay Hageo, “Ini nga mga tawo nagasiling nga indi pa ini ang tion sa pagpatindog liwat sang Templo.”

3Gani ang Ginoo naghatag sini nga mensahe sa mga tawo paagi kay Hageo nga propeta:

4“Mga tawo ko, ngaa bala mag-estar kamo sa matahom nga mga balay, samtang ang akon Templo nagapabilin nga guba?

5Tan-awa bala ang nagakahanabo sa inyo!

6Nagsab-og kamo sing madamo nga trigo, pero diutay ang inyo naani. May kalan-on kamo, pero hawuthawot. May bino kamo, pero kulangkulang! May bayu kamo, pero indi ini tuman nga makahapin sa inyo sa tugnaw. Kag ang mga mamumogon indi mabuhi sa ila suhol.

7Wala bala kamo makahangop kon ngaa ini nagakahanabo sa inyo?

8Karon magtaklad kamo sa mga bukid sa pagkuha sing kahoy. Patinduga ninyo liwat ang Templo, kag dayon malipay ako kag pagasimbahon suno sa nagakabagay.

9“Nagalaom kamo sing madamo nga patubas, pero diutay lang ang inyo makuha. Kag sang dalhon ninyo pauli ang inyo patubas, ginhuyop ko ini palayo. Ngaa bala ginhimo ko ini? Tungod kay ang akon Templo nagapabilin nga guba, samtang ang tagsatagsa sa inyo masako sa pagpatindog sang iya kaugalingon nga balay.

10Amo ini ang kabangdanan nga wala sing ulan, kag wala sing tanom nga nagatubo.

11Ginpadala ko ang tingadlaw sa duta—sa mga bakulod, sa mga uma sang trigo, sa mga talamnan sing ubas, kag sa mga katamnan sang olivo—sa tagsa ka tanom nga ginapatubas sang duta, sa mga tawo kag mga sapat, kag sa tanan ninyo nga mga tanom.”

12Dayon si Zorobabel kag si Josue kag ang tanan nga mga tawo nga nagbalik gikan sa pagkabihag sa Babilonia, nagtuman sang ginsiling sang Ginoo nga ila Dios. Nahadlok sila, kag gintuman nila si Hageo nga propeta nga ginpadala sang Ginoo.

13Dayon si Hageo naghatag sang mensahe sang Ginoo sa mga tawo: “Ako magaupod sa inyo, amo ini ang akon saad.”

14Ang Ginoo nagpakunyag sa tagsatagsa sa pag-obra sa Templo: si Zorobabel nga gobernador sang Juda, si Josue nga Pinakamataas nga Pari, kag ang tanan nga mga tawo nga nagbalik gikan sa pagkabihag. Nagsugod sila sa pag-obra sa Templo sang Ginoo sang mga hangaway,

15sang ika-24 nga adlaw sang ikan-om nga bulan sang ikaduha nga tuig nga si Dario amo ang hari.

Jump to: Chapter 2 →