Haggai 2

Ilonggo (Maayong Balita nga Biblia (2012))

← Chapter 1 Jump to:

1Sa ika-21 nga adlaw sang ikapito nga bulan sang amo nga tuig, ang Ginoo naghambal liwat paagi kay Hageo nga propeta.

2Ginsingganan niya si Hageo sa paghambal kay Zorobabel nga gobernador sang Juda, kay Josue nga Pinakamataas nga Pari, kag sa mga tawo. Amo ini ang isiling niya sa ila,

3“May yara bala sa inyo nga makadumdom pa kon daw ano ka katahom sang Templo sang una? Ano bala ang pagtan-aw ninyo sini karon? Daw wala na gid ini sing pulos.

4Pero indi magpakaluya ang bisan sin-o sa inyo. Padayuna ninyo ang pag-obra, kay ako kaupod ninyo.

5Sang paggwa ninyo sa Ehipto, nagsaad ako nga indi ako magbiya sa inyo. Ang akon Espiritu kaupod ninyo sa gihapon, gani indi kamo magkahadlok.

6“Sa indi madugay uyogon ko ang langit kag ang kalibutan, ang duta kag ang dagat.

7Uyogon ko ang tanan nga mga pungsod, kag ang ila mga manggad pagadalhon diri kag pun-on ang Templo sang manggad.

8Ang tanan nga pilak kag bulawan sang kalibutan akon.

9Ang bag-o nga Templo magamahimayaon pa sang sa daan. Kag didto hatagan ko ang akon mga tawo sing kauswagan kag kalinong.” Ang Ginoo sang mga hangaway naghambal sini.

10Sa ika-24 nga adlaw sang ikasiyam nga bulan sang ikaduha nga tuig nga si Dario amo ang hari, ang Ginoo sang mga hangaway naghambal liwat kay Hageo nga propeta.

11Nagsiling sia, “Pamangkuta ang mga pari kon ano ang ginasiling sang kasugoan nahanungod sini:

12Abi kon may magkuha sing karne gikan sa halad, kag ginputos niya ini sa sidsid sang iya bayu, dayon kon ang iya bayu makatandog sang tinapay, ukon luto nga pagkaon, ukon bino, ukon lana sang olivo, ukon sang bisan ano nga sahi sang pagkaon, magapakabalaan bala ini sina nga pagkaon?” Sang ginpamangkot ini sa mga pari, nagsabat sila, “Indi.”

13Dayon si Hageo nagpamangkot, “Abi ang isa ka tawo madagtaan tungod kay nakatandog sia sang patay, dayon kon makatandog sia sini nga mga pagkaon madagtaan man bala ini nga mga pagkaon?” Ang mga pari nagsabat, “Huo.”

14Dayon si Hageo nagsiling, “Ang Ginoo nagasiling nga amo man ini sa mga tawo sini nga pungsod, kag sa tanan nga ila ginapatubas, gani ang tanan nga ila ginahalad sa altar nadagtaan.”

15Ang Ginoo nagasiling, “Patugsilingi bala ninyo sing maayo ang nahanabo sa inyo. Sang wala pa kamo magsugod sa pagpatindog liwat sang Templo,

16nagakadto kamo sa tinumpukan sang trigo nga nagapaabot sing baynte ka sako, pero napulo lang ang inyo makuha. Nagakadto kamo sa pagkuha sing singkwenta ka galon nga bino sa sulodlan sini, pero baynte lang ang inyo makuha.

17Nagpadala ako sing mainit nga hangin kag yelo nga daw bato sa paghalit sang tanan ninyo nga mga tanom, pero wala gid kamo maghinulsol.

18Karon sa sining ika-24 nga adlaw sang ikasiyam nga bulan nga ang sadsaran sang Templo natapos na, patugsilingi bala sing maayo ang nahanabo sa inyo.

19Wala na sing trigo nga nabilin, kag ang mga ubas, mga higos, mga granada, kag mga olivo wala pa nagapatubas. Pero sugod karon bendisyunan ko kamo.”

20Sa amo nga adlaw, sa ika-24 sang bulan, ang Ginoo naghatag kay Hageo sang ikaduha nga mensahe nga nagasiling,

21“Singgana si Zorobabel nga gobernador sang Juda: Sa indi madugay uyogon ko ang langit kag ang duta.

22Laglagon ko ang mga ginharian kag tapuson ko ang ila gahom. Pabaliskaron ko ang mga karwahi kag ang mga nagasakay sini. Ang mga kabayo magakalamatay, kag ang mga nagasakay sa ila magapatyanay.

23Zorobabel nga akon alagad, sa sadto nga adlaw, sa akon ngalan pilion ko ikaw sa paggahom. Ikaw ang akon ginpili.” Ang Ginoo sang mga hangaway naghambal sini.

← Chapter 1 Jump to: