Joel 1

Ilonggo (Maayong Balita nga Biblia (2012))

Jump to: Chapter 2 →

1Amo ini ang ginsiling sang Ginoo kay Joel, ang anak nga lalaki ni Petuel.

2Magpamati, kamo nga mga gulang na, kag subong man ang tanan nga mga pumoluyo sa Juda, magpamati. May nahanabo na bala nga kaangay sini sa inyo panahon, ukon sa panahon sang inyo mga katigulangan?

3Sugiri ang inyo mga kaanakan nahanungod sini, kag ila sugiran ang ila mga kaanakan, kag ini sila magasugid man sini sa madason nga kaliwatan.

4Ang iban nga mga tanom ginkaon sang dalagku nga mga apan, dayon ang ginbilin sang mga apan gin-urot gid sang nagadulom nga mga lukso.

5Pagbulogtaw kamo kag maghinibi, kamo nga mga palahubog. Magtangis kamo, kamo nga mga palainom sang bino, kay ang mga ubas nga hilimuon nga bag-o nga bino nagkalapierde.

6Isa ka panong sang mga apan nagsalakay sang aton duta, gamhanan sila kag indi maisip, ang ila mga ngipon matalom kaangay sang mga ngipon sang leon.

7Ginpamierde nila ang mga balagon sang aton ubas, kag ginpangkitkit nila ang aton mga kahoy nga higera. Ginkaon nila ang tanan nga mga panit sini, sa bagay nga nagputi ang iya mga sanga.

8Magtangis, kamo nga mga tawo, subong sang isa ka dalaga nga nagapangalisod tungod sang pagkapatay sang iya palamanahon.

9Wala na sing trigo ukon bino nga ihalad sa Templo. Ang mga pari nagapangasubo tungod kay wala na sila sing ihalad nga mga dulot sa Ginoo.

10Ang mga talamnan wala sing tanom, ang duta nagapangasubo tungod kay nalaglag ang mga trigo, nalaya ang mga ubas, kag nalayong ang mga kahoy nga olivo.

11Magkasubo, kamo nga mga mangungoma, magtangis, kamo nga nagatatap sang talamnan sang ubas, tungod kay ang trigo, kag ang sebada, kag ang tanan nga mga patubas nagkalapierde.

12Nalaya ang mga balagon sang ubas, kag nalayong ang mga kahoy nga higera. Ang mga kahoy nga granada, mga palma, kag mga mansanas, ang tanan nga mga kahoy sa talamnan nalaya. Subong man nadulaan sing kalipay ang mga tawo.

13Kamo nga mga pari nga nagadulot sing mga halad sa altar sang Ginoo, magsuksok kamo sing mga bayu sa paglalaw kag maghibi! Sulod kamo sa Templo kag magpabilin didto nga nagalalaw tubtob sa aga! Wala sing trigo ukon bino nga ihalad sa balay sang inyo Dios.

14Magmando kamo nga magpuasa, tawga ang katilingban sa pagsimba! Tipuna ang mga pangulo kag ang tanan nga mga tawo sang Juda sa Templo sang Ginoo nga inyo Dios, kag magpanawag kamo sa iya!

15Madali na lang ang adlaw sang Ginoo, magadala ini sang kalaglagan gikan sa Makagagahom. Daw ano ka makakulogmat ina nga adlaw!

16Nakita gid naton ang pagkapierde sang aton mga patubas. Wala sing kalipay sa Templo sang aton Dios.

17Ang mga binhi nagkalamatay sa kigas nga duta. Wala sing patubas nga ibutang sa bodega, gani nagkalaguba ang mga bodega nga wala sing unod.

18Daw ano kagahod sang gutom nga mga kasapatan! Nagadalangdalang ang mga manara sang mga baka, tungod kay wala sing halalban para sa ila. Nagaantos man ang panong sang mga karnero.

19Nagapanawag ako sa imo, O Ginoo, tungod kay nagkalaya ang kahilamunan kag ang mga kakahuyan, nga daw ginsunog sang kalayo.

20Bisan ang talunon nga mga sapat nagapanawag sa imo, tungod kay namalhan ang mga sapa, kag nagkalaya ang mga kahilamunan nga daw gin-agyan sang kalayo.

Jump to: Chapter 2 →