Jonah 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Dayon si Jonas nga yara sa tiyan sang isda nagpangamuyo sa Ginoo nga iya Dios:

2“Sa akon kalisdanan, nagpanawag ako sa imo, O Ginoo kag ginsabat mo ako. Gikan sa kadadalman, sa kalibutan sang mga patay nagpangayo ako sing tabang kag ginpamatian mo ako.

3Gintagbong mo ako sa kadadalman, sa kadadalman gid sang dagat, sa diin nalikupan ako sang mga tubig, kag ang tanan mo nga mga balod nga dalagku nag-agi sa ibabaw ko.

4Nagdumdom ako nga gintabog nimo ako gikan sa imo atubang kag indi na ako makakita liwat sang imo balaan nga Templo.

5Ginlapawan ako sang tubig kag nagpungapunga ako, gintabunan gid ako sang dagat, kag ang akon ulo ginputos sang mga lumot.

6Nagsalop ako sa kaidadalman sang mga kabukiran, sa duta nga ang iya mga pwertahan natrangkahan sing walay katubtoban. Pero ikaw, O Ginoo nga akon Dios, nagpabalik sa akon nga buhi gikan sa kaidadalman.

7Sang akon mabatyagan nga mahunusan na ako sang ginhawa, dayon, O Ginoo nagpangamuyo ako sa imo, kag sa imo balaan nga Templo ginpamatian mo ako.

8Ang mga nagasimba sa wala pulos nga mga diosdios nagbiya sang ila katampad sa imo.

9Pero magaamba ako sa pagdayaw sa imo, magadulot ako sa imo sing halad, kag tumanon ko ang akon ginsaad. Ang kaluwasan nagagikan sa Ginoo!”

10Dayon ang Ginoo nagmando sa isda nga iluad si Jonas sa hunasan, kag gintuman ini sang isda.

← Chapter 1 Jump to: Chapter 3 →