Jonah 4

Ilonggo (Maayong Balita nga Biblia (2012))

← Chapter 3 Jump to:

1Si Jonas wala gid malipay nahanungod sini kag naakig sia.

2Gani nagpangamuyo sia, “O Ginoo, indi bala nga nagsiling ako sa imo sang wala pa ako makahalin sa amon, nga amo gid ini ang himuon mo? Amo ini ang kabangdanan nga nagtinguha ako sa pagpalagyo pakadto sa España! Nakahibalo ako nga ikaw mahigugmaon kag maluloy-on nga Dios, mapinatawaron kag malulo sa gihapon, kag handa sa gihapon sa pagbaylo sing imo hunahuna kag indi magsilot.

3Gani karon, O Ginoo, kon mahimo kuhaa na lang ang akon kabuhi kay mas maayo pa nga mapatay ako sang sa mabuhi.”

4Ang Ginoo nagsabat, “May katarungan bala ikaw sa pagpangakig?”

5Si Jonas naggwa sa siudad sa sidlangan nayon, kag nagpungko. Naghimo sia sing iya palasilungan kag nagpungko sia sa handong sini. Dayon naghulat sia sa pagtan-aw kon ano ang matabo sa Ninive.

6Dayon ang Ginoong Dios nagpatubo sing tanom nga naglapaw kay Jonas, sa paghatag sa iya sing handong agod indi sia mainitan. Gani si Jonas nalipay gid sini.

7Pero sang kaagahon sang madason nga adlaw, ang tanom ginpakaon sang Dios sa ulod, kag napatay ini.

8Sang pagtaas sang adlaw, ang Dios nagpahuyop sing tama kainit nga salatan, kag si Jonas daw malipong sa kasingkal sang init nga nagatupa sa iya ulo. Gani naghandom sia nga mapatay. Nagsiling sia, “Mas maayo pa mapatay ako sang sa mabuhi.”

9Pero ang Dios nagsiling sa iya, “May katarungan bala ikaw sa pagpangakig nahanungod sa tanom?” Nagsabat si Jonas, “Huo e! May katarungan ako sa pagpangakig, kag luyag ko na lang nga mapatay!”

10Ang Ginoo nagsiling sa iya, “Ini nga tanom nagtubo sa isa ka gab-i kag sa madason nga gab-i wala na. Nabalaka ikaw sa tanom nga wala mo pagpangabudlayi kag indi ikaw ang nagpatubo!

11Gani, daw ano pa gid ang akon pagkabalaka sa Ninive, inang daku nga siudad nga may sobra sa 120,000 ka mga kabataan nga wala sing sala, kag may madamo nga mga kasapatan!”

← Chapter 3 Jump to: