Lamentations 5

Ilonggo (Maayong Balita nga Biblia (2012))

← Chapter 4 Jump to:

1Dumdoma, O Ginoo, ang natabo sa amon. Tuloka kami, kag tan-awa ang amon kahuloy-an.

2Ang amon mga pagkabutang yara sa mga kamot sang iban nga mga tawo; ang mga dumoluong nagaestar sa amon mga balay.

3Ang amon mga ginikanan ginpatay sang mga kaaway, kag karon ang amon mga iloy nabalo na.

4Kinahanglan magbayad kami sa tubig nga amon ginainom; kinahanglan magbakal kami sang kahoy nga amon igatong.

5Ginakapuyan kami kaangay sang mga asno kag mga kamelyo nga gintakdan sing gota pero wala kami pagpapahuwaya.

6Agod nga mabuhi kami nagsungka kami sa Ehipto kag Asiria sa pagpangayo sing tuman nga pagkaon.

7Ang amon mga katigulangan nagpakasala kag nagkalamatay, kag nagaantos kami tungod sang ila mga sala.

8Gingamhan kami sang mga tawo nga mga ulipon, kag wala sing may makahilway sa amon gikan sa ila gahom.

9Ang mga manugpatay nagalibot sa mga kaumhan, may katalagman ang amon kabuhi kon magpangita kami sang amon kalan-on.

10Ang gutom nagpataas sang amon hilanat, tubtob ang amon panit nag-init subong sang hornohan.

11Ang amon mga asawa ginpanglugos sa Bukid sang Sion; sa tagsa ka banwa sang Juda ginpanglugos ang amon mga kaanakan nga babayi.

12Ang amon mga pangulo gindala kag ginbitay; ang amon tigulang nga mga lalaki wala ginatahod.

13Ang amon pamatan-on nga mga lalaki ginpilit nga maggaling subong sang mga ulipon; ang mga kabataan nga lalaki nagakadusmo sa mabug-at nga ginapas-an nga kahoy.

14Ang mga tigulang wala na nagapungko sa pwerta sang siudad, kag ang mga pamatan-on wala na nagatukar.

15Wala na kami sing kalipay sa amon mga kabuhi, ang kasubo nagbaylo sang amon mga pagsinaot.

16Wala na sing nabilin sang tanan nga amon ginapabugal. Nagpakasala kami, kag karon tapos gid kami.

17Nagsakit ang amon mga tagipusoon kag indi kami makakita tungod sang amon mga luha,

18tungod kay ang Bukid sang Sion mamingaw kag ginbayaan, ang talunon nga mga ido amo lamang ang nagalagaw sa iya mga ginub-an.

19Pero ikaw, O Ginoo, ang hari sa wala sing katapusan, kag magahari tubtob sa katapusan nga tion.

20Ngaa bala ginbayaan mo kami sing madugay gid? Dumdomon mo bala kami liwat?

21Pabalika kami sa imo, O Ginoo! Pabalika kami! Pabalika ang amon pagkabuhi subong sang una.

22Ukon ginsikway mo bala kami sa wala sing katapusan? Wala na bala sing untat ang imo kaakig?

← Chapter 4 Jump to: