Nahum 1

Ilonggo (Maayong Balita nga Biblia (2012))

Jump to: Chapter 2 →

1Amo ini ang mensahe gikan sa Dios nahanungod sa siudad sang Ninive, ang palanan-awon nga ginsulat ni Nahum nga taga-Elkos.

2Ang Ginoong Dios maimon, ginasilutan niya sila nga nagapamatok sa iya. Sa iya kaakig ginabalusan niya sila.

3Ang Ginoo indi madali mangakig, pero gamhanan sia kag wala niya ginapabay-i nga indi masilutan ang makasasala. Sa diin nagalakat ang Ginoo, nagabagyo, ang gal-om amo ang nagatap-ok nga yab-ok nga ginaagyan sang iya mga tiil!

4Ginamanduan niya ang dagat, kag nagamala ini! Ginapamala niya ang mga suba. Ang mga tanom nagakalaya sa kaumhan sang Basan, sa Bukid sang Carmel nagakalaya ang katamnan, kag ang mga bulak nagakalayong sa kabukiran sang Libano.

5Ang mga bukid nagakurog sa presensya sang Ginoo, ang mga bakulod nagakatunaw sa iya atubang. Ang duta nagauyog kon ang Ginoo magpakita, ang kalibutan kag ang iya pumoluyo nagakurog.

6Kon mangakig sia, sin-o pa ang mabuhi? Sin-o ang makaluwas sa kasingkal sang iya kaakig? Ginaula niya ang iya nagadabadaba nga kaakig, ang dalagku nga mga bato nagakamudmod sa atubang niya.

7Ang Ginoo maayo, ginaapinan niya ang iya mga tawo sa tion sang kagamo, ginaatipan niya ang mga nagadangop sa iya.

8Kaangay sang daku kag nagahuganas nga baha ginalaglag niya sing bug-os ang iya mga kaaway, ginapamatay niya ang mga nagapamatok sa iya.

9Ano ang ginaplano ninyo batok sa Ginoo? Laglagon niya kamo. Wala sing magapamatok sa iya sing makaduha.

10Kaangay sang gumon nga mga talungon kag laya nga dagami, masunog kamo nga mga palahubog!

11Gikan sa imo, Ninive, may tawo nga puno sing malaut nga mga tinutuyo, nga nagplano batok sa Ginoo.

12Amo ini ang ginasiling sang Ginoo sa iya mga tawo nga Israelinhon: “Bisan makusog kag madamo ang mga Asiriahanon, sila pagalaglagon kag madula. Mga tawo ko, ginpaantos ko kamo, pero indi ko na paghimuon ini liwat.

13Untaton ko na ang paggahom sang Asiria sa inyo, kag bugrason ko ang mga kadena nga nahigot sa inyo.”

14Amo ini ang ginsiling sang Ginoo nahanungod sa mga Asiriahanon: “Madulaan sila sing mga kaliwat sa pagdala sang ila ngalan. Pagalaglagon ko ang mga diosdios nga yara sa templo sang ila mga dios. Nagahanda ako sing lulobngan para sa mga Asiriahanon, indi bagay nga magkabuhi sila!”

15Lantawa, ang isa ka mensahero nga nagaagi sa ibabaw sang kabukiran nga may dala nga maayo nga balita! Nagapadulong sia sa pagpahibalo sang pagdaog! Mga tawo sang Juda, sauloga ninyo ang inyo mga piesta kag ihatag sa Dios ang inyo panaad sa iya. Ang malaut indi na maggubat sang inyo duta liwat. Nalaglag sila sing bug-os!

Jump to: Chapter 2 →