Psalms 68

Ilonggo (Maayong Balita nga Biblia (2012))

← Chapter 67 Jump to: Chapter 69 →

1Nagabangon ang Dios kag nagapaalaplaag sang iya mga kaaway! Ang mga nagadumot sa iya nagapalagyo kay sila nalutos.

2Subong sang pagpalid sang aso, sa amo man pagatabugon niya sila, subong nga ang kandila nagakatunaw sa kalayo, sa amo man ang mga malauton nagakawala sa atubang sang Dios.

3Pero ang mga matarong magakasadya, kag magahinugyaw sa iya atubang, magakalipay sila kag magasinggit sa kasadya.

4Mag-amba kamo sa Dios, mag-amba sing mga pagdayaw sa iya ngalan, amana ang dalan para sa iya nga nagasakay sa mga panganod. Ang iya ngalan amo ang Ginoo, magkalipay kamo sa iya atubang!

5Ang Dios nga nagaestar sa iya balaan nga Templo, nagaatipan sang mga ilo kag nagaapin sang mga balo nga babayi.

6Nagahatag sia sang balay sa nagaisahanon, kag ginahilway niya ang mga binilanggo kag ginapauswag sila, pero ang mga rebelde magaestar sa desierto.

7O Dios, sang pagtuytoy mo sang imo mga tawo, sang paglatas mo sa desierto,

8nagtay-og ang duta, kag ang langit nagbubo sang ulan, tungod sang pag-abot sang Dios sang Sinai, ang pag-abot sang Dios sang Israel.

9Ginpaulan mo sing mabaskog, kag ginhimo mo nga mapatubason liwat ang lamgod nga duta;

10didto naghimo sing balay ang imo mga tawo, sa imo kaayo ginhatagan mo ang mga imol sang ila kinahanglanon.

11Nagsugo ang Ginoo, kag madamo nga mga babayi ang nagdala sini nga balita:

12“Nagapalalagyo ang mga hari kag ang ila mga soldado!” Ang mga babayi sa balay nagpartida sang mga inagaw:

13mga dagway sang mga pating nga ginsampawan sang pilak, nga ang ila mga pakpak nagaidlak sang puraw nga bulawan. Ngaa bala ang iban sa inyo nag-estar sa toril sang mga karnero sa adlaw sang inaway?

14Sang ginpaalaplaag sang Makagagahom nga Dios ang mga hari sa Bukid sang Salmon, ginpaulan niya ang yelo didto.

15Daw ano kadako sang Bukid sang Basan, isa ka bukid nga madamo sing putokputokan!

16Ngaa bala nga gikan sa imo mataas nga mga putokputokan, ginatulok mo nga may paghikay ang bukid nga ginpili sang Dios nga iya pagaestaran? Didto magaestar ang Ginoo sa walay katubtoban!

17Upod sa linibulibo sang iya madamo nga mga karwahi, ang Ginoo nagaabot halin sa Sinai pakadto sa balaan nga lugar.

18Nagapasaka sia sa kahitaasan, dala ang madamo nga mga bihag upod sa iya, nagabaton sia sang mga dulot halin sa mabinatuon nga mga tawo. Ang Ginoong Dios magaestar didto.

19Dayawon ang Ginoo, nga nagapas-an sang aton mga kabug-atan adlaw-adlaw, sia amo ang Dios nga nagaluwas sa aton.

20Ang aton Dios amo ang Dios nga nagaluwas; sia amo ang Ginoo, ang aton Ginoo nga nagaluwas sa aton sa kamatayon.

21Pat-od gid nga buk-on sang Dios ang mga ulo sang iya mga kaaway, sadtong mga nagapadayon sa ila malaut nga mga pagginawi.

22Nagsiling ang Ginoo, “Pabalikon ko ang imo mga kaaway halin sa Basan, pabalikon ko sila halin sa kadadalman sang dagat,

23agod nga mag-ubog ikaw sa ila dugo, kag ang imo mga ido makapaayaw sa paglaklak sini.”

24Ang imo pagparada sang pagdaog, O Dios, nakit-an sang tanan, ang prosesyon sang Dios nga akon hari pakadto sa iya santuaryo.

25Ang mga manugkanta yara sa atubang, ang mga manugtukar yara sa likod, sa ulot nila ang mga dalaga nga nagatukar sang magamay nga mga tamborin.

26“Dayawa ninyo ang Dios sa katilingban sang iya mga tawo, dayawa ang Ginoo, tanan kamo nga mga kaliwat ni Jacob!”

27Nagapanguna ang tribo ni Benjamin, ang pinakadiutay nga tribo, dayon ang mga pangulo sang Juda kag sang ila grupo, nagasunod sa ila ang mga pangulo sang Zabulon kag Neftali.

28Ipakita O Dios, ang imo gahom, ang gahom nga imo gingamit tungod sa amon,

29gikan sa imo Templo sa Jerusalem, sa diin ang mga hari nagadala sa imo sing mga dulot.

30Sawaya ang Ehipto, inang mabangis nga sapat sa mga katabun-akan; sawaya man ang mga pungsod, inang manara sang toro nga mga baka upod sang ila mga tinday, tubtob nga magyaub sila tanan kag magdulot sa imo sang ila pilak. Paalaplaaga ang mga tawo nga nanamian sang inaway!

31Ang mga embahador magaabot halin sa Ehipto, ang mga taga-Etiopia magabayaw sang ila mga kamot sa Dios sa pagpangamuyo.

32Magkanta kamo sa Dios, mga ginharian sang kalibutan, magkanta kamo sing pagdayaw sa Ginoo,

33sa iya nga nagapanakayon sa kalangitan, ang dumaan nga kalangitan! Pamati kamo sa iya singgit nga nagadaguob!

34Isugid ang gahom sang Dios, ang iya pagkahalangdon yara sa bug-os nga Israel, ang iya gahom yara sa kalangitan.

35Daw ano ka halangdon ang Dios sa iya santuaryo, ang Dios sang Israel! Nagahatag sia sang kusog kag gahom sa iya mga tawo. Dayawon ang Dios!

← Chapter 67 Jump to: Chapter 69 →