2 Thessalonians 1

Ilonggo (Ang Biblia (1982))

Jump to: Chapter 2 →

1Si Pablo, si Silvano, kag si Timoteo, Sa iglesia sang mga taga-Tesalonica sa Dios nga aton Amay kag kay Ginoong Jesu-Cristo:

2Ang bugay sa inyo kag paghidait gikan sa Dios nga Amay kag kay Ginoong Jesu-Cristo.

3Kinahanglan kami sa gihapon magpasalamat sa Dios tungud sa inyo, mga kauturan, subong nga nagakaigo, bangud nga ang inyo pagtoo nagatubo sing bugana, kag ang gugma sang tagsa sa inyo ayon sa isa kag isa nagadugang.

4Busa kami amon nagapabugal nahanungud sa inyo sa mga iglesia sang Dios tungud sang inyo pagkalig-on kag pagtoo sa tanan nga paghingabut sa inyo kag sa mga kapipit-an nga inyo ginaantus.

5Ini amo ang pagpamatuud sang matarung nga paghukom sang Dios, agud nga mangintakus kamo sang ginharian sang Dios, nga tungud sini kamo nagaantus—

6sanglit sa pagkamatuud ginakabig sang Dios nga matarung ang pagbalus sing kapipit-an sa mga nagapapiot sa inyo,

7kag sa inyo nga mga ginapapiotan ang paghatag sing kapahuwayan kaupud namun, sa pagpahayag ni Ginoong Jesus gikan sa langit kaupud sang iya gamhanan nga mga manugtunda sa nagadabdab nga kalayo,

8nga nagatimalus sa mga wala nagakilala sa Dios kag sa mga wala nagatuman sang maayong balita sang aton Ginoong Jesus.

9Sila magaantus sing silot nga amo ang dayon nga kalaglagan kag pagpahilayo gikan sa atubangan sang Ginoo kag sa himaya sang iya gahum,

10kon mag-abut sia sinang adlaw nga himayaon sang iya mga balaan, kag katingalahan sang tanan nga nagtoo, bangud nga ang amon pagpamatuud sa inyo gintoohan.

11Sa among katuyoan nagapangamuyo man kami sing dayon tungud sa inyo, nga ang aton Dios magpakatakus sa inyo sa iya pagtawag, kag magtuman sang tagsa ka maayong pagtapat kag buhat sang pagtoo sa iya gahum,

12agud nga ang ngalan sang aton Ginoong Jesus paghimayaon sa inyo, kag kamo sa iya, sono sa bugay sang aton Dios kag ni Ginoong Jesu-Cristo.

Jump to: Chapter 2 →