2 Thessalonians 3

Ilonggo (Ang Biblia (1982))

← Chapter 2 Jump to:

1Sa katapusan, mga kauturan, magpangamuyo kamo tungud sa amon, agud nga ang polong sang Ginoo maglapnag kag magdaug, subong nga sa inyo,

2kag nga maluwas kami sa balingag kag malaut nga mga tawo; kay indi ang tanan may pagtoo.

3Apang ang Ginoo matutum; magapalig-on sia sa inyo kag magabantay sa inyo gikan sa malauton.

4Kag may pagsalig kami sa Ginoo nahanungud sa inyo, nga kamo nagahimo kag magahimo sang mga butang nga amon ginasogo.

5Kabay nga ang Ginoo magtuytuy sang inyo mga tagiposoon sa gugma sang Dios kag sa pagpailub ni Cristo.

6Karon nagasogo kami sa inyo, mga kauturan, sa ngalan sang aton Ginoong Jesu-Cristo, nga magpahilayo kamo sa tagsa ka utud nga nagagawi sing tinamad kag indi sono sa napalaton nga nabaton ninyo sa amon.

7Kay kamo inyo nakahibalo kon paano ang dapat pag-ilog ninyo sa amon; wala kami magtinamad sang kaupud kami ninyo,

8wala kami magkaon sing kalan-on ni bisan sin-o nga walay bayad, kondi sa kabudlay kag sa kasakit nagpangabudlay kami sa adlaw kag gab-i, agud nga indi namun mapabug-atan ang bisan sin-o sa inyo.

9Indi bangud nga wala kami sing kinamatarung, kondi sa paghatag sing huwaran sa inyo sa amon paggawi nga ilogon ninyo.

10Kay bisan sang kaupud kami ninyo, ini ginsogo namun sa inyo: Kon sin-o ang indi magpangabudlay, indi sia magkaon.

11Kay nakabati kami nga ang iban sa inyo nagaginawi sing tinamad, mahilabton, wala nagapangabudlay.

12Karon ang mga subong sina ginasogo namun kag ginalaygayan sa kay Ginoong Jesu-Cristo sa pagpangabudlay sa kalinong kag sa pagpangita sang ila kaugalingon nga pangabuhian.

13Mga kauturan, dili kamo magpakaluya sa paghimo sing maayo.

14Kon ang bisan sin-o wala nagatuman sang amon polong sa sining sulat, tandai inang tawo, kag dili kamo magpasilabut sa iya, agud nga mahuy-an sia.

15Dili ninyo pagbilangon sia nga kaaway, kondi paandami sia subong nga utud.

16Karon ang Ginoo gid sang paghidait maghatag sa inyo sing paghidait sa tanan nga tion sa tanan nga bagay. Ang Ginoo manginkaupud ninyo tanan.

17Ako, si Pablo, nagasulat sing pag-abiabi sa akon kaugalingon nga kamut. Ini amo ang tanda sa tagsa ko ka sulat; amo ini ang panulat ko.

18Ang bugay sang aton Ginoong Jesu-Cristo manginkaupud ninyo tanan.

← Chapter 2 Jump to: