Haggai 1

Ilonggo (Ang Biblia (1982))

Jump to: Chapter 2 →

1Sa ikaduhang tuig ni Dario nga hari, sa bulan nga ikan-um, sa nahaunang adlaw sang bulan, ang polong sang Ginoo nag-abut paagi kay Hageo nga manalagna kay Zorobabel nga anak ni Sealtiel, pangolo-puud sang Juda, kag kay Josue nga anak ni Josadac, ang pinakamataas nga sacerdote,

2“Amo ini ang ginapamolong sang Ginoo sang mga kasoldadosan: Ining katawohan nagasiling nga ang tion wala pa mag-abut nga patindugon ang balay sang Ginoo.”

3Niyan nag-abut ang polong sang Ginoo paagi kay Hageo nga manalagna,

4“Tion bala ini sa inyo sa pagpuyo sa inyo mga balay nga nakisamihan, samtang ining balay guba?

5Busa karon amo ini ang ginasiling sang Ginoo sang mga kasoldadosan: Patugsilingi ang inyo mga dalanon.

6Nakasab-ug kamo sing madamu, kag nagatipon sing diotay; nagakaon kamo, apang wala kamo mabusug; nagainum kamo, apang wala kamo maayawi sing ilimnon; nagapanaput kamo, apang wala gid sing nag-init; kag ang mga nagabaton sing sohol nagabaton sing mga sohol sa pagsulud sini sa puyo nga may mga buslot.

7“Amo ini ang ginasiling sang Ginoo sang mga kasoldadosan: Patugsilingi ang inyo mga dalanon.

8Tukad kamo sa bukid kag magdala sing kahoy kag patindugon ang balay, agud nga mahamuut ako sini kag paghimayaon ako, nagasiling ang Ginoo.

9Nagahulat kamo sing madamu, kag, yari karon, nag-abut ini sa diotay; kag sang gindala ninyo ini pauli, ginhuyup ko ini. Ngaa bala? nagasiling ang Ginoo sang mga kasoldadosan. Bangud sang akon balay nga guba, samtang nga kamo nagadalagan ang tagsa ka tawo sa iya kaugalingon nga balay.

10Busa bangud sa inyo ang mga langit nagapugung sang ton-og, kag ang duta nagapugung sang iya bunga.

11Kag gintawag ko ang kakigas sa duta kag sa mga bukid, sa uyas, sa bag-o nga alak, sa lana, sa ginapatubas sang duta, sa mga tawo kag sa kahayupan, kag sa bug-os nga kinabudlayan sang mga kamut.”

12Niyan si Zorobabel nga anak ni Sealtiel, kag si Josue nga anak ni Josadac, ang pinakamataas nga sacerdote, pati ang tanan nga nabilin sang katawohan, nagtuman sang tingug sang Ginoo nga ila Dios, kag sang mga polong ni Hageo nga manalagna, sono sa ginpadala sa iya sang Ginoo nga Dios nila; kag ang katawohan nagkahadluk sa atubangan sang Ginoo.

13Niyan nagpamolong si Hageo, nga manugbalita sang Ginoo, sang balita sang Ginoo sa katawohan, “Ako nagaupud sa inyo, nagasiling ang Ginoo.”

14Kag ginpukaw sang Ginoo ang espiritu ni Zorobabel nga anak ni Sealtiel, pangolo-puud sang Juda, kag ang espiritu ni Josue nga anak ni Josadac, ang pinakamataas nga sacerdote, kag ang espiritu sang bug-os nga nabilin sang katawohan; kag nag-abut sila kag nagpangabudlay sa balay sang Ginoo sang mga kasoldadosan, nga ila Dios,

15sa ikaduha ka pulo kag apat nga adlaw sang bulan, sa ikan-um nga bulan.

Jump to: Chapter 2 →