Haggai 2

Ilonggo (Ang Biblia (1982))

← Chapter 1 Jump to:

1sa ikapitong bulan, sa ikaduha ka pulo ka isa nga adlaw sang bulan, nag-abut ang polong sang Ginoo kay Hageo nga manalagna,

2“Ipamolong karon kay Zorobabel nga anak ni Sealtiel, pangolo-puud sang Juda, kag kay Josue nga anak ni Josadac, ang pinakamataas nga sacerdote, kag sa nabilin sang katawohan, nga nagsiling,

3“Sin-o bala ang nabilin sa inyo nga nakakita sining balay sa iya una nga himaya? Paano bala ang pagtan-aw ninyo sini karon? Indi bala ini subong nga wala sa inyo mga mata?

4Apang karon magpakabakud, O Zorobabel, nagasiling ang Ginoo; magpakabakud, O Josue, anak ni Josadac, ang pinakamataas nga sacerdote; magpakabakud, tanan kamo nga katawohan sang duta, nagasiling ang Ginoo; magpangabudlay, kay ako nagaupud sa inyo, nagasiling ang Ginoo sang mga kasoldadosan,

5sono sa polong nga ginpakigkatipan ko sa inyo sang paggowa ninyo sa Egipto. Ang akon Espiritu nagpabilin sa tunga ninyo; dili kamo magkahadluk.

6Kay amo ini ang ginasiling sang Ginoo sang mga kasoldadosan: Sa makaisa pa, sa diotay nga tion, uyugon ko ang mga langit kag ang duta kag ang dagat kag ang mamala nga duta;

7kag uyugon ko ang tanan nga pungsud, agud nga ang bilidhon nga mga butang sang tanan nga pungsud magaabut, kag pun-on ko ining balay sing himaya, nagasiling ang Ginoo sang mga kasoldadosan.

8Ang pilak akon, kag ang bulawan akon, nagasiling ang Ginoo sang mga kasoldadosan.

9Ang olihing himaya sining balay mangindaku pa sa una, nagasiling ang Ginoo sang mga kasoldadosan; kag sa sining duug ihatag ko ang paghidait, nagasiling ang Ginoo sang mga kasoldadosan.’”

10Sa ikaduha ka pulo kag apat nga adlaw sang bulan nga ikasiam, sa ikaduhang tuig ni Dario, nag-abut ang polong sang Ginoo paagi kay Hageo nga manalagna.

11“Amo ini ang ginasiling sang Ginoo sang mga kasoldadosan: Pamangkota karon ang mga sacerdote nahanungud sang kasogoan,

12‘Kon ang isa magputus sang unud nga balaan sa sidsid sang iya bayo, kag makatandug sa iya sidsid sing tinapay, ukon linaga, ukon alak, ukon lana, ukon bisan anong kalan-on, manginbalaan bala ini?’” Ang mga sacerdote nagsabat, “Indi.”

13Niyan nagsiling si Hageo, “Kon ang isa nga dimatinlo bangud sang lawas nga patay makatandug sang bisan ano sini, mangindimatinlo bala ini?” Ang mga sacerdote nagsabat, “Ini mangindimatinlo.”

14Niyan si Hageo nagsiling, “Subong sini ining katawohan, kag subong sini ining pungsud sa atubangan nakon, nagasiling ang Ginoo; kag subong sini man ang tagsa ka binuhatan sang illa mga kamut; kag ang ginahalad nila didto dimatinlo.

15Karon ginaampo ko sa inyo, patugsilingi kutub sining adlaw padayon kon ano ang matabu. Sa wala pa matungtung ang bato sa bato sa templo sang Ginoo, paano kamo?

16Sa bug-os sadtong tion, kon magpalapit ang isa sa tinumpok nga duha ka pulo ka sukub, may napulo lamang; kon ang isa magpalapit sa suludlan sang alak sa pagkuha sing kalim-an ka sukub, may duha ka pulo lamang.

17Ginsakit ko kamo sang panglaya kag sang kusim kag sang ulan nga hielo nga daw bato sa tanan nga binuhatan sang inyo mga kamut; apang wala kamo magbalik sa akon, nagasiling ang Ginoo.

18Patugsilingi, kutub sining adlaw padayon, kutub sa ikaduha ka pulo kag apat nga adlaw sang bulan nga ikasiam. Kutub sang adlaw nga ginpahamtang ang sadsaran sang templo sang Ginoo, patugsilingi ini:

19Yara pa bala ang binhi sa damisag? Ang uvas, ang higuera, ang granada, kag ang olivo wala bala magpamunga? Kutub sining adlaw padayon pakamaayohon ko kamo.”

20Ang polong sang Ginoo nag-abut sa ikaduha kay Hageo sa ikaduha ka pulo kag apat nga adlaw sang bulan,

21“Ipamolong kay Zorobabel, pangolo-puud sang Juda, nga nagasiling, Uyugon ko ang kalangitan kag ang duta,

22kag pukanon ko ang trono sang mga ginharian; laglagon ko ang kusug sang mga ginharian sang mga pungsud, kag wagwagon ko ang mga kangga kag ang mga nagasakay sa ila; kag ang mga kabayo kag ang mga nagasakay sa ila maholog, ang tagsatagsa paagi sa espada sang iya utud.

23Sa sadtong adlaw, nagasiling ang Ginoo sang mga kasoldadosan, kuhaon ko ikaw, O Zorobabel nga akon alagad, ang anak ni Sealtiel, nagasiling ang Ginoo, kag himoon ko ikaw subong sang singsing nga inugpat-in; kay ginpili ko ikaw, nagasiling ang Ginoo sang mga kasoldadosan.”

← Chapter 1 Jump to: