Joel 1

Ilonggo (Ang Biblia (1982))

Jump to: Chapter 2 →

1Ang polong sang Ginoo nga nag-abut kay Joel, nga lalaki nga anak ni Petuel:

2Magpamati sini, kamo nga mga tigulang, magdungug, tanan kamo nga pumuluyo sang duta! Nahanabu bala ini sa inyo mga adlaw, ukon sa mga adlaw, sang inyo mga ginikanan?

3Magsugid kamo sini sa inyo mga anak, kag ang inyo mga anak sa ila mga anak, kag ang ila mga anak sa madason nga kaliwatan.

4Ang nabilin sang lukso, ginkaon sang apan. Ang ginbilin sang apan, ginkaon sang palakukwan, kag ang ginbilin sang palakukwan, ginkaon sang atatalo.

5Pagmata, kamo nga mga palahobog, kag maghibi; kag maghaya, tanan kamo nga palainum sing alak, bangud sang matam-is nga alak, kay ginakuha ini sa inyo baba.

6Kay ang isa ka pungsud nagtaklad sa akon duta, nga makusug kag dimaisip; ang iya mga ngipon mga ngipon sang leon, kag may bag-ang sang leon nga babayi.

7Ginlaglag niya ang akon uvas, kag ginpanitan ang akon higuera; gin-ak-akan niya ini kag ginpilak; ang iya mga sanga nagputi.

8Magpanalabiton kaangay sang ulay nga nawagkusan sing panapton nga sako tungud sa bana sang iya pagkapamatan-on.

9Ang halad-nga-kalan-on kag ang halad-nga-ilimnon nag-untat sa balay sang Ginoo. Ang mga sacerdote nagalalaw, nga mga alagad sang Ginoo.

10Ang uma nalaglag, ang duta nagalalaw; kay ang uyas nalaglag, ang bag-o nga alak nahubas, ang lana nagamala.

11Magkahuya, O kamo nga mga mangunguma, maghaya, O kamo nga mga manugtatap sang uvas, tungud sang trigo kag sang cebada; kay nawala ang patubas sang uma.

12Nalaya ang uvas, ang higuera nagkupus. Ang granada, ang palma man, kag ang mansanas, ang tanan nga kakahoyan sang latagon nalaya; kay ang kalipay nagtaliwan sa mga anak sang mga tawo.

13Magpangwagkus kamo kag magpanalabiton, kamo nga mga sacerdote, maghaya, kamo nga mga manug-alagad sang halaran. Kari, maghigda sa bug-os nga gab-i sa panapton nga sako, kamo nga mga manug-alagad sang akon Dios! Kay ginpauntat sa balay sang inyo Dios ang halad-nga-kalan-on kag ang halad-nga-ilimnon.

14Magpakabalaan sing puasa, magtawag sing maligdong nga pagtilipon. Tipona ang mga tigulang kag ang tanan nga pumuluyo sang duta sa balay sang Ginoo nga inyo Dios; kag magtuaw sa Ginoo.

15Kailo sang adlaw! Kay malapit na ang adlaw sang Ginoo, kag magaabut ini subong sang kalaglagan gikan sa Makaako.

16Wala bala pagkuhaa ang kalan-on sa atubangan sang aton mga mata, ang kalipay kag ang kasadya sa balay sang aton Dios?

17Ang mga binhi nadunut sa idalum sang ila mga puga, ang mga damisag naguba; ang mga tambobo nawasdak kay nagkupus ang trigo.

18Daw ano ang pagbakho sang kasapatan! Ang mga panong sang mga baka nalisang bangud nga wala sila sing halalban; bisan ang mga panong sang mga carnero nalaglag.

19O Ginoo, sa imo nagatuaw ako. Kay ang kalayo naglamon sang mga halalban sang kamingawan, kag ang dabdab nagsonog sang tanan nga kahoy sang latagon.

20Bisan ang kasapatan sang latagon nagaima sa imo kay nahubsan ang kasapaan sang tubig, kag ang kalayo naglamon sang mga halalban sang kamingawan.

Jump to: Chapter 2 →