Nahum 2

Ilonggo (Ang Biblia (1982))

← Chapter 1 Jump to: Chapter 3 →

1Ang manugdugmok nagaabut batok sa imo. Patawohi ang pamakud; bantayi ang dalanon, lig-ona ang imo mga hawak; pamakuri ang imo gahum sing malig-on.

2(Kay ang Ginoo nagauli sang kamahalan ni Jacob subong sang kamahalan sang Israel, kay ang mga manug-ati nagpangati sa ila kag naglaglag sang ila mga sanga nga uvas.)

3Ang taming sang iya gamhanan nga mga lalaki ginpapula, ang iya mga isganan nga lalaki nasaputan sing escarlata. Ang mga kangga nagakilan sa salsalon sa adlaw sang iya pag-aman; ang mga bangkaw nga cipres ginabalabad.

4Ang mga kangga nagatinuwak sa mga dalan, nagasinumbali sila sa masangkad nga mga dalan; ang ila dagway kaangay sang mga sulo, nagadinalagan sila kaangay sang kilat.

5Ginadumdum niya ang iya mga dungganon, nagakasandad sila sa ila paglakat, nagadalidali sila pakadto sa kuta, ang palalipdan naaman.

6Ang mga gawang sang mga suba nabuksan, natunaw ang palacio;

7ang iya agalon nga babayi ginbuksan, ginadala sia sa unhan, ang iya mga ulipon nga babayi nagapanghayhay, subong sang tingug sang mga salampati, nga nagapanampok sa ila mga dughan.

8Ang Ninive nanginkaangay sang ponong nga ang iya tubig nagapalagyo. “Dolog! Dolog!” nagasinggit sila; apang wala gid sing nagabalikid.

9Kuha kamo sang inatihan nga pilak, kuha sang inatihan nga bulawan! Walay katapusan ang sinuput, ukon ang himaya sang tanan nga kasangkapan nga matahum.

10Mamingaw! Kamingawan kag kalaglagan! Ang mga tagiposoon nagakatunaw kag ang mga tuhud nagasintuay, ang kagha yara sa tanan nga balikawang, ang tanan nilang nawung nagaluspad!

11Diin bala ang hukmongan sang mga leon, ang kalan-an sang bataon nga mga leon, diin nagalagaw ang leon nga lalaki kag leon nga babayi, diin ang mga totoy sang leon, nga wala gid sing nagpahadluk sa ila?

12Ang leon nagkusnit sing tuman tungud sa iya mga totoy kag nagpanguga nga sa iya mga leon nga babayi; nagpuno sang iya mga lungib sing mga tinukub kag sang iya mga hukmongan sing mga tinukban.

13Yari karon, ako batok sa imo, nagasiling ang Ginoo sang mga kasoldadosan, kag sonogon ko sa aso ang iya mga kangga, kag ang espada magalamon sang imo bataon nga mga leon; papason ko sa duta ang imo tulukbon, kag indi na mabatian ang tingug sang imo mga manugbalita.

← Chapter 1 Jump to: Chapter 3 →