Ruth 4

Ilonggo (Ang Biblia (1982))

← Chapter 3 Jump to:

1Kag si Boaz nagtaklad sa gawang kag naglingkod sia didto; kag yari karon, nagligad ang malapit nga himata nga ginsambit ni Boaz. Sa iya nagsiling si Boaz, “Hoy, kwan! hapit, lingkod diri”; kag naghapit sia kag naglingkod.

2Kag si Boaz nagkuha sing napulo ka lalaki sang mga tigulang sang banwa, kag nagsiling, “Lingkod kamo diri;” gani sila naglingkod.

3Niyan nagsiling sia sa malapit nga himata, “Si Noemi, nga nagbalik gikan sa duta sang Moab, nagabaligya sing puna sang duta nga iya sang aton utud nga si Elimelec.

4Gani ako naghunahuna sa pagpabutyag sini sa imo, nga nagasiling, Bakla ini sa atubangan sang mga nagalingkod diri, kag sa atubangan sang mga tigulang sang akon katawohan. Kon ikaw buut maggawad sini, gawara ini; apang kon indi ka buut maggawad sini, niyan sugiri ako, agud nga mahibaloan ko, kay luwas sa imo wala sing iban nga maggawad sini, kag ako madason sa imo.” Kag sia nagsiling, “Akon gawaron ini.”

5Niyan nagsiling si Boaz, “Sa adlaw nga baklon mo ang uma gikan sa kamut ni Noemi, kinahanglan baklon mo man ini gikan kay Rut nga Moabnon, ang asawa sang napatay, sa pagbangon sang ngalan sang napatay sa iya panublion.”

6Niyan nagsiling ang malapit nga himata, “Indi ako sarang makagawad sini nga sa akon, basi masamad ko ang akon panublion. Kuhaa nga sa imo ang akon kinamatarung sa paggawad, kay indi ako sarang makagawad sini.”

7Karon ini amo ang kinabatasan sang una nga tion sa Israel nahanungud sa paggawad kag nahanungud sa pagbaylohanay: sa pagpalig-on sang tanan nga butang, ang tawo maghukas sang iya sapin kag maghatag sini sa iya isigkatawo, kag amo ini ang bagay sang pagpamatuud sa Israel.

8Gani sang nagsiling ang malapit nga himata kay Boaz, “Bakla nga sa imo,” ginhukas niya ang iya sapin.

9Niyan si Boaz nagsiling sa mga tigulang kag sa bug-os nga katawohan, “Kamo mga saksi sa sini nga adlaw nga nabakal ko ang tanan nga iya ni Elimelec kag ang tanan nga ila ni Quelion kag ni Mahalon gikan sa kamut ni Noemi.

10Labut pa si Rut nga Moabnon, ang asawa ni Mahalon, nabakal ko nga akon asawa, sa pagbangon sang ngalan sang napatay sa iya panublion, agud nga ang ngalan sang napatay indi mawala gikan sa tunga sang iya mga utud kag gikan sa gawang sang iya duug; kamo mga saksi sini nga adlaw.”

11Niyan ang tanan nga katawohan nga yara sa gawang, kag ang mga tigulang, nagsiling, “Mga saksi kami. Ang Ginoo maghimo sang babayi, nga magasulud sa imo balay, kaangay kay Raquel kag kay Lea, ang duha nga nagpatindug sang balay sang Israel. Magmangintakus ka sa Efrata kag magmanginbantug ka sa Bet-lehem;

12kag magmanginkaangay ang imo balay sa balay ni Perez, nga gin-anak ni Tamar kay Juda, bangud sa kaliwat nga ihatag sang Ginoo sa imo paagi sini nga pamatan-on nga babayi.”

13Gani ginkuha ni Boaz si Rut kag sia nangin-iya asawa; kag naghiusa sia sa iya, kag ginpapanamkon sia sang Ginoo, kag nag-anak sia sing lalaki.

14Niyan, ang mga babayi nagsiling kay Noemi, “Pakamaayohon ang Ginoo, nga wala magpakulang sa imo sini nga adlaw sing malapit nga himata; kag manginbantug ang iya ngalan sa Israel!

15Sia manginmanugpasag-uli sang kabuhi sa imo kag sia manginmanugsagud sa imo katigulangon; kay ang imo umagad nga nagahigugma sa imo, nga labi pa sa imo sa pito ka anak nga lalaki, nag-anak sa iya.”

16Niyan ginkuha ni Noemi ang bata kag ginkongkong sia sa iya dughan, kag nanginsisiwa sa iya.

17Kay ang mga babayi nga iya mga kasilingan naghingalan sa iya, nga nagasiling, “May isa ka anak nga lalaki nga natawo kay Noemi.” Ginhingalanan nila sia Obed; sia amay ni Jesse, ang amay ni David.

18Karon amo ini ang mga kaliwatan ni Perez: si Perez amay ni Hesron,

19si Hesron amay ni Ram, si Ram amay ni Aminadab,

20si Aminadab amay ni Naason, si Naason amay ni Salmon,

21si Salmon amay ni Boaz, si Boaz amay ni Obed,

22si Obed amay ni Jesse, kag si Jesse amay ni David.

← Chapter 3 Jump to: