Nehemiah 10

Hmong Bible (Vajtswv Txojlus 2000)

← Chapter 9 Jump to: Chapter 11 →

1Thawj tug uas suam npe rau daim ntawv ntawd yog tus tswvxeev uas yog Hakaniyas tus tub Nehemis ntag. Thiab cov neeg uas muaj npe li nram no yog cov uas tau nrog suam npe rau daim ntawv ntawd:

2Cov Povthawj: Pasehus, Amaliyas, Makhiyas, Hatus, Senpaniyas, Malukhes, Halimes, Melemaus, Aunpadiyas, Daniyees, Nkenethoos, Npalus, Mesulas, Anpiyas, Miyamees, Ma-axias, Npilenkais thiab Semayas

3Cov Levis: 1 Yesuas uas yog Axaniyas tus tub, Hanadas cuab kwvtij yog Npeenu-is, Kamiyees, Senpaniyas, Haudiyas, Kelitas, Pelayas, Hanas, Mikas, Lehaus, Hasanpiyas, Xakules, Selenpiyas, Senpaniyas, Haudiyas, Npanis thiab Npeninus

4Cov pejxeem cov thawjcoj:

5Palauses, Pahas Mau-am, Elas, Xatus, Npanis, Npunis, Axenkas, Npenpais, Adauniyas, Npivais, Adines, Ates, Hexekiyas, Axules Haudiyas, Hasus, Npexais, Halifas, Anathaus, Nenpais, Mankipiyas, Mesulas, Hexiles, Mesexanpees, Xadaus, Yaduas, Pelatiyas, Hanas, Anayas, Hauseyas, Hananiyas, Hasus, Halauhes, Pilehas, Saunpes, Lehumes, Hasanas, Ma-axeyas, Ahiyas, Hanas, Anas,Malukhes, Halimes thiab Npa-anas

6Peb cov uas yog cov pejxeem Yixalayees, cov povthawj, cov Levis, cov zov lub Tuamtsev, cov hu nkauj hauv lub Tuamtsev, cov ua haujlwm hauv lub Tuamtsev thiab cov uas coj Vajtswv txoj Kevcai tau muab lawv cais tawm ntawm lwm haivneeg uas nyob hauv peb lub tebchaws. Peb nrog peb cov pojniam thiab menyuam uas loj paub qabhau lawm tuaj sib sau ua ke,

7koom nrog peb cov thawjcoj coglus, yog peb tsis coj raws li tej lus cog tseg ntawd, thov kom peb raug lo lus foom tsis zoo. Peb yuav tsum ua peb lub neej raws li Vajtswv txoj Kevcai uas nws tau muab cob rau nws tus tubtxib Mauxes. Peb yuav tsum mloog tug TSWV uas yog peb tus Tswv tej lus samhwm; thiab peb yuav tsum ua raws li nws tej kevcai thiab tej kabke.

8Peb yuav tsis mus yuav lwm haivneeg cov ntxhais los rau peb cov tub thiab peb yuav tsis muab peb cov ntxhais qua rau lawv tej tub lawm.

9Yog cov neeg txawv tebchaws coj qoobloo lossis lwm yam tuaj muag rau peb hnub Xanpataus lossis tej hnub tseemceeb, peb yuav tsis yuav lawv tej khoom ntawd. Xya lub xyoo twg peb tseg ib xyoos tsis cog qoob rau hauv peb tej teb, thiab peb yuav zam tej nujnqis rau cov neeg uas tshuav peb nqi.

10Txhua xyoo twg peb yuav tau muab nyiaj ib feem peb ntawm ib lag nyiaj coj mus siv rau hauv lub Tuamtsev.

11Peb yuav muab khoom mus siv rau hauv lub Tuamtsev pehawm Vajtswv raws li nram no: cov ncuav dawbhuv, tej qoobloo uas niaj hnub coj mus fij, tej tsiaj uas niaj hnub coj mus tua hlawv ua khoom fij, tej khoom fij dawbhuv rau hnub Xanpataus, kevcai noj haus hnub Xiab Ib, thiab lwm yam kevcai noj haus, lwm yam khoom fij uas dawbhuv, tej khoom fij uas daws cov Yixalayees tej kev txhaum thiab lwm yam uas yuav tsum siv rau hauv lub Tuamtsev.

12Txhua xyoo twg cov pejxeem, cov povthawj thiab cov Levis yuav rho ntawv, kom paub tseeb hais tias saib cuab kwvtij twg yog cuab uas yuav tau npaj taws los hlawv tej khoom fij theej txhoj rau tus TSWV uas yog Vajtswv raws li txoj Kevcai uas muaj tseg lawm.

13Txhua xyoo twg peb yuav coj tej qoobloo thawj phaum uas peb sau tau thiab thawj phaum txiv uas peb de los coj mus tso rau hauv lub Tuamtsev.

14Peb yuav coj peb txhua tus tub hlob mus rau cov povthawj uas nyob hauv lub Tuamtsev muab fij rau Vajtswv raws li txoj Kevcai. Peb tseem yuav coj peb thawj tug menyuam nyuj, thawj tug menyuam nyaj thiab thawj tug menyuam tshis mus rau cov povthawj.

15Txhua xyoo twg peb coj peb thawj phaum hmoov nplej uas zom tau thaum sau qoobloo thiab lwm yam khoom fij uas yog peb tej cawv txiv hmab, tej txiv ntoo roj thiab txhua yam txiv ntoo coj mus rau cov povthawj uas nyob hauv lub Tuamtsev. Peb yuav coj tej qoobloo uas peb ua tau hauv peb tej teb ib feem kaum mus rau cov Levis, vim lawv muaj cai sau ib feem kaum ntawm peb cov neeg ua teb txhua lub zos.

16Cov povthawj uas yog Aloos cov xeebntxwv nrog nraim cov Levis thaum uas lawv sau ib feem kaum ntawd, thiab cov Levis muab ib feem kaum ntawm cov ib feem kaum uas sau tau los ntawd coj mus ntim rau hauv txhab kom tau siv hauv lub Tuamtsev.

17Cov pejxeem Yixalayees thiab cov Levis coj tej qoobloo, cawv txiv hmab thiab txiv ntoo roj uas sawvdaws muab tuaj coj mus cia rau hauv cov chav uas rau tej khoom siv hauv lub Tuamtsev uas yog cov povthawj, cov zov roojvag thiab cov hu nkauj hauv lub Tuamtsev qhov chaw nyob ua haujlwm. Peb yuav tsis lam muab peb tus Vajtswv lub tsev saib tsis muaj nqis ib zaug li.

← Chapter 9 Jump to: Chapter 11 →