Nehemiah 12

Hmong Bible (Vajtswv Txojlus 2000)

← Chapter 11 Jump to: Chapter 13 →

1Cov povthawj thiab cov Levis uas nrog Se-atiyees tus tub Xelunpanpees thiab nrog tus Povthawj Hlob Yesuas rov los muaj npe li nram no:

2Cov povthawj: 1 Xelayas, Yelemis, Exalas, Amaliyas, Malukhes, Hatus, Sekaniyas, Lehumes, Melemaus, Idaus, Nkinethau-is, Anpiyas, Miyamees, Ma-adiyas, Npilenkas, Semayas, Yauyalis, Yedayas, Xalus, Amaukes, Hilekiyas thiab Yedayas. Cov neeg uas muaj npe saum no puavleej yog thawjcoj ntawm lawv cov kwvtij uas yog cov povthawj thiab nyob rau Yesuas tiam.

8Cov Levis: Ntawm no mus yog hais txog cov Levis uas xaiv ua cov hu nkauj qhuas Vajtswv: Yesuas, Npeenu-is, Kamiyees, Selenpiyas, Yudas thiab Mataniyas.

9Npanpukiyas, Unaus thiab nkawd cov phoojywg Levis ua cov hu nkauj uas sawv ncaj ntawm nkawd thaum pehawm Vajtswv.

10Yesuas yog Yauyakees txiv, Yauyakees yog Eli-asis txiv, Eli-asis yog Yauyadas txiv;

11Yauyadas yog Yaunathas txiv thiab Yaunathas yog Yaduas txiv.

12Thaum uas Yauyakees ua tus Povthawj Hlob, cov povthawj uas muaj npe li nram no yog cov thawj ntawm lawv txhua cuab kwvtij: Melayas Xelayas Hananiyas Yelemis Mesulas Exalas Yehauhanas Amaliyas Yaunathas Malukhis Yauxej Senpaniyas Anas Halimes Helekais Melayaus Xakhaliyas Idaus Mesulas Nkinethoos Xikhalis Anpiyas … Miniyamees Piletais Mau-adiyas Samuas Npilenkas Yehaunathas Semayas, Matenais Yauyalis Uxis Yedayas Kalais Xalais Enpes Amaukas Hasanpiyas Hilekiyas Nethanees Yedayas

22Phau ntawv no yog teev cov Levis cov thawjcoj thiab cov povthawj tej tsevneeg tiam uas cov Povthawj Hlob tseem ua neej nyob: Eli-asis, Yehauyadas, Yaunathas thiab Yaduas. Phau ntawv no sau tiav rau thaum Dali-us ua huabtais kav lub tebchaws Pawxias.

23Txawm li ntawd los, cov Levis cov thawjcoj tej tsevneeg uas muab teev tseg rau hauv cov nomtswv tej ntaub ntawv, mas tsuas muaj los txog rau ntu uas Eli-asis tus xeebntxwv Yaunathas tiam xwb.

24Cov Levis cov thawjcoj yog: Hasanpiyas, Selenpiyas, Yesuas, Npeenu-is, Kamiyees, thiab lawv cov phoojywg sawv nrog lawv sib ncag zos, qhuas Vajtswv thiab hais lus sib raws ua nws tsaug, raws li Vajntxwv Daviv uas yog Vajtswv tus neeg tau samhwm tseg lawm.

25Cov zov lub Tuamtsev tej chav rau khoom ntawm cov roojvag muaj npe raws li nram no: Mataniyas, Npanpukiyas, Aunpadiyas, Mesulas, Talemoos thiab Akus.

26Cov neeg no yog cov uas ua neej nyob thaum Yesuas tus tub Yauyakees uas yog Yauxadas tus xeebntxwv tiam, thiab yog lub sijhawm uas Nehemis ua tswvxeev, thiab Exalas uas yog ib tug povthawj txawj ntse paub txog Vajtswv txoj Kevcai.

27Thaum muab tus ntsa yeej uas thaiv lub nroog Yeluxalees fij rau Vajtswv, cov Levis uas nyob txhua qhov tuaj huv tibsi; lawv tuaj koom ua kevcai ua Vajtswv tsaug nrog tej suab hu nkauj, tej suab nkauj nogncas thiab nruas npuaj.

28Cov Levis uas yog tsevneeg hu nkauj puavleej tuaj ntawm cheebtsam uas nyob ibncig lub nroog Yeluxalees thiab tuaj hauv tej zos uas nyob ibncig lub nroog Netaufas,

29thiab tuaj hauv Npethes Nkilenkas, Nkenkas thiab hauv lub nroog Axemaves tuaj.

30Cov povthawj thiab cov Levis ua kevcai ntxuav lawv kom huv; thiab lawv ua kevcai ntxuav cov pejxeem, cov roojvag thiab tus ntsa yeej uas thaiv lub nroog huv tibsi.

31Kuv kom cov Yudas cov thawjcoj tuaj sib sau rau saum tus ntsa yeej thiab muab lawv faib ua ob pab ncig mus kom thoob plaws lub nroog ua Vajtswv tsaug. Pab ib pib ntawm sab xis saum tus npoo ntsa yeej mus rau ntawm lub Roojvag Quavhlawv.

32Thaum cov hu nkauj mus lawm, Hausayas thiab cov Yudas ib nrab thawjcoj mam lawv qab.

33Cov povthawj uas muaj npe li nram no yog cov uas tshuab raj tshuab xyu, lawv yog cov tawm mus raws cov thawjcoj qab: Axaliyas, Exalas, Mesulas, Yudas, Npeenyamees, Semayas thiab Yelemis. Pab uas raws qab ntawd yog Yaunathas tus tub Xakhaliyas uas yog Semayas tus xeebntxwv. (Nws cov yawgkoob yog: Mataniyas, Mukaiyas thiab Xakus uas yog Axefas xeebntxwv.)

36Nws tawm mus raws Semayas, Axalees, Milalais, Nkilalais, Ma-ais, Nethanees, Yudas thiab Hananis uas yog nws cov kwvtij qab. Lawv nqa tej nkauj nogncas thiab nruas npuaj uas Vajntxwv Daviv uas yog Vajtswv tus neeg nyiam ntaus nrog lawv mus. Exalas uas yog tus txawj ntse ua tus coj pab no ntag.

37Lawv pib ntawm lub Roojvag Qhovdej nce ntaiv ntawd mus rau pem Daviv lub nroog, mus dhau plaws Daviv lub loog, thiab rov los rau ntawm tus ntsa yeej ntawm lub Roojvag Qhovdej uas nyob ntawm lub nroog sab hnubtuaj.

38Dua li lwm pab ntawm cov uas ua Vajtswv tsaug txawm taug tus ntsa yeej mus rau sab laug, thiab kuv txawm raws cov pejxeem ib nrab ntawd qab. Peb taug kev mus rau ntawm lub chaw tsomfaj Qhovtxos, dhau mus rau ntawm tus Ntsa Yeej Dav,

39thiab peb pib qhov ntawd mus hla lub Roojvag Efalayees, lub Roojvag Yesanas, Roojvag Ntses, lub chaws tsomfaj Hananees thiab lub chaw tsomfaj Ib Puas mus txog rau ntawm lub Roojvag Yaj. Peb taug mus xaus rau ntawm lub roojvag uas mus rau hauv lub Tuamtsev.

40Yog li ntawd, ob pab neeg uas ua Vajtswv tsaug ntawd puavleej mus txog rau ntawm lub Tuamtsev huv tibsi lawm. Kuv thiab ib nrab thawjcoj uas nrog kuv,

41kuv pab yog xam cov povthawj, thiab cov tshuab xyu muaj raws li nram no: Eli-akees, Ma-axeyas, Miniyamees, Mikayas, Eli-aunais, Xakhaliyas thiab Hananiyas;

42thiab pab uas raws lawv qab yog: Ma-axeyas, Semayas, Ele-axas, Uxis, Yehauhanas, Makhiyas, Elas thiab Exeles. Yelahiyas yog tus coj hu nkauj uas suab nrov tshaj cov huv tibsi.

43Hnub ntawd, lawv coj khoom tuaj fij ntau kawg nkaus li, thiab cov pejxeem muaj kev zoo siab lomzem heev, rau qhov Vajtswv ua rau lawv muaj kev zoo siab. Cov pojniam thiab menyuam los tuaj koom ua kevcai, thiab tej suab uas lawv tuaj ua ntawd nrov ntxhe mus deb heev.

44Lub sijhawm ntawd, lawv tsa ib pab txivneej ua cov saib chav rau khoom uas ntim tej khoom uas cov neeg coj tuaj khaws cia rau hauv lub Tuamtsev uas yog ib feem kaum ntawm thawj phaum qoobloo thiab txiv hmab txiv ntoo uas siav txhua xyoo. Cov txivneej ntawd tes haujlwm yog mus sau tej qoobloo hauv luag tej teb uas nyob ze ntawm tej nroog coj tuaj ua khoom fij rau cov povthawj thiab cov Levis raws li txoj Kevcai uas teev tseg lawm. Tagnrho cov Yudas txaus siab rau cov povthawj thiab cov Levis,

45rau qhov lawv yog cov uas ua kevcai ntxuav dawbhuv thiab kevcai pehawm Vajtswv raws li Vajtswv tau samhwm tseg. Cov hu nkauj thiab cov zov lub Tuamtsev ua lawv lub luag haujlwm raws li txoj kevcai uas Vajntxwv Daviv thiab nws tus tub Xalumoos tau rhawv tseg lawm.

46Txij thaum Vajntxwv Daviv thiab Axafes uas yog tus hu nkauj tiam, yeej muaj cov coj hu nkauj qhuas Vajtswv thiab ua Vajtswv tsaug los lawm.

47Tiam uas Xelunpanpees thiab Nehemis ua thawjcoj, mas cov pejxeem niaj hnub coj lawv tej khoom tuaj rau cov hu nkauj thiab cov zov lub Tuamtsev. Cov pejxeem coj tej khoom fij tuaj rau cov Levis, thiab cov Levis mam muab feem uas yog cov povthawj li rau cov povthawj.

← Chapter 11 Jump to: Chapter 13 →