bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ibibio
/
ibibio
/
2 Peter 1
2 Peter 1
ibibio
Jump to:
Chapter 1
Chapter 2
Chapter 3
Chapter 2 →
1
Saimọn Bita, isʌñutom ye abọsịd ake Yisọs Krais. Awet ñwed ami anọ esọk mbon e-ekebọọhọ utọ nsọñudua mbuọdidem a-abiotto ake ñnyịn, ke adinenido Abasi ñnyịn ye Andinyaaña Yisọs Krais.
2
Mfọn ye emem ayọhọ-ayọhọ akpekap ato ke edidiọọñọ Abasi ye Yisọs Abọọñ ñnyịn ikeene ndufo.
3
Sia adudu Abasi inọ ñnyịn afịd ñkpọ a-asañake ye uwem ye uteñe Abasi, ato adidiọọñọ anye, a-akedatta ubọọñ ye etiido amọ ikood ñnyịn.
4
Ato ke ami anye anọ ñnyịn mme enwọñọ a-asọññọ udua anyʌñ akpon eti-eti; man ndufo edat ammọ ewana ke uduod Abasi; anyʌñ ekebọkkọ mbiara idiọọk itọñ a-asịneke ke ederimbod.
5
Ke ntak anye ami ndin, ndufo isịn ifịk ke adidian nti ido ke mbuọdidem ndufo; ndin ke nti ido, idian ifiọk;
6
ke ifiọk, idian mfadidem, ke mfadidem, idian adibọ ke ime; ke adibọ ke ime, idian uteñe, Abasi;
7
ke uteñe, Abasi, idian esịd enọ ayịneka, ke esịd enọ ayịneka, idian ima.
8
Sia adieke mme ñkpọ ami abaaha ke esịd ndufo ayọhọ-ayọhọ, ammọ eyaenam ndufo ibaaha ibe-ibe, ikiinyʌñ inana mfịd ke udiọọñọ Abọọñ ñnyịn Yisọs Krais.
9
Sia awo ammiinieeghe mme ñkpọ ami ado nnan, itʌmmọ ikịt usʌñ, anyʌñ afre ate ke emaeyeyet mme ñkaan ndiọiñkpọ efep enyʌñ enam imọ isana.
10
Ke ntodo, nditọete, idiọdiọñ isịn ifịk inam ikood ekikoodo ndufo ye adimek ekimekke ndufo asọọñọ ada; sia adieke ndufo enamma mme ñkpọ ami, ndufo idiikọbọke iduọ;
11
sia ado ntom ke ediinọ ndufo ayọhọ udịd adiboiyo ndʌk ke nsi-nsi abio ubọọñ Abọọñ ye Andinyaaña ñnyịn Yisọs Krais.
12
Ntak ami anam ami ndiisʌk itotoiyo ndufo ñkpọ ami afịd ini, akpesʌk ado ndufo ediọọñọke ammọ enyʌñ esọọñọ eda ke akpanikọ a-ndufo enieeghe.
13
Ñnyʌñ ñkere ke anen ami adidemme ndufo ke aditoiyo ndufo ñkpọ ami, adaña nte ami mbaaha ke abʌkidem ami;
14
sia mmediọọñọ mbo ke ñyaawara mfʌt ami nnịm ñkañ keed naña Abọọñ ñnyịn Yisọs Krais akeñwọt miin.
15
Ñyaasịn ifịk aditoiyo ndufo mbaak mmaadakka ndufo esʌk ekan etoiyo mme ñkpọ ami afịd ini.
16
Sia ñnyịn ikikeeneke ñkaña mbʌk a-awo adatta ndufiọk atịppe, ke ini ñnyịn ikinamma ndufo ediọọñọ adudu ye edidi Abọọñ ñnyịn Yisọs Krais, ado ñnyịn ke idem ñnyịn ikidat anyen ñnyịn ikịt ubọọñ amọ.
17
Sia anye akebọ ukpono ye ubọọñ ke ubọk Abasi Ete, ke ini uyo atooho ke akaakan ubọọñ ado asịm anye ntom, ate, “Ami ado Ayịn mmi, Ayịn ima Mmi, e-esịd anem Miin ye anye.”
18
Ñnyịn ke idem ñnyịn ikikop uyo ado naña ato ke anyọñ awuọ ke ini ñnyịn ibaaha ye anye ke adisana abod ado.
19
Ndin emaedọdiọñ esọọñọ ikọ mme brọfed ñnyịn; ndin ndufo eyaetʌm enam, adieke ndufo edikpañ utọñ inọ ikọ ado, naña awo ase utuenikañ a-ayamake ke ñkịm-ñkịm itie, tutu eyo asiere, ntantaafiọñ ubakusen anyʌñ asakka ke esịd ndufo.
20
Akpan-akpan, ana ndufo ediọọñọ ke ibaaha brọfesi ndomokeed ke ñwed Abasi a-brọfed ndomokeed akedatta ifiọk amọ akappa.
21
Sia akanam ba ikọ brọfed itooho ke uduak awo, ado mme etañ ikọ a-atooho Abasi, naña Adisana Sịbidịd adat ammọ usʌñ abo etañ.
Jump to:
Chapter 1
Chapter 2
Chapter 3
Chapter 2 →
All chapters:
1
2
3