2 Peter 3

ibibio

← Chapter 2 Jump to:

1Mme ndima ufan, ami ado ayọhọ deta iba a-nnọọhọ esọk ndufo. Ñwed naña iba editoiyo adinam ndufo enie eti akikere.

2Ñyem ndufo etoiyo mme ikọ mme ndisana brọfed eketaña ke anyan ini a-akeboiyeke ye ewʌhọ Abọọñ ye Andinyaaña ñnyịn akinọọhọ ato mme abọsịd ndufo.

3Ke kpa ifed; ana ediọọñọ ebo ke mme akpatre usen, mme anọọ awo ñyọọ eyaedi, enọọ ñyọọ enyʌñ ekeene mme ndiọi udọñ ammọ.

4Ammọ eyaebo, “Mmọ anye ‘editịmme ndi’ a-anye akenwọñọke? Sia tọọñọ mme ete ñnyịn ekekpañña, afịd ñkpọ aba naña akesʌk aba tọọñọ ke ntọọñọ ederimbod.”

5Ado ammọ ekookoi efre ete ke anyan ini, ato ke ikọ Abasi ikpaanyọñ amaaba, ye isọñ, e-ekesiooho eto mmọọñ enyʌñ edat mmọọñ ebod.

6Ato mmọọñ ami ñko ke ekedat efʌk enyʌñ esobo ederimbod a-akebaaha idahado.

7Ato kpasʌk ke ikọ ado e-enịm ikpaanyọñ ye isọñ abaaha idahami enọ ikañ, sia enịm enọ usen ikpe ye edisobo mbon a-amidiọọñọke Abasi.

8Ado ekiifre ñkpọ keed ami, mme ndima ufan, usen keed ke anyen Abọọñ aba nte tọsịn isua, tọsịn isua anyʌñ aba nte usen keed.

9Abọọñ iyeede ke adinam enwọñọ amọ, naña mme awo ekere ebo ke anye a-ayeet. Anye akap anie anyan ime ye ndufo, inyʌññọ iyem ba awo keed atak, ado ayem afịd awo etua ñkpọfiọk enyʌñ ekappa esịd.

10Ado usen Abọọñ adiiwat nte inọ. Ikpaanyọñ ayaaboiyo afep ye ekamba uyom; ikañ ayaasobo se edat ebot ederimbod, ndin isọñ ye afịd ñkpọ adina ukpọk.

11Sia ediisobo afịd ñkpọ ntom, nso utọ mme awo ke akpena ndufo edo? Akpena ndufo edu adisana ye uwem ke uteeñe Abasi

12naña ndufo etie ebet usen Abasi enyʌñ eyem asọsọp adi. Usen ado ke ediisobo ikpaanyọñ ke ikañ, ñko se edat enam ebot ederimbod eyaetara ke akpọsọñ ufiop.

13Ado akeene enwọñọ amọ ñnyịn idot anyen ibet ufa anyọñ ye ufa isọñ, idʌñ adinenido.

14Ke ntodo, mme ndima ufan, sia ndufo etieeghe ebet mme ñkpọ ami, esịn afịd ifịk nọ edikịt ndufo naña enana ntọi, enana ndo enyʌñ eba ke emem ye anye.

15Enyʌñ edat nte ke anyan ime Abọọñ ñnyịn awuọ adinyaaña, kpa naña adima ayịnete ñnyịn Bọọd adat ifiọk Abasi akenọọhọ anye awet anọ esọk ndufo.

16Anye awet afịd ñwed amọ ke usʌñ keed, atañ abaña mme ñkpọ ami. Ubaak ñkpọ a-adọñọke ke mme deta amọ a-asọñ edinwaña awo, ndin mbon ndisịme ye mbon una iwuuk eyʌttọ ikọ ado enịm, kpa naña ammọ enam ye ikọ Abasi ñnwen, edat esobo idem ammọ.

17Ke ntodo, mme ndima ufan, sia ndufo emaekediọdiọọñọ ñkpọ ami, ekpeme mbaak mme abiad ibed ediben ndufo etịn usʌñ enyʌñ enam ndufo eduọọk itie nsọọñọnda ndufo.

18Ado ekọọd ke mfọn ye ifiọk Abọọñ ye Andinyaaña ñnyịn Yisọs Krais. Yak ubọọñ anie anye ke ami ye ke nsi-nsi, Amen.

← Chapter 2 Jump to: