Titus 1

ibibio

Jump to: Chapter 2 →

1Bọọd, ayịnufọk Abasi mme abọsịd Yisọs Krais ke mbuọdidem mbon a-Abasi amekke ye ifiọk akpanikọ a-adatta aka ke ido Abasi,

2mbuọdidem mme ifiọk a-akọñọke ke idodanyen nsi-nsi uwem, ake Abasi, anye a-mmiisʌhọke nsu, a-akeñwọñọke mbemiso aditọọñọ ini,

3ndin ke adikem ini amọ e-ekenịmme anye adat ikọ amọ adiwọt unwana ato ke adikwọrọ ikọ e-ekeyakka ennọ ke ewʌhọ Abasi Andinyaaña ñnyịn.

4Awet anọ Taitọs, ata ayịn mmi ke ukem-ukem mbuọdidem a-ñnyịn iwuanake: Mfọn ye emem a-atooho Abasi Ete ye Krais Yisọs Andinyaaña ñnyịn.

5Ntak ami ñkukpọññọ fiin ke Kret akedo nọ afo aneeñe mme ñkpọ se awo miikikweñeke anịm anyʌñ amek mme adaidaha ke afịd abio, naña ami ñkuwọt fiin usʌñ.

6Adaidaha ufọkabasi ana anana ndo, ado ebe anwaan keed, awodeen a-nditọ amọ enịmme Abasi ke akpanikọ ndin idoññoke se esịn ke ibad atu mbon e-efaiyake afai enyʌñ etịtutọñ.

7Sia emaeyak utom Abasi esịn ke ubọk adaidaha, inaaha anye anie ndo ndomokeed, inieeghe nsọñido, isọppọ iyadesịd, inaaha akpa mmịn, inaaha anye aba afai-afai, idooho awo a-ayemme udodo ke usʌñ ñwo.

8Utu ke ado anye ana atat ubọk, awo a-amaaha se ifọn, a-anieeghe mfadidem, adinen awo, adisana mme atʌnọ-idem awo.

9Anye ana amʌm akama ke akpọsọñ ubọk eti etob naña ekekpeep, nọ ato do anye akan asọọñọ mbon ñko ukod ke ata eti ukpeeb anyʌñ asịn mbon e-ebiọọñọke ikọ Abasi.

10Sia ebañña mme uwak eniin-eniin, mme ñkaña mbon utaañ ikọ ye mme abiaaña-abiaaña, akpan-akpan mbon ñka e-enịmme mboppo.

11Ana etre ammọ, sia ammọ ebiad afịd ufọk mme awo ato ke ammọ adikpeep se mmiikpinaaha ammọ ekpeeb, ndin ami ato ke ntak abiaaña udod.

12Kpa keed ke atu mme brọfed ammọ abo ate, “Mme mbon Kret afịd ini edoñño mme asu nsu, mme ndiọi unam afai-afai, mme mbon ifu, ediọi itọñ.”

13Ikọ ntiense ami ado akpanikọ. Ke ntak ado, sua nọ ammọ akpọsọñ, nọ atoodo ammọ ekpenie nsọñidem ke mbuọdidem

14ndin idiikpaaña utọñ inọ mme ñke Yuu mme ewʌhọ mbon e-esịnne akpanikọ.

15Ke mbon se isana, afịd ñkpọ ado adisana, ado mbon edoññoke abʌd-abʌd ibon, inyʌññọ inịm ikọ Abasi ke akpanikọ, ñkpọ ndomokeed isanake. Ke akpanikọ afịd esịd ammọ mme akikere ado abʌd-abʌd.

16Ammọ edat ke mmimmọ imidiọọñọ Abasi, ado ato ke edu uwem ammọ, ammọ ekañ anye. Ammọ edoñño mme mbon ndubiam, etre utọñ ndin idotto edidat nnam ñkpọ se ifọn.

Jump to: Chapter 2 →