Titus 2

ibibio

← Chapter 1 Jump to: Chapter 3 →

1Afo anie adikpeeb se isaña ikikem ye nti ukpeebñkpọ.

2Kpeeb mme ñkaan ideen enie mfuud-mfuud ido a-adoddo mme ukpono, mfadidem, ye nsọñidem ke mbuọdidem, ke ima ye ke adiyọ ukuud.

3Ntodo ñko, kpeeb mme ñkaan ibaan adinie ukpono ke usʌñ naña ammọ edu uwem, ekuudoñño mme abiad awo anyịn mme mbon ukpa mmịn amegheke, ado ekpeeb se ifọn.

4Ndin ammọ ekeme adikpeeb mme ñka ntək ibaan adima mme ebe ammọ ye mme nditọ,

5adinie mfadidem ñnyʌñ ndoñño ndisana, adima inam ñkpọ ke ufọk, adinie ido se ifọn adinyʌñ nsuukiwuod nnọ mme ebe ammọ mbaak ato do awo ba keed adibiad ikọ Abasi.

6Ntoro ñko, sọọñọ mme ñkparawa ikpad ate ammọ enie mfadidem.

7Ke afịd ñkpọ wọt ammọ nda usʌñ ke adinam se ifọn, ke ukpeebñkpọ ndufo iwọt etiido, akpan ekikere, ye

8nnen-nnen usʌñ utañ ikọ a-awo mmiikemeke ikịt ndudue nọ ato do mbon i-ibiọọñọke ndufo ekop abuud ke ntak adooho ammọ inieeghe idiọọkñkpọ ndomokeed aditañ idian ñnyịn.

9Kpeeb mme ifʌn adisuuk iwuod nnọ mme eteufọk ammọ, ke afịd ñkpọ, enwana adinam se inem eteufọk ammọ esịd, ekuubọọrọ ammọ ikọ,

10ndin ekuunyʌñ uyịp ñkpọ ammọ, ado awọd nte ke amekeme inịm ammọ ke akpanikọ, nọ ato do ammọ ekpenam ukpeebñkpọ a-abañake Abasi Andinyaaña ñnyịn ado uyai-uyai.

11Sia mfọn Abasi a-adatta adinyaaña adi awuọ awọd idem anọ afịd awo.

12Anye ikpeeb ñnyịn adibo “iyo-o” ke unana adisana ido Abasi ye akwa idiọọk udọñ ñkpọ ederimbod, ye edidʌñ ke mfadidem, uwem a-adooho nnen-nnen ye mme nti uwem ido Abasi eyo mfịn ami,

13adaña ini ñnyịn ibette idodanyen adidiọñ uyai adiwuọ ñwọd idem, akwa Abasi ye Andinyaaña, Yisọs Krais,

14a-akeyakka idem amọ anọ ke ntak ñnyịn nọ ifak ñnyịn asio ke afịd idiọọkñkpọ adinam asana anọ idem amọ mme awo e-edoññoke ata ake amọ, e-enieeghe udọñ adinam se ifọn.

15Ami ndin ado mme ñkpọ se ekpekpeeb. Nọ nsọọñọ ñkpad nyʌñ isua nọ ke afịd adudu. Kuuyak awo ba keed use fiin ke ndek.

← Chapter 1 Jump to: Chapter 3 →