1 Peter 2

Ika 2018 Bible

← Chapter 1 Jump to: Chapter 3 →

1Latọ nị nwan ịchọ-njọ ile, ẹro ile, ihunnaị, iwe-ẹnya lẹ ikuja oku ịhịan.

2Nọkẹ ụmụ wẹ mụ nke ọhụn, a chọshi ni mirin-ẹran imẹ-mmọn ahụn rị nsọ ikẹn — kẹni ụnụ e gi ẹ e sueru ogo nzụọpụha,

3hụnnị ụnụ danmịngụ Di-nwọnni-ẹnyi, hụn a nị Di-nwọnni-ẹnyi a rịka mma.

4Ụnụ a bịagụọ nwan d'e kunrun ẹ: ọmụma ahụn rị ndụn, hụn ịhịan jụ; kanị ẹnya Osolobuẹ, ọmụma ọ họrị hụn rị okẹn mkpa k'ọ wụ.

5Imẹ ẹ, ụnụ nwẹn wụzị ọmụma rị ndụn hụn wẹ rị e gi a tụn ụlọ imẹ-mmọn, kẹni ụnụ hụn ụzọ wụrụ ndị nchụn-ẹjan rị nsọ, ndị gha ẹka Jizọsị Kraịstị a chụn ẹjan imẹ-mmọn hụn a sụọ Osolobuẹ.

6Makẹni, Ẹkụkwọ-nsọ e kugụ a, sị, “Lee n'ẹ, m rị e butọ ọmụma imẹ obodo Zayọnụ, ọmụma gin'ẹ; ọmụma m họrị ahọrị, hụn rịgbu enwẹn ẹ mkpa. Ifẹnrẹn emẹkọ onyẹ kwerinin'ẹ.”

7Ya wụ, ọmụma ahụn rị ụnụ nwẹn kwerini mkpa ọda-ọda; kanị nke ndị hụn kwerilẹni — “Ọmụma ndị rị a tụn ụlọ jụ, a wụrụọlẹ hụn gi ụlọ!”

8Ọ wụrụgụọzị “Ọmụma w'a kpọgburu; nkumẹ a han wẹ a dan.” Agbayeni wẹ oku hụ haịn wẹ gi kpọgburu kẹ wẹ dọn detọnị wẹ ya.

9Kanị, ụnụ nwẹn wụ agbọ wẹ họrị ahọrị; ndị nchụn-ẹjan Eze; ebọn rị nsọ; ndị nke Osolobuẹ kẹti-kẹti, kẹni ụnụ a ghọsị ẹka-ọrụn Onyẹ hụn kpọpụha ụnụ imẹ ishi bu ụnụ che imẹ ukpẹ ẹ rịgbu enwẹn ẹ mma.

10Ogẹn mbụ, ụnụ “ẹlẹ ndị nke Osolobuẹ”, kanị, ụnụ a wụrụọlẹ nwan ndị nke ẹ; “omikẹn ẹ ete runi ụnụ ẹka mbụ”, kanị omikẹn ẹ e rugụọ nwan ụnụ ẹka.

11Ezigbo umunẹ m, m rị a rịọ ụnụ nọkẹ ndị wụ abịamabịa lẹ ndị rịlẹni alị wẹ, gbanị nị eje-ẹgụn a lụsọn umẹ-ndụn ụnụ agha ọsọ.

12E bi ni ọhụnma imẹ ndị alị ọzọ kwerilẹni; kẹni, wẹ gha e kuja oku ụnụ nị ụnụ rị e mẹ eje-ihiẹn, wẹ hụ a hụn ihiẹn rị mma ụnụ rị e mẹ, kẹni wẹ gi ẹ ja Osolobuẹ mma Ụhụọhịn hụ o k'a bịa.

13Gi ni ufiri Di-nwọnni-ẹnyi e humẹni ndị-ọkịkị ile isi: humẹni ni eze isi nị ya wụ onyẹ-isi ọkịkị,

14ụnụ e humẹni ndị Gọvanọ isi nị wẹ wụ ndị eze tumẹ d'e ye ndị e mẹ eje-ihiẹn afụnfụn, a ja ndị e mẹ ihiẹn rị mma mma.

15Ẹrịra kẹ Osolobuẹ chọ a, nị ụnụ gi imẹ-mma kpukin ndị-nzuzu rị e ku ihiẹn wẹ marịnlẹni ọnụ;

16e gi ni agụngụn ndị nwọn enwọn wẹ e mẹ ẹ — kanị ẹlẹkwọ hụn wẹ gi e kpumẹ eje-obibi, kama, obibi ndị wụ igbọn Osolobuẹ.

17A gbaye ni ịhịan ile; e nwọn ni ihiẹn-ọsụsụọ ndị Itu-Kraịstị ibe ụnụ; a tụ nị egun Osolobuẹ; a gbaye ni eze.

18Ndị rị okpuru ịhịan, e humẹni ni ndị ụnụ rị okpuru wẹ isi, a gbayechanrịn wẹ, ẹlẹ ndị-ẹfọma lẹ ndị ẹka-alụlụa sụọ, kanị kẹ ndị ẹfọ rịlẹni mma.

19Ọghọ rọ nị ịhịan rị e dingbu afụnfụn furulẹni makẹni ọ rị e ro Osolobuẹ.

20Kị wụ erere i omẹni afụnfụn eje-ihiẹn i mẹ k'i dingbu? Kanị, omẹni mma i mẹ kẹ wẹ gbuni i ili, nị y'e digbu ẹ, ọghọ rọ ẹnya Osolobuẹ.

21Ịya kẹ wẹ kpọnị ụnụ, makẹni Kraịstị tazịkwọnị ụnụ afụnfụn, latọ nị ụnụ ihiẹn ụnụ e leri, kẹni ụnụ hụn ụzọ e sọn nzọmụkụ a.

22O mẹni njọ; onwọnni ntụ wẹ nụ ọnụ a.

23A kpari w'ẹ, ọ kparigwarịnị; k'ọ rị a ta afụnfụn, ọ nyannịnị wẹ isi. Kama, o we enwẹn ẹ kwanị Osolobuẹ, onyẹ hụn a han ezigbo eṅẹn.

24Kraịstị lẹ enwẹn ẹ gi ẹhụ a buru njọ ẹnyi, bu ẹ shi elu osisi ahụn, kẹni ẹnyi wụrụ ndị nwụnnahịn njọ, gi ndụn ẹnyi mẹmẹ ihiẹn Osolobuẹ chọ. Ẹhụ wẹ rụsọnmẹ ẹ kẹ ẹnyi gi dịnhịn.

25Ụnụ te rị a kpahu kẹ atụnrụn, kanị ụnụ e kinhẹngụọ nwan d'e kunrun onyẹ hụn e du ụnụ kẹ atụnrụn, onyẹ hụn e lepụ umẹ-ndụn ụnụ ẹnya.

← Chapter 1 Jump to: Chapter 3 →