1 Peter 3

Ika 2018 Bible

← Chapter 2 Jump to: Chapter 4 →

1Nwunyẹ, mẹzikwọ ẹrịra. E humẹni di i isi, kẹni, omẹdẹni di ekwerini oku Osolobuẹ, ezigbo omumẹ nwunyẹ ẹ a dọbanhan a imẹ Osolobuẹ bụ onwọnni oku wẹ gwa a;

2makẹni ọ hụ a hụn kẹ i dọn rị e bi obibi rị nsọ, e gi egun Osolobuẹ e bi.

3Anịlẹ ni mma ụnụ wụrụ nke ẹhụ, mma ịchọ ntutu mma lẹ iyi goru lẹ iyi ẹkwa ma mma.

4Ka nị nị mma ụnụ wụrụ mma imẹ obi, mma ahụn ghalẹni a fapụ, mma imẹ-jụụ lẹ ịwụ-ọmẹhẹn, hụn rị mkpa ọda-ọda ẹnya Osolobuẹ.

5Ẹnịna kẹ ikpoho rị nsọ gi Osolobuẹ dọn ẹnya dọn chọ enwẹn wẹ mma mbụ-mbụ, e humẹni di wẹ isi.

6Ẹrịra kẹ Sẹra dọn gbaye Ebraham, a kpọ a “nna m.” Ụmụ a ikpoho kẹ ụnụ wụ omẹni ụnụ e mẹsọnmẹ ihiẹn rị mma, nị ụnụ anịnị egun mẹri ụnụ.

7Di, ẹrịra kẹ i k'e gizi uche e sọn nwunyẹ i nọkẹ onyẹ marịn nị ikpoho ka alụlụa a rị; e ye ẹ ọghọ makẹni o nwọnzikwọ ndụn ọhụn ahụn Osolobuẹ e ye ọfẹ kẹ yụ nwẹn. E mẹ ni ẹnịna makẹ ọdakin gha a rị ekpere ụnụ.

8Nke ikpanzụụn, ụnụ ile, e gi ni obi ohu e bi; e ro ni k'ọ rị ibe ụnụ; a nị nị ihiẹn ibe ụnụ a sụọ ụnụ kẹ umunẹ; e mẹni omikẹn ibe ụnụ; e welụa nị enwẹn ụnụ alị.

9Emẹgwarịkwọlẹ ni ịhịan eje-ihiẹn mọbụ kpọgwarị wẹ iyi. Kama, gọzi ni wẹ, makẹni ngọzi kẹ Osolobuẹ kpọ ụnụ d'e weri.

10Makẹni Ẹkụkwọ-nsọ sị, “Onyẹ chọ ndụn, onyẹ chọ nị elu ẹ rị mma, ya wepụ eje-oku ire ẹ; ya wepụzịkwọ oku e dufieni ụgb'ọnụ a.

11Ya gbakịtọ eje-ihiẹn azụụn — mẹmẹ ihiẹn rị mma; ya chọma udọn, chụsọnmẹ ẹ.

12Makẹni, ẹnya rị mma kẹ Di-nwọnni-ẹnyi e lee ndị e mẹ ihiẹn ọ chọ, ntịn a rịzịkwọ ekpere wẹ. Kanị, eje-ẹnya k'o lee ndị e mẹ eje-ihiẹn.”

13Onyẹ k'a sa ẹka mẹ ụnụ ihiẹn ọwụlẹ omẹni ụnụ wụ ndị ihiẹn rị mma a dụ omumẹ?

14Ọsụọn'a nị ụnụ ta afụnfụn makẹ ezi-omumẹ, ya wụ nị ndị Osolobuẹ gọzi kẹ ụnụ wụ. Atụlẹ ni nwan egun wẹ; emẹhunmẹlẹ ni.

15Ka yechanrịn nị Kraịstị ọnọdị a imẹ obi ụnụ nọkẹ Di-nwọnni ụnụ, ụnụ a kwademẹ ogẹn ile nị ụnụ a za onyẹ ọwụlẹ jụ ụnụ oku olilẹnya ụnụ.

16Ka e gi ni nwayọ lẹ mgbaye e mẹ ẹ. E dọnmẹ ni obi ụnụ ọchan, kẹni ifẹnrẹn mẹ ndị hụn e kuja ihiẹn rị mma ụnụ rị e mẹ imẹ Kraịstị.

17Ọ ka mma nị ịhịan mẹ ezi-omumẹ, ta afụnfụn omẹni uche Osolobuẹ rọ, karị nị ịhịan mẹ eje-ihiẹn.

18Makẹni, Kraịstị gi ufiri njọ tazịkwọ afụnfụn, nwụn, (mgbe ohu k'ọ nwụn, ọ nwụnkọzị), Onyẹ rị ọchan hụn nwụnnị ndị njọ ọnwụn — kẹni ọ hụn ụzọ wẹhẹ ẹnyi ile ebe Osolobuẹ rị. Wẹ gbu ẹ, ọ nwụnhụn kẹ ịhịan, kanị Chuku nọ mẹ mmọn a rị ndụn,

19ọ nọ jẹn d'e zi ndị-mmọn rị ngan alị-mmọn ozi ọma —

20ndị hụn gilẹni oku-Chuku wẹ gwa wẹ dọn ogẹn mbụ, ogẹn mbụ ahụn Osolobuẹ gi rị e din ndidin e che; ogẹn hụ Nụa gi rị a tụn ụgbọ-mirin hụ pụ-ichẹn, hụn wẹ gi zụọpụha ndị bulẹni ọda — madụ ẹsatọ kẹ wẹ zụọpụha, wepụha imẹ mirin ahụn.

21Wẹ gi ọnwan gwatọ ẹnyi kẹ mirin-Chuku dọn nwan a zụọpụha ịhịan kikẹnni: ẹlẹ wẹ rị e gi mirin-Chuku a wụpụ unyin rị ịhịan ẹhụ, kama, ịhịan gi ẹ a ghọsị Osolobuẹ n'o gi obi ẹ ile bịa d'e kunrun ẹ, ghahanị olihi Jesu Kristi gha ọnwụn lihi.

22Jesu rị nwan ẹka-nni Osolobuẹ imẹ elu-igwee ebe ọ lashi; ndị mmọn-ozi ile lẹ ọkịkị ile lẹ ikẹn ile rị nwan okpuru ẹ.

← Chapter 2 Jump to: Chapter 4 →