2 Timothy 1

Ika 2018 Bible

Jump to: Chapter 2 →

1Mmẹ wụ Pọlụ de ẹkụkwọ-ozini. M wụ onyẹ-ozi pụ-ichẹn Kraịstị wụ Jizọsị ghahanị uche Chuku. Wẹ tumẹ m onyẹ-ozi pụ-ichẹn d'a rụn ọrụn Osolobuẹ gha e mẹzu nkwa ahụn o kwe n'o k'e ye ndị rị imẹ Kraịstị wụ Jizọsị ndụn.

2M rị e dejẹnni ezi nwa m wụ Timoti: ẹfọma, omikẹn lẹ udọn hụn gha ẹka Chuku Nẹdi lẹ Kraịstị wụ Jizọsị Di-nwọnni-ẹnyi bịa ya rịnị ị.

3M hụ a kpanmịn Osolobuẹ m gha a nyanhan ị ogẹn ile m gi e mẹ ekpere uhinhin lẹ efinnaị, Osolobuẹ hụn hụn m rị e dọnmẹ obi m ọchan e fe kẹ ndị nẹdi m dọn mẹ.

4M gha a nyanhan ẹnya-mirin i, ọ hụ a rị m nị m hụn ị, kẹni ịghọghọ m zu oke.

5M hụ a nyanhan okukwe i hụn gha akpakalị obi i pụha; okukwe ohu hụ bu ụzọ rị imẹ nnẹ i kanị wụ Lọịsị lẹ nnẹ i wụ Yunisi, hụn m marịn n'ọ rịzịkwọ nwan imẹ i.

6Ufiri ẹ, m rị a nyanhann'ị n'ị fụnwun oyiye Osolobuẹ hụn rị imẹ i, hụn Osolobuẹ ye i ogẹn m gi bu ẹka kwasị ị.

7Makẹni, Osolobuẹ eyeni ẹnyi mmọn egun, kama, mmọn ikẹn lẹ ihiẹn-ọsụsụọ lẹ ikwọndọn-enwẹn ịhịan k'o ye ẹnyi.

8Emẹkwọlẹ nwan ifẹnrẹn iku-oku Onyẹ-nwọnni-ẹnyi mọbụ ifẹnrẹn mmẹ nwẹn hụn rị nwan imẹ ngan makẹ ufiri ẹ. Kama, gi ikẹn Osolobuẹ sọn ẹnyi tanị oziọma afụnfụn.

9Makẹni, Osolobuẹ wụ onyẹ zụọpụhanị ẹnyi, kpọ ẹnyi oku rị nsọ. Ẹlẹ ọrụn-ọma ẹnyi rụn haịn o gi kpọ ẹnyi, kanị uche ẹ lẹ ẹfọma a haịn. O mẹgụọnị ẹnyi ẹfọmanị imẹ Kraịstị wụ Jizọsị nị ụwa d'e bidọn,

10ọ nọ mẹ ẹ pụha ifọn ogẹnni ghahanị ọbịbịa Kraịstị wụ Jizọsị Onyẹ-nzụọpụha ẹnyi bịa imẹ ụwa. Kraịstị wụ Jizọsị e mẹrigụọ ọnwụn, napụ a ikẹn. O gigụọ Oziọma wepụha ndụn lẹ ibi-jẹnrin-ejẹn ifọn.

11Ufiri oziọmanị k'o gi tumẹ m onyẹ e zisọnmẹ ozi, onyẹ-ozi pụ-ichẹn lẹ onyẹ-nkuzi;

12ufiri ẹ kẹ m gizi rị a ta afụnfụn ẹnịna. Kanị ifẹnrẹn arị e mẹ m, makẹni a marịnghọ m onyẹ m gi dọn ẹnya; a marịnzịghọ m n'o k'a s'ẹka chedọn ihiẹn m buche ẹ ẹka d'e ru Ụhụọhịn ahụn.

13Sọnmẹ ụdị nkuzi ahụn zu oke ị nụ ọnụ m; e gi okukwe lẹ ihiẹn-ọsụsụọ hụn rị imẹ Jesu Kristi e sọn ẹ.

14Chedọn ihiẹn-ọma ahụn wẹ buche i ẹka; mẹ ẹ ghahanị eyemẹka Mmọn-nsọ hụn bi imẹ ẹnyi.

15Y'a marịnghọ nị ndị ile rị Ẹgbẹrẹ Eshịa a gbakitọgụọ m azụụn — kẹ Figelọsụ kẹ Homojinisi.

16Osolobuẹ ya mẹni ezi-lẹ-ụlọ Onẹsiforọsụ omikẹn, makẹni Onẹsiforọsụ a gbaka m umẹ! Ifẹnrẹn ẹgan m e mẹdẹn'ẹ.

17Kama, o ruhụ Rom, ọ nọ chọ m ntan chọ m imọn d'e ru n'ọ hụn m.

18Di-nwọnni-ẹnyi ya mẹni Onẹsiforọsụ omikẹn Ụhụọhịn hụ! Ịyụ lẹ enwẹn i a marịnzịghọ ẹka ile o yeni m imẹ Ẹfẹsọsụ.

Jump to: Chapter 2 →