2 Timothy 3

Ika 2018 Bible

← Chapter 2 Jump to: Chapter 4 →

1Ka ya we i ẹnya ọhụnma-ọhụnma nị o ru ogẹn ikpanzụụn, elu jẹnkọ d'e zegbu enwẹn ẹ.

2Makẹni, ịhịan k'a wụ ndị enwẹn wẹ a sụọ, ndị egho a sụọ, ndị a nyan isi, ndị mpache, ndị mkpari, ndị e nupụ isi okpuru ndị mụnị wẹ, ndị ọhụnma-ogodan, ndị nwọnlẹni ihiẹn rị nsọ ẹnya wẹ.

3Wẹ k'a wụ ndị ẹfọ-njọ, ndị oku ghalẹni a gụ ẹfọ, ndị e kuja oku ịhịan, ndị ghalẹni e kwọndọn enwẹn wẹ, ndị obi wẹ rị azụụn, ndị ihiẹn rị mma ghalẹni a sụọ;

4Wẹ k'a wụ ndị ghẹrẹ-ghẹrẹ-ghẹrẹ, ndị a sị “ihiẹn chọ n'o mẹ ya mẹ”, ndị enwẹn wẹ jun ẹfọ, ndị ihiẹn a sụọnị ka mkpa karị Osolobuẹ.

5Wẹ k'a wụ ndị e mẹchanrịn omẹnalị rị ofufe Osolobuẹ, kanị ikẹn w'e gi bi obibi rịn'a a rị imẹ ndụn wẹ. La ndị nọ ẹrịra tọ.

6Ụfọdụ imẹ wẹ gi ẹro a rụbanhan iwe ịhịan a rẹrẹrị ikpoho nwọnlẹni uche, hụn obi rị e gbu mgbu yeni njọ wẹ, ikpoho ẹgụn ihiẹn rị ichẹn-ichẹn rịlẹni mma rị e buhunmẹ,

7ikpoho w'a tọ a kuzi, kanị w'a ra s'ẹka marịn ezioku.

8Kẹ Janesi lẹ Jambresi dọn papụ oku Mozizi, ẹrịra kẹ ndịnị uche wẹ rụgụ, hụn o mẹni a jụgụọlẹ wẹ wẹ ebe ofufe Kraịstị rị, dọn a papụ ezioku.

9Kanị, ọ ghabiekọnị wẹ, makẹni nzuzu wẹ k'a pụha ihun ịhịan ile kẹ nke madụ ẹbụọ ahụn wụ Janesi lẹ Jambresi.

10Yụ nwẹn, y'a hụngụọ nkuzi m, obibi m, ihiẹn m chụkọ, okukwe m, ndidin m, ihiẹn-ọsụsụọ m, kẹ m dọn wuzo,

11ukpokpo ile wẹ kpokpo m lẹ afụnfụn ile m rị a ta. Y'a marịnghọ ihiẹn ile m hụn imẹ Antịọkụ, imẹ Ikoniọm lẹ imẹ Listra. Y'a marịnghọ okẹn ukpokpo m din, kanị Di-nwọnni-ẹnyi nọ gbapụhachanrịn m imẹ wẹ ile.

12Eziẹ, wẹ k'e kpokporịrị ndị ile chọ nị wẹ bi obibi ndị e fe Osolobuẹ imẹ Kraịstị Jizọsị.

13Kanị ndị eje-ịhịan lẹ ndị ndufie jẹnkọ d'a gha a jọwaye njọ; e dufie ndị ọzọ, ndị ọzọ hụ e dufie wẹ.

14Kanị ịyụ nwẹn, mẹsọnmẹ ihiẹn hụn ị mụ, hụn i kweri ọhụnma-ọhụnma, makẹni y'a marịnghọ onyẹ ị mụnarịn a;

15y'a marịngụọzị Ẹkụkwọ-nsọ gha ẹhụ nwa-ndu i lala, Ẹkụkwọ-nsọ hụn k'a saẹka ye i amamihiẹn y'e gi nwọn nzụọpụha ghahanị ikwerini Kraịstị wụ Jizọsị.

16Ihiẹn ile rị Ẹkụkwọ-nsọ gha ọnụ Osolobuẹ pụha; wẹ e gi ẹ a kuzi, a jụgbọ, e wekinhẹn ịhịan ebe ọ nọ fie ụzọ, a zụn ịhịan ọzụnzụn wẹ gi e mẹ ihiẹn Osolobuẹ chọ,

17kẹni onyẹ nke Osolobuẹ wụrụ onyẹ wẹ zụn ọhụnma, hụn k'a s'ẹka mẹ ihiẹn ile rị mma.

← Chapter 2 Jump to: Chapter 4 →