Habakkuk 1

Ika 2018 Bible

Jump to: Chapter 2 →

1Ọnwan wụ ihiẹn Osolobuẹ ghọsị Habakọkụ onyẹ-amụma.

2Euu Osolobuẹ, nanị m'a kpọkubiehan ị i kebe za m?! M hụ e yi, “Wẹ rị e mẹkwọ eje-ihiẹn alịnị! Wẹ rị e mẹkwọ eje-ihiẹn alịnị!!” onwọnni ihiẹn i mẹ.

3K'ị rị a nịnị m a hụn njọ lẹ nsọngbuni ile? A nị m e legha ntikpọ lẹ eje-obibini ile; ịhịan ile hụ a dọ ndọndọ, e kpe.

4Iwu a dangụọ nwan ngụrọ, ezigbo eṅẹn arịzị a; makẹni ndị njọ a karị ndị ezi-omumẹ ẹka; e bugụọ wẹ ezioku isi kpọma alị.

5Lehunmẹ alị ichẹn-ichẹn! Lemẹ ẹnya, n'ị hụn ihiẹn k'a gba ị ngharị ẹnya! Makẹni, m rị e mẹ ihiẹn ogẹn nke ụnụ, hụn o mẹni wẹ gwa ị ya, y'e kwerikọ!

6M rị nwan a kpọli ndị Kal'di alị Babilọnụ, ndị hụ ẹfọ jọ, hụn e mẹ ikẹn-ikẹn; hụn rị a kpa ikẹn elu ụwa ile, e werisọnmẹ obodo wụlẹni nke wẹ.

7Okẹn ihiẹn-egun kẹ wẹ wụ! Ihiẹn rị wẹ mma ẹnya kẹ w'e mẹ; onyẹ sụọnị wẹ kẹ w'a gbaye!

8Ẹshin-agha wẹ a gbanahịndẹ liopadị ọsọ, e rọn egun karị eje-anụ wụ wofu ẹgụn rị a gụn, a zụnbanhan ọgbọ-agha ẹrịra. W'a ghadẹ ebe tegbu enwẹn ẹ e wẹhẹ ndị e nyinni wẹ ẹshin-agha; w'e be nkanran ọda-ọda nọkẹ anwụnkwọ chụkọ ihiẹn o ri.

9Ntikpọ, ntikpọ rị wẹ ile obi; arị wẹ e lee ẹnya azụụn, ndị wẹ rị e mẹri a kpụnrụn bu ọda kẹ ẹjan.

10Onwọnni ihiẹn w'a kpọ ndị-nze alị ọwụlẹ, w'a mụdẹ ndị-ọkịkị lẹ okẹn mgbọn wẹ ile ẹmụ, wẹ dụọlẹ ẹjan ye mgbọn hụ, ọ ban wẹ ẹka;

11a kpọghafe wẹ nọkẹ ufere! Ikẹnnyẹ njọ wẹ ma ikpe, ndị gi ikẹn wẹ họnrin Chuku wẹ!!

12“Euu Osolobuẹ, y'ẹlẹzi Onyẹ hụn rị ẹdẹi ra? Chuku m, Onyẹ-nsọ m, ẹnyi anwụnkọ! Euu Osolobuẹ, y'e tumẹgụọ ndị Babilọnụ n'i gi wẹ ye afụnfụn njọ. Heuu, Okẹn-nkumẹ, y'e tumẹgụọ wẹ nwan n'i gi wẹ jụgbọ.

13Ịyụ, hụn rịkẹnmẹ ọchan, hụn ghalẹni e gi ẹnya e legha eje-ihiẹn, onyẹ ghalẹni e gi ihiẹn furulẹni e mẹ ẹhụ. K'ị shịapụnị nwan ẹnya e lee ndị ghẹrẹ-ghẹrẹ-ghẹrẹ? K'ị gbanị nwan nkịtịn eje-ndị hụ e luepụ ndị ka wẹ mma?

14Y'e mẹgụọ ịhịan nọ nwan kẹ azụn rị imẹ ohimin, ndanndan nwọnlẹni onyẹ k'e kuni wẹ ọnụ wẹ!

15Ndị Babilọnụ hụ e gi okẹn ukpo wẹ a dọpụha wẹ kẹ azụn, e gi ọga a nwụn wẹ, e kpọn wẹ e ye imẹ ụkpalị; a ghọghọ, ẹfọ hụ a sụọ wẹ ụsụọ!

16Ya haịn o gi a chụnyeni ọga a ẹjan, e ye ụkpalị a oyiye nị uwẹ k'o gi e rijun ẹfọ, uwẹ k'o gi e ri kẹ eze!

17Nị wẹ tọ nwan e gi ọga e kpọnrin ịhịan nọkẹ azụn, e tikpọ alị ndị ọzọ bụ ẹgozizi ara mẹ wẹ?”

Jump to: Chapter 2 →