Habakkuk 3

Ika 2018 Bible

← Chapter 2 Jump to:

1Ọnwan wụ ekpere onyẹ-amụma wụ Habakọkụ mẹ. Wẹ bụ a kẹ w'a bụ ẹbụ wẹ gi a kwan ụya.

2“Euu Osolobuẹ, a nụọlẹ m otiti i! Osolobuẹ, ọrụn-atụmẹnya ị atụkakwọ m egun! Rụnzị wẹ nwan ogẹn nke ẹnyini, zụọpụha ẹnyi, rụnghọsịzị ẹnyi ya ogẹn nke ẹnyi; ị gha e bu olulu, dodo nyanhankwọ omikẹn.

3Osolobuẹ gha alị Tẹmanị pụha; Onyẹ hụ rị nsọ gha Ugu Paranị bịa! Ọghọ a jun igwere ile, ụwa ile a ja a mma.

4ọghọ rị a ẹhụ hụ e gbuke kẹ ẹnyanwụn; ẹka a hụ e gbuke, ẹka ahụn o zuemẹ ikẹn ẹ.

5Eje-emu o wela burun'ẹ ụzọ; emu e gbuni sọnk'a azụụn.

6Ọ kụsị, alị nọ mahihie; o lee ẹnya, ndị alị ile a mama piripiri. Ugu ndị rị kete-kete e tiyịya, òke ndị rị ẹdẹi e ziẹntu, makẹni wẹ ile rị okpuru ẹ.

7A hụn m kẹ ndị Kushanị rị iwe wẹ a kwan, hụnzị kẹ ndị Midianị rị iwe wẹ e hue uhue.

8“Euu Osolobuẹ, iyi ndị hụ kẹ ị rị e buni olulu ogẹn hụ? Ra iyi k'i rị e weni iwe hụ? Ra ohimin k'ị rị a kpọnị ọnụma hụ? Uwẹ k'i nyinkọnị ẹshin-agha ị ọkụn-ọkụn, ra wẹ k'i nyinkọnị ụgbọ-ẹshin agha i gi a zụọpụha?!

9Ị nọ sepụha ụta ị, gi ẹ gba ihiẹn ile ị gba! Ị nọzị mẹ mirin huru, gi ẹ kewasọnmẹ alị.

10Ugu a hụn ị k'ị lala, ọ nọ fịkọma yeni egun; okẹn mirin e zuemẹ; mirin ohimin e yi oro, kịshin'i ẹka elu;

11ẹnyanwụn lẹ ifọn e wuzo ụzọ ohu imẹ elu, yeni ọbara-ụta ị rị e gbukeni lẹ obo i rị e be nwaịn-nwaịn fekọnị.

12Ị nọ gi iwe zọ ụwa ụkụ, gi olulu zọkpụkpọ alị ichẹn-ichẹn.

13Ị nọ jẹnpụha d'a zụọpụha ndị nke i, d'a zụọpụha onyẹ hụn i tumẹ. Ị nọ gweriẹn onyẹ-isi eje alị hụ, napụchanrịn wẹ ikẹn wẹ.

14Ị nọ gi ihiẹn-ọgụn a zupu ndị odogun-agha a isi, kẹ wẹ kpọha nọkẹ okẹn ufere d'e feyịya ẹnyi; e yi, a ghọghọ, nọkẹ onyẹ gi nzuzue bịa d'e gburi ndị nwọnlẹni onyẹ eyemẹka;

15ị nọ gi ẹshin-agha ị zụnbanhan, gi ụkụ ẹshin gberụrụ okẹn mirin, elu okẹn mirin!

16“A nụgụ m ihiẹn lalanịnị ẹnyi ẹhụ nọ mama m nni; ọnụ hụ a ma m nni; ọ nọkẹsị ọkpụkpụ arịzị m ụkụ, ụkụ hụ a ma m gẹgẹgẹ. Kanị m k'e din ndidin cheri eje-ụhụọhịn ahụn sikọ d'e kunrun ndị rị a lụsọn ẹnyi agha.

17Ya wụ, ọsụọn'a nị figi amịnị mọbụ nị vaịnị amịnị; ọsụọn'a nị olivu amịnị mọbụ nị onwọnni ihiẹn rị ugbo; ọsụọn'a nị atụnrụn arịzị mọbụ nị ewu lẹ efin a gụgụọ; ọsụọn'a nị onwọnzini ihiẹn ọwụlẹ rịnị,

18m k'e gikwọ Osolobuẹ a ṅan; m k'e gikwọ onyẹ hụn a zụọpụhanị m a ghọghọ.

19Osolobuẹ-nwọnni-ẹnyi wụ ikẹn m! O mẹ ụkụ m a nọ kẹ nke ele, e mẹ m a sadẹ ẹka e jẹn ijẹn ebe jẹn elu.” Ye onyẹ-ndu ẹbụ ẹbụnị. Wẹ kpọ ụbọ ye ẹ.

← Chapter 2 Jump to: