John 14

Ika 2018 Bible

← Chapter 13 Jump to: Chapter 15 →

1Jizọsị nọ sị wẹ, “Anịlẹ ni obi nahịn ụnụ. Kweri ni ni Osolobuẹ; kwerizikwọ nị nị mmẹ nwẹn.

2Mmughẹ bu ọda iwe Nẹdi m. Omẹni ẹlẹ ẹrịra, nkẹ m'a gwa ụnụ. M shikọ nwan d'a kwademẹni ụnụ ebe ụnụ k'e bi.

3M jẹngụ d'a kwademẹni ụnụ ebe ụnụ jẹnkọ d'e bi, e kinhẹn m d'e weri ụnụ, kẹni ụnụ nwẹn rị ebe m rị.

4Ụnụ a marịngụọ ụzọ ebẹhụ m jẹnkọ.”

5Tamọsị nọ sị a, “Di-nwọnni-ẹnyi, ẹnyi amarịn ebe i jẹnkọ, nanị ẹnyi e dọn marịn ụzọ a?”

6Jizọsị nọ sị a, “Mmẹ wụ ụzọ lẹ ezioku lẹ ndụn. Onwọnni onyẹ a bịa d'e kunrun Chuku-Nẹdi mmanị ọ ghaha ẹka m.

7Omẹni ụnụ te marịn m amarịn, nkẹ ụnụ a marịnzị Nẹdi m. Ụnụ a marịngụọ a nwan gha kikẹnni jẹnmẹ; ụnụ a hụngụọ a.”

8Filipu nọ sị a, “Di-nwọnni-ẹnyi, ị ghọsịhụ ẹnyi Chuku-Nẹdi, ẹfọ e jun ẹnyi.”

9Jesu nọ sị a, “Filipu, hụnnị ile mmẹ lẹ ụnụ rị, y'e ke marịn m? Onyẹ hụnnị m a hụngụọ Chuku-Nẹdi. K'ị rị a sịnị, ‘Ghọsị ẹnyi Chuku-Nẹdi’?

10Ụnụ ekwerini nị m rị imẹ Chuku-Nẹdi lẹni Chuku-Nẹdi nkẹ rị imẹ m? Ẹlẹ uche m kẹ m rị a gwa ụnụ hụnnị ile, Chuku-Nẹdi hụn rị imẹ m rị a rụn ọrụn a.

11“Kweri ni ihiẹn m ku nị m rị imẹ Chuku-Nẹdi lẹni Chuku-Nẹdi nkẹ rị imẹ m. Kanị, omẹni ụnụ egikọ oku-ọnụ m kweri, gi ni nwan ihiẹn m rị a rụn kweri.

12Ezioku kẹ m rị a gwa ụnụ, onyẹ kwerinini m sikọ d'a rụn ọrụn ndị m rị a rụn. O jẹnkọ d'a rụnkarịdẹ ndịnị m rị a rụn, makẹlẹ m laburukọ Chuku-Nẹdi.

13Ihiẹn ọwụlẹ ụnụ gi ẹfan m rịọ, m sikọ d'e mẹ ẹ kẹni mmẹ wụ Nwa hụn ụzọ ye Chuku-Nẹdi ọghọ.

14Ihiẹn ọwụlẹ ụnụ gi ẹfan m rịọ m, m k'e mẹ ẹ.

15“Omẹni ihiẹn m a sụọghọ ụnụ, ụnụ jẹnkọ d'e mẹ ihiẹn m sị ụnụ mẹ,

16a rịọ m Chuku-Nẹdi, o zihẹni ụnụ onyẹ eyemẹka ọzọ n'o sọn ụnụ nọdị jẹnrin ejẹn.

17Mmọn-nsọ a ghọsị ezioku rọ; ụwa as'ẹka nabanhan a makẹni ụwa ara hụn a, ụwa amarịn a. Kanị ụnụ a marịnghọ a, makẹni o sọn ụnụ nọdị, o k'e bisọnmẹ imẹ ụnụ.

18Ẹlẹ m k'a latọ ụnụ kẹ ndị nwọnlẹni nnẹ lẹ nẹdi; m sikọ d'a bịa d'e kunrun ụnụ.

19“Ọ họdụ ẹkẹrẹ nị ụwa hụnbehi m; kanị ụnụ nwẹn k'a gha a hụn m. Makẹni m rị ndụn, ụnụ nwẹn k'a rịzị ndụn.

20O ru ụhụọhịn hụ, ụnụ jẹnkọ d'a marịn nị m rị imẹ Nẹdi m, nị ụnụ rị imẹ m, mmẹ nwẹn rị imẹ ụnụ.

21Onyẹ a nụ ihiẹn m ku, e gi wẹ e bi, ịya kẹ ihiẹn m a sụọ. Onyẹ ihiẹn m a sụọ kẹ ihiẹn ẹ k'a sụọ Nẹdi m; ihiẹn ẹ k'a sụọzịkwọ mmẹ nwẹn, e we m enwẹn m ghọsị a.”

22Ya kẹ onyẹ nsọnmazụụn a ohu w'a kpọ Judasị (kalẹ ẹlẹ nwa Iskarọtụ) nọ sị a, “Di-nwọnni-ẹnyi, kị k'a ghọsịnị ẹnyi enwẹn i bụ y'a ghọsịkọ ụwa?”

23Jesu nọ za a, “Onyẹ ọwụlẹ ihiẹn m a sụọ jẹnkọ d'e mẹ ihiẹn m ku. Ihiẹn ẹ k'a gha a sụọ Nẹdi m, mmẹ lẹ Nẹdi m a bịa d'e kunrun ẹ, du ẹ biri.

24Onyẹ ọwụlẹ ihiẹn m ghalẹni a sụọ ara mẹ ihiẹn m ku — bụ oku ndịnị ụnụ rị a nụ ẹlẹ nke m, wẹ wụ nke Chuku-Nẹdi hụn zihẹni m.

25“A gwagụọ m ụnụ ihiẹn ndịnị hụnnị mmẹ lẹ ụnụ rị;

26kanị, Mmọn-nsọ, Onyẹ eyemẹka, hụn Chuku-Nẹdi jẹnkọ d'e gi ẹfan m zihẹ, jẹnkọ d'a kuzi ụnụ ihiẹn ile; o k'a nyanhannị ụnụ ihiẹn ile m gwa ụnụ.

27“Udọn kẹ m rị a latọnị ụnụ; udọn m kẹ m rị e ye ụnụ — m'a ra ye kẹ ụwa dọn e ye. Anịlẹ ni obi nahịn ụnụ; atụlẹ ni egun.

28Ụnụ a nụghọ kẹ m sị ụnụ, ‘M pụkọ apụkọ’ lẹni ‘m sikọ d'e kinhẹn d'e kunrun ụnụ.’ Omẹni ihiẹn m sụọ ụnụ, nkẹ ụnụ hụ a ghọghọ nị m burukọ Chuku-Nẹdi, makẹni ịya ka m.

29A gwatọgụọ m nwan ụnụ ihiẹnni hụnnị o kelẹni mẹ — kẹni, o mẹ, ụnụ e kweri.

30Ogẹn arịa m'e gi gwamazị ụnụ ihiẹn bu ọda, makẹni onyẹ hụn a kị ụwanị lala nwan; onwọnni ihiẹn o k'a saẹka mẹ m,

31kanị, m rị e mẹ nị ụwa marịn nị ihiẹn Chuku-Nẹdi a sụọ m a sụọ, nị ihiẹn Chuku-Nẹdi sị m mẹ kẹ m'e mẹ. Lihi ni nwan nị ẹnyi pụ ebeni.

← Chapter 13 Jump to: Chapter 15 →