John 9

Ika 2018 Bible

← Chapter 8 Jump to: Chapter 10 →

1Ogẹn Jizọsị gi ghafekọ, ọ nọ hụn onyẹ ẹnya kpu ishi kete wẹ mụl'a.

2Ndị nsọnmazụụn a nọ jụ a, “Onyẹ-nkuzi, onyẹ mẹ njọ wẹ gi mụ okẹnnyẹni ẹnya-ishi, ịya ra ndị mụn'a?”

3Jesu nọ sị, “Onwọnni; wẹ mụ a ẹnya-ishi kẹni Osolobuẹ ghọsị ikẹn ẹ imẹ ndụn a.

4Ẹnyi sikọ d'a rụnrịrị ọrụn onyẹ zihẹni m ebe eki rị elu, makẹni uhinhin lala, ogẹn wẹ ghalẹni a s'ẹka a rụn ọrụn.

5Hụnnị m rị imẹ ụwa, mmẹ wụ ukpẹ ụwa.”

6O kugụ ihiẹnni, ọ nọ jụ ẹsọn ye ẹjan rị alị, kpụrụ ẹjan buche ẹnya-ishi hụ ẹnya.

7Ọ nọ sị ẹnya-ishi hụ, “Jẹn mirin Silụam d'e fin ihun.” (Silụam wụ “Hụn wẹ zijẹn.”) O jẹn d'e fin ihun, ọ nọ leghama ụzọ lụaha.

8Ndị nọchimẹn'ẹ lẹ ndị marịn n'o te a rịọ ụrịọ hụ a sị, “Ẹlẹ hụn a nọdị alị a rịọ ụrịọ wụ ọnwan?”

9Ụfọdụ sị, “Ịya rọ.” Ndị ọzọ sị, “Mba, kanị o yi ẹ eyi.” Kanị ya nwẹn nọ sị, “Mmẹ rọ.”

10Wẹ nọ jụ a, “Nanị ị dọn nwan leghama ụzọ?”

11Ọ sị, “Okẹnnyẹ hụ w'a kpọ Jizọsị kpụrụ ẹjan te m ẹnya, sị m, ‘Jẹn mirin Silụam d'e fin ihun.’ Ya m nọ jẹn d'e fin ihun; m rị nwan e legha ụzọ!”

12Wẹ sị a, “Ebe okẹnnyẹ hụ rị?” Ọ nọ sị, “Amarịn m.”

13Ya wẹ nọ we onyẹ hụ ẹnya te kpu ishi jẹnni ndị Itu-Farisi.

14(Ụhụọhịn hụ Jesu kpụrụ ẹjan shịapụ a ẹnya wụ Ụhụọhịn Ezumikẹn.)

15Ya ndị Itu-Farisi nọ jụma a k'ọ dọn leghama ụzọ. Ọ nọ sị wẹ, “O kpụrụ ẹjan buche m ẹnya, e fin m ihun; m rị nwan e legha ụzọ.”

16Ụfọdụ ndị Itu-Farisi nọ sị, “Ẹlẹ Osolobuẹ zi okẹnnyẹni makẹni ara dọnmẹ iwu Ezumikẹn.” Ndị ọzọ sị, “Nanị onyẹ-njọ dọn nwan a saẹka a rụn ọrụn-atụmẹnya ndịnị?” Wẹ nọ kebe.

17Ya wẹ nọ sịzị hụn ahụn ẹnya te kpu ishi, “Kị yụ nwẹn ku banyen'ẹ, ebe o mẹ ni ya shịapụ ị ẹnya?” Ọ nọ sị, “Onyẹ-amụma rọ.”

18Ndị Ju hụ ete kwerini nị ẹnya te kpu ẹ ishi d'e ru n'a kpọha wẹ ndị mụn'a.

19Wẹ nọ jụma ndị mụn'a, “Ọnwan wụ nwa ụnụ hụn ụnụ sị nị ụnụ mụ a ẹnya-mpịn? Nanị k'o dọn nwan leghama ụzọ?”

20Ya ndị mụn'a nọ za, “Ihiẹn ẹnyi marịn wụ nị nwa ẹnyi rọ lẹ nị ẹnyi mụ a ẹnya-mpịn.

21Ẹnyi amarịn k'o dọn nwan leghama ụzọ mọbụ onyẹ shịapụ a ẹnya. Jụn'a nwan n'o rugụọ ogo. Ya sikọ d'e ku ọnụ a.”

22(Ndị mụn'a ku ẹrịra makẹlẹ egun ndị-ndu ndị Ju rị a tụ wẹ. Makẹni, ndị-ndu ndị Ju e kwerigbamaọlẹ nị onyẹ sị nị Jizọsị wụ Kraịstị, a chụpụ w'a imẹ ụlọ-ofufe.

23Ya haịn ndị mụn'a gi sị, “Jụn'a n'o rugụọ ogo.”)

24Ya wẹ nọ kpọ okẹnnyẹ hụ ẹnya te kpu ishi nke mgbe ẹbụọ, sị a, “Ku ezioku gi ye Osolobuẹ ọghọ! Ẹnyi a marịnghọ nị okẹnnyẹni wụ onyẹ-njọ.”

25Ọ nọ sị, “Omẹni onyẹ njọ rọ amarịn m. Ihiẹn ohu m marịn wụ nị ẹnya te kpu m ishi, kalẹ, e leghamagụọ m nwan ụzọ!”

26Ya wẹ nọ sị a, “K'o mẹ i? Nanị k'o dọn shịapụ ị ẹnya?”

27Ọ nọ sị wẹ, “A gwagụọ m ụnụ, ụnụ egini ẹ dọn. Kị ụnụ chọkọnị nị ụnụ nụzị a? Ra ụnụ chọkọ nị ụnụ wụrụ ndị nsọnmazụụn a?!”

28Ya wẹ nọ kpọma a iyi, a sị, “Ịyụ wụ onyẹ nsọnmazụụn a! Ndị nsọnmazụụn Mozizi kẹ ẹnyi wụ.

29Ẹnyi a marịnghọ nị Osolobuẹ gwa Mozizi oku, kanị o mẹ nke okẹnnyẹni, ẹnyi amarịndẹ ebe ọ gha bịa!”

30Okẹnnyẹ hụ nọ sị wẹ, “Okẹn ihiẹn! Ụnụ amarịn ebe ọ gha bịa bụ ọ shịapụ m ẹnya!!

31Ẹnyi a marịnghọ nị Osolobuẹ ara gọn onyẹ-njọ ntịn, nị onyẹ e fen'ẹ lẹ onyẹ e mẹ uche ẹ k'o gọn ntịn.

32Kete ụwa e bidọnlẹ, ẹnyi anụtuni nị wẹ shịapụ ẹnya onyẹ wẹ mụ ẹnya-ishi.

33Omẹni okẹnnyẹni ẹlẹ nke Osolobuẹ, o ke saẹka mẹ ihiẹn ọwụlẹ.”

34Wẹ nọ sị a, “Imẹ njọ kẹ wẹ nọchanrịn mụ ị; yụ k'a kuzimẹzi ẹnyi?!” Ya wẹ nọ chụpụ a imẹ ụlọ-ofufe.

35Jizọsị nụ nị a chụpụgụọ w'a. Ọ hụn a, ọ nọ sị a, “Y'e kwerighọ nị Nwa nke Ịhịan?”

36Ọ nọ za, sị, “Onyẹ rọ Diọkpa? Gwa m, kẹni m hụn ụzọ kwerin'ẹ!”

37Jizọsị nọ sị a, “Y'a hụngụọ a: onyẹ yụ lẹ ya rị e ku oku rọ.”

38Ọ nọ sị, “Di-nwọnni-ẹnyi, e kwerighọ m.” Ọ nọ gbuni Jesu osekpu.

39Jesu nọ sị, “M bịa ụwanị d'a han eṅẹn, kẹni ndị ẹnya-ishi leghama ụzọ, ndị e legha ụzọ a wụrụ ẹnya-ishi.”

40Ndị Itu-Farisi nọkunmẹn'ẹ a nụ ihiẹnni o ku, wẹ nọ jụ a, sị, “Ẹnyi nwẹn wụzịdẹ ndị ẹnya-ishi ra?”

41Jizọsị nọ za wẹ, “Omẹni ụnụ te wụ ndị ẹnya-ishi, ikpe njọ eke ma ụnụ; kalẹ, ebe ụnụ sị, ‘Ẹnyi hụ e legha ụzọ’, njọ ụnụ hụkwọ ebe ọ rị.”

← Chapter 8 Jump to: Chapter 10 →