Malachi 1

Ika 2018 Bible

Jump to: Chapter 2 →

1Ọnwan wụ ozi Osolobuẹ sị Malakaị zi ndị Izrẹlụ.

2Osolobuẹ sị ndị Izrẹlụ, “A ghọsịghọlẹ m ụnụ nị ụnụ rị m ụda.” Kanị ụnụ hụ a sị, “Nanị kẹ ẹnyi dọn rị ị ụda?” Mmẹ wụ Osolobuẹ sị, “Ẹlẹ umunẹ kẹ Isọ lẹ Jekọpụ wụ? Kanị Jekọpụ rị m ụda,

3Isọ arịnị m ụda, m nọ mẹ alị Isọ lẹ ugu ile ọ rị elu ẹ gba okpokoro, bu ukuu ẹ tọnị nkitẹ-ọfịa a kpa imẹ atụ.”

4Ndị alị Isọ wụ Ẹdọm, jẹnkọ d'a sị, “E tikpọgụọ wẹ ẹnyi ru alị, kanị ẹnyi k'a tụndọnzi ihiẹn tikpọnị.” Kanị Osolobuẹ Ihiẹn ile rị okpuru ẹ, sị, “Wẹ tụndọnzi, e tikpọzị m'a — d'e ru nị a kpọma w'a, ‘Eje-alị, alị Osolobuẹ k'e busọn olulu jẹnrin ejẹn.’

5Ụnụ ndị Izrẹlụ k'e gi ẹnya ụnụ hụn ihiẹn ndịnị, ụnụ e gi ọnụ ụnụ sị, ‘Osolobuẹ e hikẹkwọ ogbe! Ẹlẹkwọ imẹ alị Izrẹlụ sụọ — kẹ imẹ alị ndị ọzọ!’

6“Nwa a gbaye nẹdi ẹ; odibo a gbaye di-nwọnn'ẹ. Omẹni nẹdi kẹ m wụ, mgbaye m? Omẹni di-nwọnni ụnụ kẹ m wụ, mgbaye m? Ya kẹ Osolobuẹ ihiẹn ile rị okpuru ẹ rị a jụ ụnụ ndị nchụn-ẹjan rị e budan ẹfan m. Ụnụ hụ a sị kẹ nanị ụnụ dọn budan ẹfan m?

7Ẹjan ndịnị rụnị ụnụ rị a chụnyeni m elu ukpo nchụn-ẹjan m kẹ ụnụ gi e budan ẹfan m. “Ụnụ sị, ‘Nanị ẹnyi dọn mẹrụ ihiẹn i?’ Teburu Osolobuẹ ụnụ rị a kpọ ihiẹn mmakalaka kẹ ụnụ gi e mẹrụ ihiẹn m.

8“Hụn ahụn ụnụ gi anụ ẹnya kpọhị a chụnyeni m ẹjan — ẹlẹ eje-ihiẹn rọ? Hụn ahụn ụnụ a chụnyeni m anụ dan ngụrọ lẹ anụ rịlẹni ikẹn — ẹlẹ eje-ihiẹn rọ? Welele ni anụ nọ ẹrịra ye Gọvanọ ụnụ. Nị ihiẹn ụnụ sụọ a? N'o mẹni ụnụ ihiẹn ụnụ rịọ a? Ya kẹ Osolobuẹ ihiẹn ile rị okpuru ẹ ku.

9“Rịọnị ẹnyi nwan Chuku, n'o yeni ẹnyi ẹka. Ị rịọ a, n'o kweri narịn ụnụ ihiẹn nọ ẹnịna mẹ ihiẹn ụnụ rịọ a? Ya kẹ Osolobuẹ ihiẹn ile rị okpuru ẹ ku.

10K'ọ rị m nwan, onyẹ ohu imẹ ụnụ a gụnma ụzọ Ụlọ-nsọ, amamgbe ụnụ ghazị a mụye ọkụn nwọnlẹni ihiẹn m gi ẹ e mẹ elu ukpo nchụn-ẹjan m! Ihiẹn ụnụ rị e mẹ asụọnị m kaka; anarịnkọ m ẹjan ụnụ. Ya kẹ Osolobuẹ ihiẹn ile rị okpuru ẹ ku.

11“Alị ndị ọzọ a gbaye ẹfan m — gha ebe anwụn nọ a wa d'e ru ebe ọ n'a dan; ndị ile rị ebe ọwụlẹ a mụnị m nsẹnsi e gi a chụnyeni m ẹjan rụlẹni, makẹni ẹfan m nwọn ọghọ ọda-ọda imẹ alị ndị ọzọ.

12Kanị ụnụ hụ e budan ẹfan m ebe ụnụ rị e mẹ teburu Onyẹ-nwọn ihiẹn ile nọkẹ ihiẹn rụnị, e lelịa ihiẹn-oriri ẹ;

13ụnụ e sị, ‘Ihiẹnni a gụ ndụn!’ Ụnụ e shin ẹ. Ya kẹ Osolobuẹ ku. “Ụnụ e wẹhẹsọnmẹ ihiẹn ụnụ narịn ịhịan mọbụ anụ dan ngụrọ mọbụ hụn rịlẹni ikẹn — wẹ ile kẹ ụnụ gi e ye oyiye! Nị m kweri narịn ụnụ ya? Ya kẹ Osolobuẹ ku.

14“Ọ rịkọnị onyẹ-ntụ hụ mma, onyẹ hụn nwọn ebulu rị mma imẹ anụ a, kwe nkwa nị ịya k'o k'a chụnyeni Osolobuẹ, kanị ogẹn ru ọ chụnyen'ẹ hụn ẹhụ a zulẹni! Makẹni, okẹn Eze w'a gbaye ẹfan a imẹ alị ndị ọzọ kẹ m wụ. Ya kẹ Osolobuẹ ihiẹn ile rị okpuru ẹ ku.”

Jump to: Chapter 2 →