Malachi 3

Ika 2018 Bible

← Chapter 2 Jump to: Chapter 4 →

1Lee ẹ, m zila nwan onyẹ-ozi m n'o d'a kwanị m ụzọ. Ogẹn ahụn, Di-nwọnni ụnụ nwẹn ụnụ rị a chọ, a bịa Ụlọ-NSỌ a idẹnmizi; onyẹ-ozi hụ k'e mẹ oku nkwerigbama ụnụ rị e gi ẹnya ẹbụọ a chọ, lala! Ya kẹ Osolobuẹ ihiẹn ile rị okpuru ẹ ku.

2Kanị, onyẹ k'a hụn isi ogẹn o k'e gi bịa? Onyẹ k'a s'ẹka turu mgbe o gi pụha? Makẹni, ọ nọ kẹ ọkụn wẹ gi a dụnchanpụ nsịn-igwe lẹ ncha wẹ gi a sụ ẹkwa!

3O k'e mẹ kẹ onyẹ e gi ọkụn a dụnchanpụ nsịn siliva e wepụha ezigbo siliva, o wepụ ebọn Livaị unyin kẹ wẹ e wepụ unyin rị goru lẹ siliva, a wụrụ wẹ nke Osolobuẹ, a sa ẹka a chụn ẹjan hụn Osolobuẹ a narịn.

4Ogẹn ahụn, Osolobuẹ a narịnmazị oyiye ndị Juda lẹ Jerusalẹm k'o dọn e mẹ mbụ.

5M k'a nọzụnhan d'e kin ụnụ ikpe, a shịagbu m ndị e gi ikẹn ọzọ a rụn ẹri, elekọ m ẹnya azụụn, wẹ lẹ ndị di lẹ nwunyẹ ẹnya wẹ rị ogbe lẹ ndị a shịa ẹri ntụ lẹ ndị e ri ụgwọ-ọrụn ndị wẹ we ọrụn; ndị e mẹgbu ikpoho di wẹ nwụn lẹ ndị e mẹgbu ndị nwọnlẹni nẹdi lẹ ndị e nupụ abịamabịa — ndị ile ghalẹni a gbaye m. Ịya kẹ Osolobuẹ Ihiẹn ile rị okpuru ẹ ku.

6“Makẹni mmẹ wụ Osolobuẹ ara gbehutọ haịn ụnụ wụ ebọn Jekọpụ gilẹni gụ k'o te furu,

7makẹni gha ogẹn ndị nẹdi ụnụ lala kẹ ụnụ latọma iwu m, ụnụ edọnmẹni wẹ. Bihutọ nị nwan ẹka buruhẹ m, kẹni m buruhẹzi ụnụ. Ya kẹ Osolobuẹ ihiẹn ile rị okpuru ẹ ku. “Kanị ụnụ hụ a jụ, ‘Elee ẹka kẹ ẹnyi k'e bihutọ?’

8“Nị ịhịan zun nwan Osolobuẹ ohin? Bụ ụnụ hụ e zun m ohin. “Kanị ụnụ hụ a jụ, ‘Nanị ẹnyi dọn e zun Osolobuẹ ohin?’ “Ụzọ-ohu-imẹ-ụzọ-iri lẹ oyiye ụnụ furu nị ụnụ e ye kẹ ụnụ rị e zunnarịn m.

9“Ụnụ a wụrụọlẹ ndị wẹ bụ ọnụ makẹ ohin ụnụ rị e zun m — ụnụ ndị alịnị ile!

10Wẹhẹchanrịn nị nwan ụzọ-ohu-imẹ-ụzọ-iri ebe w'e butọ a — kẹni ihiẹn-oriri jun Ụlọ m. Gi n'ẹ leledẹle m, mmẹ wụ Osolobuẹ ku ẹ — omẹni agụnpụkọnị m ụnụ windo elu-igwee, hutuni ụnụ ngọzi ụnụ jẹnkọlẹni d'a sa ẹka bu;

11a chụpụnị m ụnụ ihiẹn e ri ihiẹn-ugbo, amamgbe o wiwi ihiẹn ugbo ụnụ; a hụn m'a nị vaịnị rị ugbo ụnụ a dankọzị ifie. Ya kẹ Osolobuẹ ihiẹn ile rị okpuru ẹ ku.

12Ogẹn ahụn, alị ile a kpọma ụnụ ngọzi, makẹni ụnụ lẹ alị ụnụ k'a wụrụ ihiẹn w'a chọ achọ. Ya kẹ Osolobuẹ ihiẹn ile rị okpuru ẹ ku.

13“Osolobuẹ sị, ‘Ụnụ e kujagụọ oku m.’ “Kanị ụnụ sị, ‘Kị ẹnyi gi kuja oku i?’ ”

14“Ụnụ sị, ‘Ife Osolobuẹ abannị erere. Kị wụ erere idọnmẹ iwu ẹ lẹ igi ufiri Osolobuẹ ihiẹn ile rị okpuru ẹ a kọma isi alị nọkẹ ndị rị a kwan ịhịan?’

15Ụnụ a sịzị nị ‘Ndị e mẹkarị enwẹn wẹ kẹ w'a ja mma, ndị eje-ịhịan nwọn nwan a gbọrị; wẹ hụzịd'a chọ ihiẹn rị Osolobuẹ ọnụ, onwọnni ihiẹn e mẹni wẹ.’ ”

16Ya kẹ ndị a tụ egun Osolobuẹ nọ gwa ibe wẹ oku, Osolobuẹ nọ gọn ntịn ihiẹn wẹ ku, gụn a yeni wẹ. Ebe Osolobuẹ rị, wẹ nọ de ẹkụkwọ wẹ gi a nyanhan ndị ahụn a tụ egun Osolobuẹ, a gbaye ẹfan a.

17Osolobuẹ Nwọn ikẹn ile sị, “Wẹ jẹnkọ d'a wụrụ nke m, ụhụọhịn m jẹnkọ d'e mẹ ihiẹn m k'e mẹ e gi m wẹ họnrin ihiẹn m pụ ichẹn. M k'e mẹ omikẹn wẹ kẹ nẹdi dọn e mẹ omikẹn nwa a hụn e fen'ẹ.

18Ogẹn ahụn, ụnụ e hutọ, sị, ‘Ezioku-ezioku, ihiẹn rị ichẹn rị ẹgbata ndị ezi-omumẹ lẹ ndị njọ, ihiẹn rị ichẹn rị ẹgbata ndị a gbaye Osolobuẹ lẹ ndị ghalẹni a gbaye ẹ!’

← Chapter 2 Jump to: Chapter 4 →