Philippians 2

Ika 2018 Bible

← Chapter 1 Jump to: Chapter 3 →

1Omẹni w'a kasị ịhịan obi imẹ Kraịstị; omẹni ihiẹn-ọsụsụọ e mẹ ịhịan a rọkọ ibe ẹ obi; omẹni ẹnyi ile hụ e mẹkọ imẹ Mmọn-nsọ; omẹni ịhịan e mẹ ni ibe ẹ ẹfọma, e ro k'ọ rị ibe ẹ,

2mẹ ni nwan ịghọghọ m zu oke. Mẹ n'ẹ ghahanị iro ihiẹn ohu, inwọntarị ihiẹn-ọsụsụọ, ikwerigbamanị, ịchụ ihiẹn ohu.

3Emẹkwọlẹ ihiẹn ọwụlẹ n'i gi ẹ chọrị nke i sụọ mọbụ nị wẹ hụn ị. Ka e welụa nị enwẹn ụnụ alị, e ye ibe ụnụ ọghọ karị enwẹn ụnụ.

4Onyẹ-onyẹ imẹ ụnụ k'a gha a chọ ọrịrịmma ibe ẹ, ẹlẹ nke ya lẹ enwẹn ẹ sụọ.

5A gụn nị agụngụn ohu hụ Kraịstị wụ Jizọsị gụn:

6Ọsụọn'a nị Osolobuẹ k'ọ wụ, o mẹdẹni nị ya lẹ Osolobuẹ han.

7Kama, ọ nọ bu ihiẹn ọ wụ che ụsụọ, wụrụ odibo, a mụ w'a ịhịan; hụnnị ọ wụ ịhịan,

8o welụa enwẹn ẹ alị, e humẹ isi, d'e ru ebe ọ nọ kweri ni wẹ gbu ẹ — kweridẹ hụn wẹ gi kpọgbu ẹ elu obe!

9Ufiri ọnwan, Osolobuẹ nọ bushichanrịn a elu, bu ẹ che ọnọdị kachanrịnnị, ye ẹ ẹfan hụn kachanrịn ẹfan ile.

10Nke wụnị, wẹ kpọhụ ẹfan Jizọsị, ihiẹn ile rị elu-igwee lẹ elu-ụwa lẹ okpuru ụwa sikọ d'e gburịrị osekpu,

11ọnụ ile k'e kurịrị a nị Jesu Kristi wụ Onyẹ nwọn ihiẹn ile, ọghọ e gi ẹ bịanị Chuku-Nẹdi.

12Ufiri ẹ, ndị nke m, kẹ ụnụ dọn e humẹni m isi ogẹn mmẹ lẹ ụnụ gi rị ụzọ ohu, e mẹkẹnmẹzidẹ ẹ hụnnị m rịlẹn'a, mẹsọnmẹ ni nwan ẹrịra: e gi ni egun lẹ ẹhụ-ọmụma-nni e bi, e mẹ ihiẹn ile Osolobuẹ e gi zụọpụha ụnụ.

13Makẹni Osolobuẹ ya rị ọrụn imẹ ụnụ ogẹn ile, e mẹ ụnụ a sa ẹka a họrị uche ẹ, e mẹzikwọ uche ẹ.

14E mẹ ni ihiẹn ile wẹ sị ụnụ mẹ — edẹnwịnnwịnlẹ ni; adọlẹ ni adịdọ,

15kẹni ụnụ wụrụ ndị nwọnlẹni nkọrịanị, ndị ẹka wẹ rị ọchan; ụmụ Osolobuẹ obibi wẹ nwọnlẹni ntụpọ hụn bi imẹ eje-agbọ zinrinlẹni, e nwun, e ke, imẹ ụwanị kẹ kokisẹ.

16E kwọnkẹnmẹ ni oku hụn e ye ndụn, kẹni m hụn ihiẹn m'e gi nyan isi Ụhụọhịn Kraịstị k'a bịa, nị ọsọ m gba lẹ ọrụn m rụn alanị iwi.

17Ọsụọn'a nwan nị wẹ rị nwan e hupụ ndụn m nọkẹ manya e cheni okukwe ụnụ nọkẹ ẹjan wẹ rị a chụnyeni Osolobuẹ, ẹfọ rị a sụọ m ụsụọ; m rị e sọn ụnụ a ghọghọ!

18Ẹfọ ya sụọzị ụnụ nwẹn ụsụọ, ụnụ e sọn m ghọghọ.

19M rị e lee ẹnya nị Di-nwọnni-ẹnyi wụ Jizọsị k'a nị m zihẹni ụnụ Timoti ẹgwa, kẹni m nụ ozi ụnụ, ndụn a ban m.

20Enwọn m onyẹ ọzọ hụn rị kẹ Timoti, hụn gichanrịn akpakalị obi ẹ a chọ ọrịrịmma ụnụ.

21Ndị ile họdụnị e ro nke-wẹ, nke-wẹ, ẹlẹ nke Jesu Kristi!

22Kanị, nke Timoti, ụnụ lẹ enwẹn ụnụ a marịngụọ onyẹ ọ wụ, nị o sọn m a rụn ọrụn oziọma kẹ nwa dọn e sọn nẹdi ẹ.

23M bu ẹ nwan obi nị m zihẹni ụnụ ya ẹgwa, m marịngụhụ kẹ ihiẹn k'a rịnị m ebeni.

24Obi e ruzịghọ m alị imẹ Di-nwọnni-ẹnyi nị mmẹ nwẹn lalazị ẹgwa.

25K'osilẹrị, e rogụọ m'a n'ọ rị mkpa nị m zihẹni ụnụ Ẹpafrọditọsụ nwẹnẹ m imẹ Di-nwọnni-ẹnyi, onyẹ-ọrụn lẹ onyẹ-agha ibe m, hụn ụnụ zihẹ, hụn rị a rụnnị ụnụ ọrụn ghahanị iyeni m ẹka.

26M zila a makẹni ụnụ rị a da a ọda-ọda, ọ fụka a nị ụnụ nụ nị emu kụ a.

27Ezioku-ezioku, emu te kụ a ọda-ọda, o te d'a nwụn! Kanị Osolobuẹ nọ mẹ omikẹn ẹ, bụ ẹlẹ ịya sụọ k'o mẹn'ẹ kanị mmẹ nwẹn zi, amamgbe ẹkwan m a waye.

28M zila a nwan ẹgwa, kẹni ụnụ hụn a, ẹfọ a sụọ ụnụ ụsụọ, uhue m e belụa.

29Gi ni nwan ịghọghọ nabanhan a makẹ Di-nwọnni-ẹnyi. A gbaye ni ndị nọ kẹ ịya —

30makẹni ọrụn Kraịstị e d'a napụ a ndụn a, ebe ọ nọ bu ndụn a che ọb'ẹka n'o nọkin ẹnya ụnụ yeni m ẹka.

← Chapter 1 Jump to: Chapter 3 →