Philippians 3

Ika 2018 Bible

← Chapter 2 Jump to: Chapter 4 →

1Umunẹ m, igi mẹkin: m sị ụnụ, a ghọghọ nị imẹ Di-nwọnni-ẹnyi. Ndụn idezini ụnụ ihiẹn m degụnị ụnụ mbụ agụkọ m, makẹni o k'e yeni ụnụ ẹka.

2Kpachanpụ nị ẹnya makẹ nkitẹ ndị hụ! Kpachanpụ nị ẹnya makẹ ndị ahụn rị e mẹ eje-ihiẹn! Ẹghẹẹ, kpachanpụ nị ẹnya makẹ ndị hụ e bekika ịhịan ẹhụ nị wẹ rị a kwa ugun!

3Makẹni, ẹnyi nwẹn wụ ndị hụn kwa ezigbo ugun: ẹnyi ndị rị e fe Osolobuẹ ofufe imẹ-mmọn ghahanị Mmọn-nsọ, ẹnyi ndị gi Kraịstị wụ Jizọsị e dọn ẹnya, a nyan isi, ẹnyi ndị ghalẹni e gi ihiẹn ẹnya e legha e dọn ẹnya,

4ọsụọn'a nị mmẹ nwẹn e nwọnzighọ ihiẹn ẹnya e legha hụn nkẹ m'e gi dọn ẹnya, nyan isi. Ẹghẹẹ, onyẹ sị n'o nwọnghọ ihiẹn o gi dọn ẹnya elu-ụwanị, mmẹ ka e nwọn:

5Wẹ kwa m ugun kẹ m rị nwa akpọhịn ẹsatọ daị; m wụ nwa-di-alị Izrẹlụ: onyẹ ebọn Bẹnjamini; onyẹ Hibru ndị Hibru mụ. O mẹ nke idọnmẹ Iwu Mozizi, m te wụdẹ onyẹ Farisi;

6o mẹ nke adụdụ, m kpokpo ụka Kraịstị; o mẹ nke ezi-omumẹ Iwu Mozizi, enwọn m nkọrịanị.

7Kanị, e gigụọ m nwan ufiri Kraịstị gụn ihiẹn ile te bannị m erere ye ihiẹn la iwi.

8Ẹlẹdẹ ọhụn sụọ, a gụngụọdẹ m ihiẹn ile ye ihiẹn la iwi, makẹ ufiri ihiẹn hụn ka wẹ ile ọhụnma-ọhụnma, hụn wụ ịmarịn Kraịst Jizọsị Di-nwọnni m, onyẹ hụn m gi nwan ufiri ẹ nị ihiẹn ile la, weridẹ wẹ kẹ nsịn, kẹni m kwọnkẹnmẹ Kraịstị,

9a rịchanrịn m imẹ ẹ, ẹlẹ nke onyẹ rị ọchan ẹnya enwẹn ẹ makẹni ọ hụ e dọnmẹ Iwu, kama, rịkẹ onyẹ rị ọchan makẹni o gi Kraịstị e dọn ẹnya — ịrị-ọchan ahụn gha ẹka Osolobuẹ a bịa, hụn wẹ gi okukwe e nwọnhẹn.

10M chọ nị m marịn Kraịstị lẹ ikẹn hụ o gi gha ọnwụn lihi, e sọn m'ẹ ta afụnfụn ọ ta, sọn ẹ nwụn ọnwụn ọ nwụn,

11kẹn'o nwọndẹ kẹ m dọn rị ndị k'a gha ọnwụn lihi.

12Ẹlẹni e nwọnhẹngụọlẹ m ihiẹn ahụn mọbụ nị e zuchanrịngụọlẹ m oke. Kama, m'a chụshi ẹ ikẹn, kẹni m nwụndọn ihiẹn hụ Kraịstị wụ Jizọsị gi ufiri ẹ nwụndọn m.

13Umunẹ, m'a ra weridẹ enwẹn m kẹ onyẹ nwọnhẹngụn'a. Mba! Kama, ihiẹn ohuni kẹ m'e mẹ: m'a zọ hụn m nwọnhẹngụ, a lịlịma nị m nwọnhẹn hụn rị ihun.

14M'a lịlịma, e buchanrịn ihun e zinmẹ ebe m gbakọ, kẹni m nwọnhẹn ihiẹn hụn Osolobuẹ kpọnị ẹnyi oku elu-igwee rị imẹ Kraịstị wụ Jizọsị.

15Ya wụ, ẹnyi ile ka ẹhụ imẹ Kraịstị furu nwan nị ẹnyi e nwọn ụdị agụngụnnị. O mẹ nwan nị ịhịan rị e ro ihiẹn ichẹn, Osolobuẹ k'e mẹ ẹ ghọta.

16Kanị, nị ẹnyi ile e mẹ hụn furu ogo ẹnyi rugụ.

17Umunẹ m, ụnụ ile, e sọnni nzọmụkụ m; leri ni obibi ndị hụ e lerini ẹnyi.

18Makẹni, ndị bu ọda e bi nọkẹ sị wẹ wụ ndị-iṅẹnrẹn obe Kraịstị. A gwaọlẹ m ụnụ ya mgbe ole-lẹ-ole mbụ; m gi nwan ẹnya-mirin a gwazị ụnụ ya.

19Wẹ shikọ ntikpọ; ẹfọ wẹ wụ Chuku wẹ; ihiẹn nkẹ e mẹ wẹ ifẹnrẹn kẹ wẹ gi a nyan isi; ihiẹn-ụwa ihiẹn-ụwa kẹ wẹ e ro.

20Kanị o mẹ nke ẹnyi, ẹnyi wụ ụmụ di-alị elu-igwee; ẹnyi rị nwan a tụ ẹnya Onyẹ-nzụọpụha, Di-nwọnni-ẹnyi wụ Jesu Kristi hụn gha ebẹhụ lala.

21O k'e nwọnhutọ ẹhụ ẹnyi ndịnị ụya e ri, a nọ wẹ kẹ ẹhụ a ọghọ jun; ikẹn ẹ ahụn o gi a saẹka e bu ihiẹn ile e che okpuru ẹ k'o sikọ d'e gi mẹ ẹ.

← Chapter 2 Jump to: Chapter 4 →