Song of Solomon 1

Ika 2018 Bible

Jump to: Chapter 2 →

1Ọnwan wụ ẹbụ ka ẹbụ, ẹbụ Solomọnụ.

2Sususọnmẹ m ọnụ — makẹni ihiẹn-ọsụsụọ ị sụọnahịn manya.

3Udẹn hụn i te rị e kun fuẹin; ẹfan ị rị e kundẹ fuẹin kẹ udẹn wẹ hupụha — ya haịndẹ i ihiẹn i gi a sụọ ịgbagba!

4Weri m, nị ẹnyi pụ ozigbo-ozigbo! “Eze” m ya dodo we m shi mmughẹ ẹ. Nị ẹnyi gi ufiri i ghọghọ, ẹfọ a sụọ ẹnyi ụsụọ; ẹnyi k'a ja ihiẹn-ọsụsụọ ị mma karị manya. Ya haịndẹ ihiẹn i gi sụọ wẹ!

5Ịgbagba Jerusalẹm, m'e gi ngi-o, kanị m ma mma, m'e gi ngi nọkẹ ọdụ w'e bi imẹ Kẹda, m ma mma kẹ ẹkwa ndị wẹ gi tankin ọnụmụzọ Solomọnụ.

6Agbazilẹ ni m ile makẹni m'e gi ngi, anwụn gikpo m. Makẹni umunẹ m ikẹnnyẹ rị e weni m iwe, wẹ nọ mẹ m rụnma alị vaịnị — ebuzini m ẹnya che alị vaịnị m.

7Nke-m, gwa m elebe kẹ y'e wejẹn atụnrụn ị d'a kpa nni? Elebe kẹ y'e wejẹn atụnrụn ị d'e zu ikẹn ẹnyanwụn ru isi? Gwa m, amamgbe m'e kpumẹmẹ ihun yeni ifẹnrẹn, chọkọ ị imẹ igunrun ibe i ndị e du atụnrụn!

8Euu, okpoho hụn kachanrịn ikpoho ile mma, omẹni y'a marịn ebẹhụ, sọnmẹhụ ụkụ atụnrụn ndị hụ, n'ị nọ ẹhụ ọdụ ndị e du atụnrụn ye ụmụ ewu i ihiẹn-oriri.

9Euu obim, Ị rị m kẹ ẹshin ndị hụ ma mma a dọkpụn ụgbọ-ẹshin Fẹro Ijiptu.

10Ihiẹn-ntịn ị e furukẹ i, ihiẹn-olu i e furuzịghọ ị.

11Ẹnyi jẹnkọ d'e mẹmẹni i ihiẹn-olu goru, kụnyesọnmẹ ẹ siliva.

12Ebe eze dinẹ, udẹn m nọ kunpụha fuẹin.

13Nke-m rị m kẹ ngungun maa e kun fuẹin hụn rị m elu obi, ẹgbata ẹran m.

14Nke-m rị m kẹ obobo hena rị alị vaịnị ndị rị Ẹn-Gẹdi.

15Obi-m, y'a rịka mma! Euu, y'a rịkazị mma! Ẹnya ị nọ kẹ nke nduru.

16Nke-m, ya rịkazị mma! Y'e pukẹ okorọbịa! Ẹhụhụọ-oyiyi jun ebeni ẹnyi k'e dinẹ.

17Osisi sida ndịnị wụ nwan okpukpu ụlọ, osisi fẹ ndịnị wụ ihiẹn wẹ gi dụnmịn a.

Jump to: Chapter 2 →