Song of Solomon 2

Ika 2018 Bible

← Chapter 1 Jump to: Chapter 3 →

1Mmẹ wụ obobo rị alị-aradan Sharọnụ, obobo lili rị ọdanmgbugbu.

2Kẹ ẹfịfịa lili dọn rị ichẹn imẹ ogun, ẹrịra kẹ Obi-m nọ imẹ igunrun ịgbagba ibe ẹ.

3Kẹ osisi apụlụ dọn rị ichẹn imẹ osisi ndị rị ẹgboko, ẹrịra kẹ Nke-m nọ imẹ igunrun ikorọbịa ibe ẹ. Ọ sụọ m ịnọdị igungun ẹ; mkpụrụ a asụọka m ọnụ.

4O wẹhẹgụọ m d'e ri oriri, e gi ihiẹn-ọsụsụọ ghọsịchanrịnnị a wụ m ẹhụ.

5Ye m mkpụrụ-osisi figi ri, nị ndụn banzị m! Ye m apụlụ ri, nị ndụn ban m — makẹni ihiẹn-ọsụsụọ a karị m ẹka!

6Ẹka-ekpẹn ẹ rị m okpuru isi, ẹka-nni ẹ e fiedọn m.

7Ịgbagba Jerusalẹm, ma isi mgbadan lẹ ele, akpasukwọlẹ ni mọbụ kpọtiẹn ihiẹn-ọsụsụọ d'e ru mgbe ọ sụọ a.

8Gọn ntịn! Nke-m rọ! Lee ẹ k'ọ lala, k'ọ wụla, fetusọnmẹkọ ugu, kpọfesọnmẹkọ òke.

9Nke-m nọ kẹ mgbadan mọbụ okoro ele. Lee ẹ! O wuzo ẹhụ ụsụọ-ẹjan ẹnyi — a gha windo e lee ẹnya mmụlọ, a gha ihiẹn wẹ gi gankin windo e lee.

10Nke-m gwa m oku, sị m, Obi-m, lihi; Mma m, sọnmẹ m nị ẹnyi pụ.

11Lee ẹ, udu-mirin a gharịgụọ mirin arịzị e zue.

12Obobo a pụhasọnmẹgụọ; ogẹn ẹbụ e rugụọ; a nụmagụọ wẹ olu nduru rị a rịanị imẹ alị ẹnyi.

13Figi a hamamagụọ mkpụrụ ibuzọ; obobo vaịnị a pụhamagụọ, e kun fuẹin. Obi-m, lihi nwan, n'ị pụha; Mma m, sọnmẹ m, nị ẹnyi pụ.

14Nduru m, hụn hụarị oghe rị ọmụma, hụn rị ebe w'a hụarịsọnmẹ elu ugu. Ghọsị m ihun i, nị m nụ olu i; makẹni olu i a sụọka ụsụọ; ihun i a rịka mma.

15Nwụndọnni ẹnyi ufu ndị hụ — mmụ ufu ndị hụ hụn e wiwi vaịnị — alị vaịnị ẹnyi hụn rị e gbe ịhara.

16Nke-m wụ nke m, mmẹ nwẹn wụ nke ẹ; ọ rị ebẹhụ wẹ kun lili jun a ghahunmẹ.

17D'e ru mgbe eki fọn, d'e ru mgbe onyinyọn la, Nke-m, e hutọ — nọsọnmẹ kẹ mgbadan mọbụ okoro-ele hụn wụkọ elu òke ndị mẹ mkpọke-mkpọke.

← Chapter 1 Jump to: Chapter 3 →