1 Peter 2

Ilokano (Ti Biblia (1973))

← Chapter 1 Jump to: Chapter 3 →

1Gapuna, idianyo ti amin a kinadakes, ken amin a kinasicap ken dagiti panaginsisingpet, ken ap-apal, ken isu-amin a kita dagiti dakes a sa-sao,

2A cas ubbing a caiyanac, tarigagayanyo ti awan lalaocna a gatas a naespirituan tapno dumackelcayo gapu kencuana a maipaay iti pannacaisalacan;

3No napadasyo a ti Apo naayat:

4Dumatengcayo kencuana, isu a cas la maysa a bato a nabiag, nga imbel-leng a pudno dagiti tattao, ngem isu napili ken napateg iti Dios.

5Dacayo met, cas batbato a sibibiag, maibangoncayo a maysa a templo a naespirituan, nga agbalincayo a maysa a nasantoan a kinapadi; tapno idatonyo dagiti datdaton ti cararua, a macaay-ayo iti Dios, gapu ken Jesu-Cristo.

6Gapu ta adda a nailanad iti Surat: Adtoy siac isaadco idiay Sion ti nangnangrona a bato a pasuli, napili, napateg; Ket dayta mamati kencuana, saanto a maibabain.

7Maipaay cadacayo ngarud a mamati isu ti napateg; ngem maipaay cadagiti saan a mamati, Ti bato nga imbel-leng dagiti agar-aramid ti balay, Isu met laeng ti naaramid a pasuli;

8Ken, Bato a pacaitibcolan ken bato a pacaibabainan; ta maitublacda iti sao, idinto a nasukirda: Ket itoy met nakednganda.

9Ngem, dacayo ti napili a caputotan, ti naarian a kinapadi, nasantoan a nacion, ili a cucua ti Dios; tapno ipaduyacyacyo dagiti kinatan-oc daydiay nangayab cadacayo manipud kinasipnget inggana iti nacascasdaaw a lawagna:

10Dacayo nga idi napalabas nga aldaw saancay nga umili, ngem ita dacay ti ili ti Dios; nga idi saancayo a nacaasian ngem ita nacaasiancayon.

11Ayayatec, dawatec cadacayo, dacayo a cas gangannaet ken agpagpagna, nga idianyo coma dagiti derderrep a linalasag, isuda a manggubat iti cararua:

12A patacnengenyo coma ti panagbibiagyo iti tengnga dagiti Gentil; tapno dayta pagsao-anda iti dakes cadacayo, a cas la managaramid iti dakes, gapu cadagiti nasayaat nga aramidyo a makitada, dayawenda coma ti Dios iti aldaw ti pannacaocom.

13Paiturayancayo iti amin nga alalagaden dagiti agturay gapu iti Apo: uray pay iti ari, a cas cangatoan unay;

14Wenno cadagiti gobernador a naibaon a mangdusa cadagiti agaramid ti dakes, ken mangidayaw cadagiti agaramid ti naimbag.

15Ta castoy ti nakem ti Dios, a dacayo gapu iti panagaramidyo iti nasayaat, pagulimekenyo ti kinanengneng dagiti tattao a nacuneng:

16A cas la agwayawayacayo, ngem ti panagwayawayayo saan coma a maaramat a pangabbong iti kinadakes, no di ket cas la ad-adipen ti Dios.

17Padayawanyo dagiti isu-amin a tattao; ayatenyo dagiti cacabsat; agbutengcayo iti Dios; dayawenyo ti ari.

18Paad-adipen agtulnogcayo a siaamac cadagiti appoyo saan laeng a cadagiti naimbag ken naanus, no di ket cadagiti pay naunget.

19Ta daytoy macaayayo, no ti siasinoman a gapu iti pakinakemna maipuon iti Dios agitured cadagiti rangranggas, nga aglac-am a di maiparbeng.

20Ta ania ti pacaidayawan, no idinto nga agbasolcayo ket matungpacayo, ket sagabaenyo a siaanus? ngem no agaramidcayo iti naimbag ket agsagabacayo, ket ituredyo a siaanus, daytoy macaayayo iti Dios.

21Ta maipaay iti daytoy naawiscayo; ta ni Cristo nagsagaba met gapu cadacayo, a nangibati cadacayo iti ulidan, tapno surutenyo dagiti addangna:

22Isu saan a nagaramid iti basol, ket awan ti nasaracan nga al-lilaw iti ngiwatna.

23Isu, nga idi rinabrabngisda, saan a simmungbat iti dakes; idi nagsagaba, saan a nangam-ames, no di ket nagtalec iti daydiay mangocom a sililinteg:

24Isu met laeng a nangawit cadagiti basbasoltayo iti bagina iti rabaw di cayo, tapno idinto a nataytayo cadagiti basbasol, agbiagtayo a maipaay iti kinalinteg: gapu cadagiti sugsugatna naagasancayo.

25Ta dacayo nayawawancayo idi a cas cadagiti carnero; ngem ita nagsublicayo iti Pastor ken Obispo dagiti carcararuayo.

← Chapter 1 Jump to: Chapter 3 →