1 Peter 5

Ilokano (Ti Biblia (1973))

← Chapter 4 Jump to:

1Dawatec ngarud cadagiti panglacayen, nga adda cadacayo, siac a panglacayen met, ken macasacsi cadagiti sinagaba ni Cristo, siac a mairaman met iti dayag a maiparangarangto:

2Ipastoranyo ti arban ti Dios nga adda cadacayo, nga acmenyo ti panangaywan, saan a mapilpilit, no di ket siaayat cas mayannurot iti pagayatan ti Dios: saan met nga iti naalas a panagsapul, no di ket iti nasiglat a nakem;

3Saancayo met a cas la agturay cadagiti naicumit cadacayo, no di ket agbalincayo coma a pagulidanan dagiti arban.

4Ket inton maipanayag ti catan-ocan a Pastor, awatenyonto ti balangat a nagloriaan a di agrupsa.

5Casta met dacayo a saan a panglacayen, agtulnogcayo cadagiti panglacayen; ket dacay amin, agcawescayo iti kinaemma, nga agtitinnulongcayo, ta ti Dios tallicudanna dagiti natangsit, ngem iccana ti parabur dagiti napacumbaba.

6Agpacumbabacayo ngarud iti mannacabalin nga ima ti Dios, tapno isu itanocnacay coma iti pannacaipaayna nga aldaw;

7Nga itaclinyo kencuana ti amin a pagdanaganyo gapu ta isu aluadannacayo.

8Agparbengcayo, agsalucagcayo; ti diablo a cabusoryo, cas la leon a ngumerngernger, magmagna iti sibayyo nga agsapsapul ti alun-unenna.

9Isu sarangtenyo ngarud babaen iti nabileg a pammati, yantangay ammoyo a dagiti castoy a sagsagabaen madamada a mapasamac cadagiti cacabsatyo nga adda ditoy lubong.

10Ket ti Dios ti amin a parabur a nangawis cadacayo iti agnanayon a gloriana ken Cristo, iti calpasan ti panagsagabayo iti bassit nga aldaw, isu met laeng palaingennacayto, patibkerennacayto, papigsaennacayto.

11Maited coma kencuana ti panagturay, iti agnanayon nga awan inggana. Amen.

12Gapu ken Silvano, cabsattayo a matalec cas ti panangibilangco nagsuratac cadacayo iti ababa, a bagbagaancayo ket panecnecac a daytoy isu ti napaypayso a parabur ti Dios; agtalinaedcayo kencuana.

13Cablaawannacayo ti Iglesia nga adda ditoy Babilonia, a napili a cas cadacayo, ken ni Marcos, nga anacco.

14Agkikinnablaawcayo a buyugen ti agep ni ayat. Talna coma cadacay amin dacayo nga adda ken Cristo.

← Chapter 4 Jump to: