2 Peter 1

Ilokano (Ti Biblia (1973))

Jump to: Chapter 2 →

1Ni Simon Pedro, adipen ken apostol ni Jesu-Cristo, cadagiti nairaman cadacami nga immawat met ti napateg a pammati iti kinalinteg ti Diostayo ken Manangisalacan, ni Jesu-Cristo,

2Parabur cadacayo ken ti talna umadu coma iti pannacaammo iti Dios ken ni Jesus nga Apotayo:

3Idinto nga iti nadiosan a pannacabalinna intedna cadatayo dagiti isu-amin a banbanag a maipaay iti biag ken kinasingpet, gapu iti pannacaamo kencuana a nangayab cadatayo babaen iti dayag ken pannacabalinna met laeng:

4Gapu cadagitoy naited cadatayo dagiti napateg ken dadackel unay a carcari tapno gapu cadacuada agbalincayo a mairaman iti kinadios a nalisianyo ti panagrupsa nga adda ditoy lubong gapu iti derrep.

5Ket gapu itoy met, aramatenyo ti amin a kinaregtayo ket iti pammatiyo inayonyo ti kinasingpet; ket iti kinasingpet, ti kinasirib;

6Ket iti sirib inayonyo ti panagparbeng; ket iti panagparbeng, ti anus; ket iti anus, ti panagbuteng iti Dios:

7Ket iti panagbuteng iti Dios, ti ayat a naincacabsatan; ket iti ayat iti naincacabsatan ti ayat cadagiti isu-amin.

8Ta no addaancayo cadagitoy a banbanag ken nawadwadda cadacayo, aramidendacayto a saan a nasadut ket agbungacayo ti pannacaammo ken Apotayo a Jesu-Cristo.

9Ta dayta awanan cadagitoy a banbanag, nabulsecan, makikitana laeng ti adda nga asideg a nalipatanna ti pannacagugor dagiti cadaanan a basbasolna.

10Gapuna, cacabsat, agregtacayo iti adadda pay iti panagpatibker ti pannacaawis ken pannacapiliyo; ta no aramidenyo dagitoy a banag, dicayto maiculbo:

11Ta iti castoy maaddaancayto ti nabacnang unay nga iseserrec iti agnanayon a pagarian ni Apotayo ken Manangisalacan a Jesu-Cristo.

12Gapuna sisasaganaacto nga agnanayon a mangipalagip cadacayo cadagitoy a banbanag, uray no ammoyo ida ken addacay a sititibker iti pudno nga icutanyo ita.

13Ket pagarupec a maipaay, bayat ti caaddac itoy nga abong, a parayrayencayo gapu iti panangipalagip;

14Ta ammoc nga umay a sipapardas ti panagwayawayco ditoy abongco a cas met imbaga caniac ni Apotayo a Jesu-Cristo.

15Ket aramidecto met a sigagaget tapno cancanayon a mabalinyo a laglagipen dagitoy a banbanag, calpasan ti ipapatayco.

16Ta saanmi a sinursurot dagiti nainsicapan a palpaltuad idi impacaammomi cadacayo ti pannacabalin ken ti iyaay ni Apotayo a Jesu-Cristo, no di ket nasacsian dagiti matami ti dayagna.

17Ta inawatna iti Dios Ama, ti dayaw ken dayag, idi immay kencuana, babaen ti nacascasdaaw a dayag, ti maysa a timec a castoy: “ Daytoy isu ti dungdungngoec nga Anac, isu a pagay-ayatac:”

18Ket daytoy a timec nangngegmi nga immay nanipud sadi langit, idi addacam a naicuyog kencuana idiay nasantoan a bantay.

19Ket naaddaancami ti natibtibker a sao ti padto; ket nasayaat ti aramidenyo no addacay a siimdeng kencuana, a cas iti maysa a silaw a manglawag iti maysa a disso a nasipnget, agingga iti agbannawag, ket ti baggac lumtuad cadagiti puspusoyo:

20Nga umuna nga ammoenyo daytoy, nga uray ania a padto ti Surat awan ti maidumduma a pannacaipatarusna.

21Ta uray caanoman, awan ti padto a naggapu iti nakem ti tao; no di ket dagiti tattao a pinaltiingan ti Espiritu Santo nagsaoda iti biang ti Dios.

Jump to: Chapter 2 →