2 Timothy 2

Ilokano (Ti Biblia (1973))

← Chapter 1 Jump to: Chapter 3 →

1Sica ngarud, anacco, bumilegca iti parabur nga adda ken Cristo Jesus.

2Ket dagiti banag a nangngegmo caniac a sinacsian dagiti adu, dagitoy icumitmo cadagiti tattao a matalec, isuda a macabalinto a mangisuro met cadagiti sabsabali.

3Makipagsagabaca a cas naimbag a buyot ni Cristo Jesus.

4Ti agsoldado, saan a maringgoran cadagiti pagsapulan daytoy a biag tapno mabalinna nga ay-ayoen daydiay nangilista kencuana a soldado.

5Casta met no adda makidangadang cadagiti pagayayaman, saan a mabalangatan no saan a makidangadang a naincalintegan.

6Rebbengna a ti agtaltalon nga agbannog isu ti umuna a mairaman cadagiti bunga.

7Imutectecam ti sao-ec; ta ti Apo iccannacanto ti pannacaawat iti isu-amin.

8Laglagipem ni Jesu-Cristo (iti capuonan ni David) a nagungar cadagiti natay, cas mayannurot iti evangelioc:

9Isu a pagsagabaac cadagiti rigrigat a cas cadagiti agaramid ti dakes, agingga cadagiti pannacarepreppet; ngem ti sao ti Dios saan a nareppet.

10Gapuna siac sagabaec amin gapu cadagiti napili, tapno magun-odanda met ti pannacaisalacan nga adda ken Cristo Jesus, agraman gloria nga agnanayon.

11Pudno daytoy a sao: Ta no nataytayo a naicanunong kencuana, agbiagtayo met a mairanud kencuana:

12No macaituredtayo, agaritayto met a mairanud kencuana; no isu paglicudantayo, paglicudannatayto met:

13No saantay a mapagtalcan agtalinaedto a matalec; ta dina mabalin nga ilibac ti bagina.

14Ipalagipmo dagitoy a banag, nga ipaganetgetmo cadacuada iti sangoanan ti Apo, a dida agsusupiat maipuon cadagiti sasao nga awan ti pagimbagan, no di ket pacariribocan dagiti agdengngeg.

15Agawaam a sireregta ti agparang iti sangoanan ti Dios a cas mangmangged a maanamungan nga awan ti ibainna, nga aramatem iti umisu ti sao ti kinapudno.

16Ngem adayuam dagiti palpalawag a di mainugot iti Dios ken awan capaypay-anda; ta lumanlandanto a lumanlan iti saan a panagpanunot iti Dios.

17Ket ti saoda agdadaelto a cas la iti gangrena; ket cadacuada adda da Himeneo ken Fileto;

18A naisiasida iti kinapudno a cuncunada a ti panagungar napalabasen ket riribukenda ti pammati dagiti dadduma.

19Nupay casta, ti cimiento ti Apo mataginayon a sititibker, nga adda kencuana daytoy a pagilasinan: Mailasin ti Apo dagiti tattao a cucuana, ket umadayuda coma iti kinadakes amin dagiti umawag iti nagan ti Apo.

20Ngem iti maysa a balay a dackel, saan laeng nga addaan cadagiti vasvaso a balitoc ken pirac, no di pay dagiti naaramid iti cayo ken dinamili: ket dagiti dadduma maipaayda iti nadayaw ket dagiti sabsabali, maipaayda iti nanomo.

21No ngarud adda aggugurto cadagidiay a banag; isunto ti maysa a vaso a maipaay iti dayaw, napagsanto, naservi iti akincua, maisagana iti isu-amin nga aramid a naimbag.

22Ngem adaywam dagiti tarigagay nga inuubingan, ket sumurotca iti kinalinteg, iti pammati, iti ayat, iti talna, a makicadcaduaca cadagiti umawag iti Apo a sidadalus ti pusoda.

23Ngem baybay-am dagiti supsupiat a minamaag ken agtaud iti kinanengneng, ta ammom a pataudenda dagiti panagriringgor.

24Ket ti adipen ti Apo saanna a rebbeng ti mannakiringgor, no di ket naamo cadagiti isu-amin, nalaing a mangisuro, nateppel,

25A mamatigmaan a siemma cadagiti sumalungasing; bareng no ti Dios ipaayanna ida ti panagbabawi a maipaay iti pannacaammoda iti pudno,

26Ken macalapsutda iti silo ti diablo, isu a nangcayaw cadacuada a maipaay iti pagayatanna.

← Chapter 1 Jump to: Chapter 3 →