2 Timothy 4

Ilokano (Ti Biblia (1973))

← Chapter 3 Jump to:

1Tarigagayac unay iti imatang ti Dios ken ni Cristo Jesus, isu a mangocomto cadagiti nabiag ken natay, ken gapu iti panagparangna ken ti pagarianna:

2Nga icascasabam ti sao; umagawaca iti tiempona man ken saanna a tiempo, tumubngarca, mangbabalawca, mamagbagaca, a buyugen ti amin a panaganus ken ti panangisursuro.

3Ta umayto ti aldaw a didanto maanusan ti nasayaat a sursuro; no di ket, idinto nga adda gagatel cadagiti lapayagda, mangornongdanto cadagiti mannursuro cas mainugot iti kinagaramugamda met laeng;

4Ket yadayudanto dagiti pagdengngegda iti pudno, ket sumiasida a mapan cadagiti parparbo a sarita.

5Ngem sica agtacnengca cadagiti isu-amin a banbanag, aganusca cadagiti rigrigat, aramiden ti aramid ti evangelista, tungpalem ti nacaibaonam.

6Ta addaacon a maidatdaton ket ti aldaw ti ipapanawco dimtengen.

7Nakirupacac iti nasayaat a pannakidangadang, naturposco ti tarayec, inaywanac ti pammati:

8Manipud ita naisagana a maipaay caniac ti balangat ti kinalinteg, nga itedto caniac ti Apo, ti nalinteg nga Ocom, iti daydiay nga aldaw; ket saan laeng a caniac, no di cadagiti isu-amin nga agayat iti panagparangna.

9Aramidem ti cabaelam tapno umayca caniac daras:

10Ta ni Demas pinanawannac, nga inayayatna daytoy lubong nga agdama, ket napan idiay Tesalonica: ni Crescente napan idiay Galacia, ni Tito idiay Dalmacia.

11Ni laeng Lucas ti adda caniac. Alaem ni Marcos, ket icuyogmo; ta matulungannac iti panagaywan.

12Ngem ni Tiquico imbaonco idiay Efeso.

13Daydi cagay a nabatic idiay Troas ken Carpo, yegmo, inton umayca, ken dagiti pagbasaan, nangrona dagiti pergamino.

14Ni Alejandro a mammanday iti cobre, adu ti dakes nga inaramidna caniac: ti Apo supapacannanto cas mayalubog cadagiti araramidna:

15Sica agaluadca met kencuana, ta sinupiatna unay dagiti sasaomi.

16Idi immuna a pannakicalintegac, awan ti kimmanunong caniac, no di ket isuda amin pinanawandac: sapay coma ta dinto maipabasol cadacuada daytoy.

17Ngem ti Apo kimmappon caniac ket pinapigsanac, tapno gapu caniac ti paibaga maananay coma ti pannacaipadamagna, ken tapno denggen idi dagiti isu-amin a Gentil: ket siac naluc-atanac iti ngiwat ti leon.

18Casta met ilisinacto ti Apo iti isu-amin a dakes nga aramid, ket isalacannacto a maipaay iti pagarianna a nailangitan; maited coma kencuana ti dayaw iti agnanayon nga awan inggana. Amen.

19Cablaawam ni Prisca ken ni Aquila ken sangacabbalayan ni Onesiforo.

20Ni Erasto nagbati idiay Corinto; ngem ni Trofimo pinanawac a masakit idiay Mileto.

21Aramidem ti cabaelam tapno macaayca, no di pay dumteng ti calam-ecna. Ni Eubulo cablaawannaca, ken ni Pudente, ken Lino, ken ni Claudia, ken dagiti isu-amin a cacabsat.

22Ti Apo ti cumuyog coma iti espiritum. Parabur coma ti adda kenca.

← Chapter 3 Jump to: